ସମବାୟ କେନ୍ଦ୍ରବ୍ୟାଙ୍କ ଅବସରପ୍ରାପ୍ତ କର୍ମଚାରୀ ସଂଘର ବୈଠକ
ଆସିକା(ୱାଇଏନ୍ଏସ୍) : ଆସିକା ସମବାୟ କେନ୍ଦ୍ରବ୍ୟାଙ୍କ ଅବସରପ୍ରାପ୍ତ କର୍ମଚାରୀ ସଂଘର ଏକ ଜରୁରୀ ବୈଠକ ଶୁକ୍ରବାର ସ୍ଥାନୀୟ ପୁଡୁଗେଶ୍ୱରପଲ୍ଲୀ ଶୈବପୀଠ ପରିସରରେ ଅନୁଷ୍ଠିତ ହୋଇଯାଇଛି । ଆସିକା ସମବାୟ କେନ୍ଦ୍ରବ୍ୟାଙ୍କ ଅବସରପ୍ରାପ୍ତ କର୍ମଚାରୀ ସଂଘର ଉପଦେଷ୍ଟା ତଥା ମାର୍ଗଦର୍ଶକ ବରିଷ୍ଠ ଆଇନଜୀବୀ ବିଦେଶୀ ନାହାକ ଓ ସଭାପତି ଟି.ଗୋବିନ୍ଦ ରେଡିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ସଂଘର ସାଧାରଣ ସଂପାଦକ ତଥା ବରିଷ୍ଠ ନାଗରିକ ନୀଳକଣ୍ଠ ଦାଶ ଯୋଗଦେଇ ଅବସରପ୍ରାପ୍ତ କର୍ମଚାରୀମାନଙ୍କ ବହୁବିଧ ନ୍ୟାୟୋଚିତ ଦାବୀ ପୂରଣ ଲାଗି ସଂଘର ସଦସ୍ୟମାନେ ଏକମନ ଏକପ୍ରାଣରେ ହାତକୁ ହାତ ମିଶାଇ ନିଷ୍ଠାପର ଭାବେ କାମ କରି ସଂଗଠନକୁ ଆହୁରି ସୁଦୃଢ କରିବା ପାଇଁ ସମସ୍ତଙ୍କ ସହଯୋଗ କାମନା କରିଥିବା ଲକ୍ଷ୍ୟ କରାଯାଇଥିଲା । ଆସିକା ସମବାୟ କେନ୍ଦ୍ରବ୍ୟାଙ୍କ ଅବସରପ୍ରାପ୍ତ କର୍ମଚାରୀ ସଂଘର ଏହି ବୈଠକରେ ଆଇଡି କେଶ୍ର ପୁର୍ଣ୍ଣାଙ୍ଗ ରୂପରେଖ, ଗତ ୨୦୧୬ ମସିହା ଜାନୁୟାରୀ ମାସ ପହିଲାରୁ ସପ୍ତମ ବେତନ କମିଶନର ବକେୟା ପ୍ରାପ୍ୟ ପାଇବାରୁ ବଞ୍ଚିତ ହୋଇଥିବା ୨୮ ଜଣ ଅବସରପ୍ରାପ୍ତ କର୍ମଚାରୀମାନଙ୍କୁ ସେମାନଙ୍କ ବକେୟା ପ୍ରାପ୍ୟ ତୁରନ୍ତ ପ୍ରଦାନ କରିବା, ସପ୍ତମ ବେତନ କମିଶନଙ୍କ ବକେୟା ଦରମା ଉପରେ ୧୨ ପ୍ରତିଶତ ପ୍ରୋଭିଡେଣ୍ଟ ଫଣ୍ଡ ପ୍ରଦାନ କରିବା, ସପ୍ତମ ବେତନ କମିଶନଙ୍କ ଦରମାକୁ ନେଇ ପେନସନ୍କୁ ପୁନଃ ନବୀକରଣ କରିବା, ଛଟେଇ ଆଉଟସୋର୍ସିଂ ଡାଟା ଏଣ୍ଟ୍ରିଅପରେଟର