ସିଙ୍ଗଡୋବ ଗ୍ରାମର ଅଙ୍ଗନବାଡ଼ି କେନ୍ଦ୍ର ନିର୍ମାଣ ବିବାଦ ଅନୁଧ୍ୟାନ କଲେ ଅଧିକାରୀ

ହାଟଡିହି (ଓ୍ବାଇଏନଏସ):  ହାଟତିହି ବ୍ଲକ ଅଧୁନସ୍ଥ ସିଙ୍ଗଡୋବ ଗ୍ରାମରେ ଅଙ୍ଗନବାଡି କେନ୍ଦ୍ର ନିର୍ମାଣକୁ ନେଇ ବିବାଦ ଦେଖାଦେଇଛି। ପୂର୍ବରୁ ୧୧ ନଂ ୱାର୍ଡରେ ଥିବା ସ୍କୁଲ ପରିସରରେ ଅଙ୍ଗନବାଡି କେନ୍ଦ୍ରଟି ଚାଲୁଥିଲା। କିନ୍ତୁ ସେଠାରେ ୧୨ନଂ ୱାର୍ଡର ଅଧିକ ଶିଶୁ ପଢୁଥିଲେ। ଏବେ ଗୃହ ନିର୍ମାଣ ପାଇଁ ସରକାର ଅନୁଦାନ ଯୋଗାଇ ଦେବା ପରେ ଅଙ୍ଗନବାଡ଼ି କେନ୍ଦ୍ର କେଉଁଠି ନିର୍ମାଣ ହେବ ତାକୁ ନେଇ ବିବାଦ ଉପୁଜିଛି। ୧୨ନଂ ୱାର୍ଡରେ ଅଧିକ ଶିଶୁ ଥିବାରୁ  ୧୨ନଂ ୱାର୍ଡରେ ଅଙ୍ଗନବାଡ଼ି କେନ୍ଦ୍ର ନିର୍ମାଣ ପାଇଁ ୱାର୍ଡ ବାସୀ ଦାବି କରୁଥିବା ବେଳେ ଦୀର୍ଘ ବର୍ଷ ଧରି ଚାଲୁଥିବା ସ୍କୁଲ ପରିସରରେ କେନ୍ଦ୍ର ନିର୍ମାଣ ହେଉ ବୋଲି ୧୧ନଂୱାର୍ଡର ବାସିନ୍ଦା ମାନେ ଦାବି କରୁଛନ୍ତି।   ଏ ନେଇ ୧୨ନମ୍ବର ୱାର୍ଡର ବାସିନ୍ଦା ମାନେ ଆନନ୍ଦପୁର ଉପଜିଲ୍ଲାପାଳ ଓ ବିଡ଼ିଓ ଙ୍କୁ ଦାବିପତ୍ର ପ୍ରଦାନ କରିବା ପରେ ଆଜି ଉପଜିଲ୍ଲାପାଳ ଙ୍କ ନିର୍ଦେଶ ଅନୁଯାଇ ହାଟଡିହି ବ୍ଲକର ବିଡ଼ିଓ ରଞ୍ଜନ କୁମାର ପରିଡା, ଅତିରିକ୍ତ ତହସିଲଦାର ପ୍ୟାରୀ ମୋହନ ହେମ୍ରମ, ସିଡିପିଓ ଉମାମଣି ମହାପାତ୍ର, ବ୍ଲକ ଶିକ୍ଷା ଅଧିକାରୀ ରାଜୀବ ଦଳେଇ ପ୍ରମୁଖ ସିଙ୍ଗଡୋବ ଗ୍ରାମକୁ ଯାଇ ଅଙ୍ଗନବାଡି କେନ୍ଦ୍ର ପରିଦର୍ଶନ କରିବା ସହିତ ଏହାର ନିର୍ମାଣ ସଂକ୍ରାନ୍ତରେ ଉଭୟ ୱାର୍ଡର ଲୋକଙ୍କ ସହିତ ଆଲୋଚନା କରିଛନ୍ତି। ବିବାଦୀୟ ପରିସ୍ଥିତି ଥିବାରୁ ଓ ଉଭୟ ପକ୍ଷ ନିଜ ନିଜ ଜିଦ ରେ ରହୁଥିବାରୁ ସରକାରଙ୍କ ଗାଇଡ଼ ଲାଇନ ଅନୁଯାଇ ନିଷ୍ପତି ନିଆଯିବ ବୋଲି ବିଡ଼ିଓ ସୂଚନା ଦେଇଛନ୍ତି।