ଖଲ୍ଲିକୋଟ ଏକକ ବିଶ୍ବବିଦ୍ୟାଳୟର ଯୁବୋତ୍ସବ-୨୦୨୫
ଖଲ୍ଲିକୋଟ(ଓ୍ବାଇଏନଏସ): ଓଡ଼ିଶା ସରକାରଙ୍କ କ୍ରୀଡ଼ା ଓ ଯୁଗସେବା ଦ୍ୱାରା ପ୍ରାୟୋଜିତ ବିକଶିତ ଭାରତ ଯୁବ ନେତୃତ୍ୱ ସଂଳାପ – ୨୦୨୫ ଅବସରରେ ଛତ୍ରପୁର ବିଜ୍ଞାନ ମହାବିଦ୍ୟାଳୟ ଠାରେ ଆୟୋଜିତ ଜିଲ୍ଲା ସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ କରି ଖଲ୍ଲିକୋଟ ଏକକ ବିଶ୍ବବିଦ୍ୟାଳୟର ପ୍ରତିଯୋଗୀମାନେ ୫ ଗୋଟି ପ୍ରତିଯୋଗିତାରେ ପ୍ରଥମ ସ୍ଥାନ ହାସଲ କରି ପୁରସ୍କାର ସ୍ୱରୂପ ଅର୍ଥରାଶି ଓ ପ୍ରମାଣ ପତ୍ର ଗ୍ରହଣ କରିବା ସହ ବିଶ୍ବବିଦ୍ୟାଳୟର ସୁନାମ ଅଭିବୃଦ୍ଧି କରିଛନ୍ତି । ଦଳଗତ ଲୋକନୃତ୍ୟରେ ଗଞ୍ଜାମର ଚଢ଼େୟା ନାଚ ଓ ବାଘନାଚ କରି ପ୍ରଥମ ସ୍ଥାନ ହାସଲ କରିଥିବା ପ୍ରତିଯୋଗୀମାନେ ହେଲେ ଓଡ଼ିଆ ବିଭାଗର ପ୍ରିନ୍ସ ଜେନା, ନମିତା ସେଠୀ,ଦୀପକ କୁମାର ରାଉତ,ଦୀପକ ରାଗସ୍ , ଉଦ୍ଭିଦ ବିଜ୍ଞାନ ବିଭାଗର ପ୍ରବୀଣ କୁମାର ବେହେରା ,ଶିକ୍ଷା ବିଭାଗର କେଦାର ବେହେରା ,ହିନ୍ଦୀ ବିଭାଗର ଶୁଭସ୍ମିତା ନାୟକ ,ଅର୍ଥନୀତି ବିଭାଗର ଭୁବନେଶ୍ୱର ପଣ୍ଡା ପ୍ରମୁଖ ପ୍ରଥମ ସ୍ଥାନ ହାସଲ କରିଥିଲେ। ସେହିଭଳି କବିତା ଲିଖନ ପ୍ରତିଯୋଗିତାରେ ଓଡ଼ିଆ ବିଭାଗର ସୁମନ ଦାଶ,ଗଳ୍ପ ପ୍ରତିଯୋଗିତାରେ ରସାୟନ ବିଜ୍ଞାନ ବିଭାଗର ସୌରଭକାନ୍ତ ତ୍ରିପାଠୀ , ବିତର୍କ ପ୍ରତିଯୋଗିତାରେ ପଦାର୍ଥ ବିଜ୍ଞାନ ବିଭାଗର ନିତିଜ୍ଞା କୁମାରୀ ନାୟକ ,ବିଜ୍ଞାନ ପ୍ରଦର୍ଶନୀ ରେ ବାୟୋଟେକ ବିଭାଗର ଆର୍. ଧବଳେଶ୍ବର ରେଡ୍ଡି ପ୍ରମୁଖ ପ୍ରଥମ ସ୍ଥାନ ହାସଲ କରି ବିଶ୍ୱବିଦ୍ୟାଳୟ ସମ୍ମାନ ଓ ଶ୍ରୀ ବୃଦ୍ଧି କରିଥିଲେ । ଏହି ସଫଳ ପ୍ରତିଯୋଗୀ ମାନଙ୍କୁ ଉତ୍ସାହିତ କରିବା ନିମନ୍ତେ ଆଜି ଅର୍ଥାତ ତା – ୨୯.