ମାନଙ୍କୁ ଆସିକା ସମବାୟ କେନ୍ଦ୍ରବ୍ୟାଙ୍କରେ ପୁନଃ ନିଯୁକ୍ତି ଦେଇ ସ୍ଥାୟୀ କର୍ମଚାରୀର ମାନତ୍ୟ ପ୍ରଦାନ କରିବା, ପ୍ରାଥମିକ ସେବା ସମବାୟ ସମିତି ସ୍ତରରେ କାର୍ଯ୍ୟରତ ସମିତି ସଂପାଦକମାନଙ୍କ ଯୋଗ୍ୟତା ଓ ଅଭିଜ୍ଞତାକୁ ଆଧାର କରି ଆସିକା ସମବାୟ କେନ୍ଦ୍ରବ୍ୟାଙ୍କରେ ସ୍ଥାୟୀ ନିଯୁକ୍ତି ଦେବା, ସମିତି ପ୍ରଦାନ କରିଥିବା ବାର୍ଷିକ ବଜେଟ୍ ଅଟକଳକୁ ପୂର୍ଣ୍ଣ ସ୍ୱୀକୃତି ପ୍ରଦାନ କରିବା, ଅବସରପ୍ରାପ୍ତ ସମସ୍ତ କର୍ମଚାରୀମାନଙ୍କ ବକେୟା ପ୍ରାପ୍ୟ ତୁରନ୍ତ ପ୍ରଦାନ କରିବା, ଆସିକା ସମବାୟ କେନ୍ଦ୍ରବ୍ୟାଙ୍କର ପ୍ରାକ୍ତନ ଅବସରପ୍ରାପ୍ତ ଶାଖା ପରିଚାଳକ ନିରଞ୍ଜନ ପୃôଷ୍ଟିଙ୍କ ଉପରେ ଲାଗିଥିବା ନିଲମ୍ବନ ଆଦେଶକୁ ପ୍ରତ୍ୟାହାର କରି ତାଙ୍କର ବକେୟା ପ୍ରାପ୍ୟ ତୁରନ୍ତ ପ୍ରଦାନ କରିବା ସମେତ ବିଭିନ୍ନ ବିଷୟ ଉପରେ ପୁଙ୍ଖାନୁପୁଙ୍ଖ ଭାବେ ଆଲୋଚନା କରାଯାଇଥିବା ଲକ୍ଷ୍ୟ କରାଯାଇଥିଲା । ଆସିକା ସମବାୟ କେନ୍ଦ୍ରବ୍ୟାଙ୍କ ଲିଃ ଅବସରପ୍ରାପ୍ତ କର୍ମଚାରୀ ସଂଘର ଏହି ବୈଠକରେ ସଂଘର ସଭାପତି ଟି.ଗୋବିନ୍ଦ ରେଡି, ସାଧାରଣ ସଂପାଦକ ନୀଳକଣ୍ଠ ଦାଶ, ଉପଦେଷ୍ଟା ତଥା ମାର୍ଗଦର୍ଶକ ବିଦେଶୀ ନାହାକ, ସକ୍ରିୟ ସଦସ୍ୟ ଗଙ୍ଗାଧର ସିୟ, ପ୍ରଫୁଲ କୁମାର ଜେନା, କାମେଶ୍ୱର ରାଉତ, ପ୍ରମୋଦ କୁମାର ସ୍ୱାଇଁ, ନିରଞ୍ଜନ ପୃଷ୍ଟି, ବିଜୟ କୁମାର ସାହୁ, ପ୍ରଦୀପ କୁମାର ରଥ, ଶ୍ରୀଧର ସାହୁ, ରତିକାନ୍ତ ବସନ୍ତ କୁମାର ସାବତ, ରାଜେନ୍ଦ୍ର ସ୍ୱାଇଁ, ବିଘ୍ନରାଜ ନାୟକ, ସୁରେନ୍ଦ୍ର ମହାଙ୍କୁଡ, ଦିବାକର ପ୍ରଧାନଙ୍କ ସମେତ ବହୁ ସଦସ୍ୟ ଉପସ୍ଥିତ ଥିବା ଲକ୍ଷ୍ୟ କରାଯାଇଥିଲା ।
