ଉତ୍କଳ ବିଶ୍ୱବିଦ୍ୟାଳୟ ସମାବର୍ତ୍ତନ ଉତ୍ସବରେ ବିବାଦୀୟ ବ୍ୟକ୍ତିଙ୍କୁ ଡ଼କ୍ଟରେଟ ନଦେବା ଦାବିରେ ରାଜ୍ୟପାଳଙ୍କୁ ଦାବୀପତ୍ର

ଭୁବନେଶ୍ୱର, (ଓ୍ବାଇଏନ୍ଏସ୍):ଉତ୍କଳ ବିଶ୍ୱବିଦ୍ୟାଳୟ ସମାବର୍ତ୍ତନ ଉତ୍ସବରେ ମାନ୍ୟବର ଉପରାଷ୍ଟ୍ରପତି ମୁଖ୍ୟ ଅତିଥି ଭାବେ ଯୋଗ ଦେଉଥିବା ବେଳେ ଜଣେ ବିବାଦୀୟ ବ୍ୟକ୍ତିଙ୍କୁ ଶିକ୍ଷାବିତ୍ ଭାବେ ସମ୍ମାନଜନକ ଡ଼କ୍ଟରେଟ ପ୍ରଦାନ ନିଷ୍ପତ୍ତି ରଦ୍ଦ କରିବା ଦାବୀରେ ଆଜି ଆମ ଅଧିକାର ପକ୍ଷରୁ ଏକ ଦାବୀପତ୍ର ରାଜ୍ୟପାଳଙ୍କ ଉଦ୍ଦେଶ୍ୟରେ ପ୍ରଦାନ କରାଯାଇଛି । ଆମ ଅଧିକାର ପକ୍ଷରୁ ଏକ ଚାରିଜଣିଆ ପ୍ରତିନିଧି ମଣ୍ଡଳୀ ଏଜି ଛକରୁ ଶୋଭାଯାତ୍ରାରେ ରାଜଭବନ ଯାଇ ବିଭିନ୍ନ ଦୁର୍ନୀତିରେ ସମ୍ପୃକ୍ତ ଥିବା ଜଣେ ଅଭିଯୁୁକ୍ତଙ୍କୁ କିପରି ସମ୍ମାନଜନକ ଡ଼କ୍ଟରେଟ ପ୍ରଦାନ କରିବାର ନିଷ୍ପତ୍ତି ନିଆଗଲା ତା’ର ତଦନ୍ତ କରାଯିବାକୁ ଦାବୀ କରିଛନ୍ତି । ଘରୋଇ ସ୍କୁଲ୍ ଖୋଲି ଶିକ୍ଷା ବ୍ୟବସାୟ କରୁଥିବା ଜଣେ ବିବାଦୀୟ ବ୍ୟକ୍ତି ଯିଏକି ଜମି ଜବରଦଖଲ ଠାରୁ ଆରମ୍ଭ କରି ଜଗନ୍ନାଥ ମନ୍ଦିର ପାଣ୍ଠିକୁ ଦେବାଳିଆ ହୋଇଯାଇଥିବା ଘରୋଇ ବ୍ୟାଙ୍କରେ ଗଚ୍ଛିତ ରଖିଥିବାର ପ୍ରମାଣ ମିଳିଲା, ସେପରି ବ୍ୟକ୍ତିଙ୍କୁ କିଭଳି ଶିକ୍ଷାବିତ୍ ଭାବେ ଚୟନ କରାଗଲା ବୋଲି ପ୍ରଶ୍ନ ପଚରାଯାଇଛି । ଉତ୍କଳ ବିଶ୍ୱବିଦ୍ୟାଳୟ ପରି ରାଜ୍ୟର ପ୍ରତିଷ୍ଠିତ ଓ ସୁନାମଧନ୍ୟ ଶିକ୍ଷାନୁଷ୍ଠାନର ଗାରିମା ଧୂଳିସାତ କରିଦେବାକୁ ଏହା ଏକ ଷଡ଼ଯନ୍ତ୍ର ଏବଂ ଏହି ପୁରସ୍କାର ଫିକ୍ସିଂ ବିଶ୍ୱବିଦ୍ୟାଳୟର ପ୍ରତିଷ୍ଠା ଉପରେ ଆକ୍ରମଣ ହୋଇଥିବାରୁ ଏହି ନିଷ୍ପତ୍ତିକୁ ତୁରନ୍ତ ବାତିଲ କରିବାକୁ ଦାବୀପତ୍ରରେ ଉଲ୍ଲେଖ କରାଯାଇଛି । ଆଗାମୀ କାଲି ସନ୍ଧ୍ୟାରେ ବାଣୀବିହାର ସମ୍ମୁଖରେ ମଧ୍ୟ ଛାତ୍ର ବିକ୍ଷୋଭ କରାଯିବ ଏବଂ ଏପରିକି ନିଷ୍ପତ୍ତି ପ୍ରତ୍ୟାହାର ନହେଲେ ଉପରାଷ୍ଟ୍ରପତିଙ୍କ ଗସ୍ତ ଦିନ ମଧ୍ୟ ଶାନ୍ତିପୂର୍ଣ୍ଣ ବିକ୍ଷୋଭ ପ୍ରଦର୍ଶନ କରାଯିବ ବୋଲି ଆମ ଅଧିକାର ପକ୍ଷରୁ ଆବାହକ ଅମିୟ ପାଣ୍ଡବ, ମହାସଚିବ ଗଣେଶ ଦାଶ, ସମ୍ପାଦକ ପାର୍ଥସାରଥୀ ଜେନା ଏବଂ ସଦସ୍ୟ ସଞ୍ଜୟ ପରିଡ଼ା ପ୍ରମୁଖ ଦାବୀ କରିଛନ୍ତି ।