ବିଭାଗୀୟ ଅଧିକାରୀଙ୍କ ଅବହେଳାର ପ୍ରତିବାଦ, ବକେୟା ଦରମା ଦାବିରେ କ୍ରୀଡ଼ା ଓ କଳା ଶିକ୍ଷକଙ୍କ ଧାରଣା

ବାଲେଶ୍ୱର, (ସରୋଜ ପଣ୍ଡା): ବିଭାଗୀୟ ଅବହେଳା ଓ ସରକାରୀ ଉଦାସୀନତା କାରଣରୁ ବର୍ଷକର ଦରମା ପାଇବାରୁ ବଞ୍ଚିତ କଳା ଓ କ୍ରୀଡ଼ା ଶିକ୍ଷକ ଶିକ୍ଷୟିତ୍ରୀମାନେ ସମଗ୍ର ଶିକ୍ଷା ପ୍ରକଳ୍ପ ସଂଯୋଜକଙ୍କ କାର୍ଯ୍ୟାଳୟରେ ଗୁରୁବାର ଗଣ ଧାରଣା ଦେଇଥିଲେ । ଜିଲା କଳା ଓ କ୍ରୀକ୍ଷା ଶିକ୍ଷକ ସଂଘର କର୍ମକର୍ତ୍ତାଙ୍କ ସମେତ ବହୁ ସଦସ୍ୟ ଏଥିରେ ଯୋଗ ଦେଇଥିଲେ । ଚୁକ୍ତି ଭିତ୍ତିକ ଠିକା ଶିକ୍ଷକ ଭାବେ ମାସିକ ପାଖାପାଖି ୭ ହଜାର ଟଙ୍କା ପାଉଥିଲେ ବି ବିଭାଗୀୟ ଅଧିକାରୀଙ୍କ ଖାମଖିଆଲି ମନୋଭାବ ଯୋଗୁଁ ଅଦ୍ୟାବଧି ୧୨ ମାସର ଦରମା ସେମାନଙ୍କୁ ମିଳିନଥିବା ଧାରଣାରତ ଶିକ୍ଷକ ଶିକ୍ଷୟିତ୍ରୀମାନେ ଆରୋପ କରିଛନ୍ତି । ବିଦ୍ୟାଳୟ ଓ ଗଣଶିକ୍ଷା ବିଭାଗ ସହ ପ୍ରତି ୬ମାସରେ ସେମାନଙ୍କର ଚୁକ୍ତି କରାଯାଉଥିଲେ ବି ଦରମା ପ୍ରଦାନରେ ଅଧିକାରୀ ତଥା ଜିଲା ପ୍ରଶାସନର କାଳକ୍ଷେପଣ ନୀତି କ୍ରମଶଃ ଅସହ୍ୟ ହୋଇଥିବା ସେମାନେ କହିଛନ୍ତି । ଜିଲାର ୪ଶହରୁ ଊର୍ଦ୍ଧ୍ୱ ଶିକ୍ଷକ ଶିକ୍ଷୟିତ୍ରୀ ଏବେ ଆର୍ଥିକ ଅନାଟନରେ କାଳ କାଟୁଛନ୍ତି । ଅନ୍ୟପକ୍ଷରେ କେନ୍ଦ୍ର ସରକାରଙ୍କ ନୂତନ ଶିକ୍ଷା ଆଇନ ଅନୁସାରେ ପ୍ରତିବର୍ଷ ଏପ୍ରିଲ ମାସରେ ସରକାରଙ୍କ ସହ ବର୍ଷିକିଆ ଚୁକ୍ତି ପାଇଁ ନିର୍ଦ୍ଦେଶ ଥିଲେ ବି ଓଡ଼ିଶାରେ ଏହା କାର୍ଯ୍ୟକାରୀ ନହେବା ଅତ୍ୟନ୍ତ ଦୁର୍ଭାଗ୍ୟର ବିଷୟ ବୋଲି ସେମାନେ ଆରୋପ କରିଛନ୍ତିି । ତୁରନ୍ତ ୧୨ ମାସର ଦରମା ପ୍ରଦାନ, ଚୁକ୍ତି ଅବଧି ୧ବର୍ଷକୁ ବୃଦ୍ଧି, ନିୟମିତ ଶିକ୍ଷକର ମାନ୍ୟତା ପ୍ରଦାନ ପାଇଁ ଶିକ୍ଷକ ଶିକ୍ଷୟିତ୍ରୀମାନେ ଦାବି କରିଛନ୍ତି । ଦାବି ପୂରଣ ନହେବା ପର୍ଯ୍ୟନ୍ତ ଏହି ଧାରଣା ଜାରି ରହିବ ବୋଲି ସେମାନେ ଚେତାନୀ ଦେଇଛନ୍ତି । ସୁବ୍ରତ କୁମାର ଗିରି, ମନୋରଂଜନ ମହାନ୍ତି, ଗୀତାଞ୍ଜଳି ଦାସ, ସସ୍ମିତା ଗିରି, ମ୍ରିନାଲୀନା ଦାସ, ବିଭୂତି ପ୍ରସାଦ ଦାସ, ଗୁରୁ ପ୍ରସାଦ ଦାସ ପ୍ରମୁଖ ଶିକ୍ଷକ ଶିକ୍ଷୟିତ୍ରୀମାନେ ଏହି ଧାରଣା ଓ ପ୍ରତିବାଦ କାର୍ଯ୍ୟକ୍ରମ ପରିଚାଳନା କରିଥିଲେ । ଏହି ଅବସରରେ ସଂଘ ପକ୍ଷରୁ ସମଗ୍ର ଶିକ୍ଷା ପ୍ରକଳ୍ପ ସଂଯୋଜକଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା ।