ତିନିଦିନ ଧରି ଲଗାଣ ବର୍ଷା, ପାଣିରେ ଭସିଲା ଚାଷ କିଆରୀ

ହାଟଡିହି (ଓ୍ବାଇଏନଏସ) ତିନିଦିନ ଧରି ଲଘୁଚାପ ଜନିତ ଲଗାଣ ବର୍ଷା ଲାଗି ରହିବା ଦ୍ୱାରା ହାଟଡିହି ବ୍ଲକର ତଳିଆ ଅଞ୍ଚଳରେ ଧାନ ଚାଷରେ ବ୍ୟାପକ କ୍ଷୟ କ୍ଷତି ହୋଇଛି। ଆଜି ଅପରାହ୍ନ ରୁ ଯଦିଓ ବର୍ଷା କମିଛି କିନ୍ତୁ ବିଲ ଗୁଡିକରେ କିଆରୀ କିଆରୀ ପାଣି ଠିଆ ହୋଇ ରହିଛି। ବିଶେଷ କରି ବଞ୍ଚୋ, ଶାସଙ୍ଗ, ଅକରୁଆ, ବଡ଼ରମ୍ପାସ, ସୁଲଣ, ଆମ୍ୱୋ, ସଢା, ଜମ୍ଭିରା , ମରେଇଗାଁ, ଭଳି ପଞ୍ଚାୟତର ଅନେକ ଗ୍ରାମର  ଚାଷୀଙ୍କ ଧାନ ଚାଷ କ୍ଷତିଗ୍ରସ୍ତ ହୋଇଛି। ନିକଟରେ ରୁଆ ପୋତା ହୋଇଥିବା ଧାନ ଗଛ ଗୁଡିକ ପାଣିରେ ବୁଡ଼ି ରହିଥିବା କାରଣରୁ ସେସବୁ ଧାନ ଗଛ ପଚି ଯିବାର ଆଶଙ୍କା ଦେଖା ଦେଇଛି। ଶାସଙ୍ଗ, ଛେନାପଦି, ବଞ୍ଚୋ, ମରେଇଗାଁ, ଭଳି ସ୍ଥାନ ମାନଙ୍କରେ ଜଳ ନିଷ୍କାସନ ର ସୁବିଧା ନଥିବାରୁ ଶହ ଶହ ଏକର ଚାଷଜମି ଜଳମଗ୍ନ ହୋଇ ରହିଥିବା ଦେଖିବାକୁ ମିଳିଛି। ବିଭିନ୍ନ ସ୍ଥାନର କଲ ଗୁଡ଼ିକ ପୋତି ହୋଇ ଯାଇ ଥିବାରୁ ଆଉ କେତେକ ସ୍ଥାନରେ କଲଭଟ ସମ୍ମୁଖରେ ଘରକରି କଲଭଟକୁ ବନ୍ଦ କରିଦେଇ ଥିବାରୁ ଏପରି ସମସ୍ୟା ଉପୁଜିଛି ବୋଲି ଅଭିଯୋଗ ହେଉଛି।