୧୧.୨୦୨୫ ଦିନ ଖଲ୍ଲିକୋଟ ଏକକ ବିଶ୍ବବିଦ୍ୟାଳୟର ଓଡ଼ିଆ ବିଭାଗର ପାଠଚକ୍ର ପ୍ରକୋଷ୍ଠରେ ଏକ ସମ୍ବର୍ଦ୍ଧନା ସଭା କୁଳସଚିବ ଶ୍ରୀମତୀ ପାର୍ବତୀ ମଞ୍ଜରୀ ମହାଳିକଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଅନୁଷ୍ଠିତ ହୋଇଯାଇଛି । ଏହି ସମ୍ବର୍ଦ୍ଧନା ସଭାର ପୌରୋହିତ୍ୟ ସ୍ନାତକୋତ୍ତର ପରିଷଦ ଅଧ୍ୟକ୍ଷ ଡ. ମନୋଜ କୁମାର ପଟ୍ଟନାୟକ କରିଥିବା ବେଳେ , କୁଳସଚିବ ଶ୍ରୀମତୀ ପାର୍ବତୀ ମଞ୍ଜରୀ ମହାଳିକ,ଦର୍ଶନ ଶାସ୍ତ୍ର ବିଭାଗ ମୁଖ୍ୟ କ୍ୟାପଟେନ ଡ.ଯତୀନ ବିଷୋୟୀ ପ୍ରମୁଖ ମଞ୍ଚାସୀନ ଥିଲେ । ଆୟୋଜିତ କାର୍ଯ୍ୟକ୍ରମର ସଂଯୋଜନା ଅଧ୍ୟାପକ ଡ଼. ମନୋରଞ୍ଜନ ବିଷୋୟୀ କରିଥିଲେ । ମଞ୍ଚାସୀନ ଅତିଥିମାନେ ବିଶ୍ଵବିଦ୍ୟାଳୟ ପାଇଁ ସୁନାମ ଆଣିଥିବା କୃତି ପ୍ରତିଯୋଗୀମାନଙ୍କୁ ଉତ୍ସାହିତ କରିଥିଲେ । ଯୁବୋତ୍ସବ – ୨୦୨୫ ପ୍ରତିଯୋଗିତାରେ ସଫଳତା ଲାଭ କରିଥିବା ପ୍ରତିଯୋଗୀମାନେ ମଧ୍ୟ ନିଜର ଅନୁଭୂତି ପ୍ରକାଶ କରିଥିଲେ । ଆଜିର କାର୍ଯ୍ୟକ୍ରମ ଅବସରରେ ଅନୁପସ୍ଥିତ ଥିବା ଛାତ୍ରକଲ୍ୟାଣ ଅଧିକାରୀ ଡ. ଉଷାରାଣୀ ରଥ ମଧ୍ୟ ଛାତ୍ରଛାତ୍ରୀଙ୍କୁ ଉତ୍ସାହିତ କରିବା ପାଇଁ ଶୁଭେଚ୍ଛା ବାର୍ତ୍ତା ପ୍ରଦାନ କରିଥିଲେ l ଆଜିର କାର୍ଯ୍ୟକ୍ରମ ପରିଚାଳନାରେ ଡ଼. ବନମାଳୀ ପାଣିଗ୍ରାହୀ ,ଅଧ୍ୟାପିକା ସ୍ଵର୍ଣ୍ଣଲତା ବିଷୋୟୀ ପ୍ରମୁଖ ସହଯୋଗ କରିଥିଲେ । ପ୍ରତିଯୋଗିତାରେ ଅଂଶଗ୍ରହଣ ଅବସରରେ ପ୍ରତିଯୋଗୀମାନଙ୍କୁ ରାଜଶେଖର ଦୋରା , କ୍ଷିତିଜ ମିଶ୍ର ,ସରୋଜ ପ୍ରଧାନ ,ଶକ୍ତିକପୁର ବଥଲିଆ , ଅମ୍ବିକା ପ୍ରସାଦ ମହାପାତ୍ର , ରାମେଶ୍ୱରୀ ଗୌଡ଼,ମୁକ୍ତି ରାଜ ସାହୁ ପ୍ରମୁଖ ଛାତ୍ରଛାତ୍ରୀ ସହଯୋଗ କରିଥିଲେ ।


