ମହିଳା ଜେଲରଙ୍କ ଅଭିଯୋଗରେ ଜେଲ୍ ଡିଜି ସୁଶାନ୍ତ ନାଥଙ୍କ ନାମରେ ମାମଲା

କଟକ, (ଓ୍ବାଇଏନଏସ) : ଓଡ଼ିଶା ଜେଲ୍ ବିଭାଗର ମହାନିର୍ଦ୍ଦେଶକ (ଡିଜି) ସୁଶାନ୍ତ କୁମାର ନାଥଙ୍କ ବିରୋଧରେ ଜଣେ ପୂର୍ବତନ ମହିଳା ଜେଲରଙ୍କ ଅଭିଯୋଗକୁ ଆଧାର କରି ପୁଲିସ ଏକ ଅପରାଧିକ ମାମଲା ରୁଜୁ କରିଛି। ଯୌନ ନିର୍ଯାତନା, ଧମକ ଦେବା ଏବଂ ବ୍ୟକ୍ତିଗତ ଭାବେ ସାକ୍ଷାତ କରିବାକୁ ମନା କରିବା ପରେ ପ୍ରତିଶୋଧମୂଳକ ପଦକ୍ଷେପ ନିଆଯାଇଥିବା ନେଇ ଅଭିଯୋଗ ହୋଇଛି। ଏହି ଘଟଣାରେ ଚୌଦ୍ୱାର ଥାନା ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।

ଚୌଦ୍ୱାର ସର୍କଲ ଜେଲ୍‌ର ପୂର୍ବତନ ଜେଲର ସନ୍ତୋଷିନୀ ଦାଶ ଗତ ଅକ୍ଟୋବର ୩୧ ତାରିଖରେ ଚୌଦ୍ୱାର ଥାନାରେ ଲିଖିତ ଅଭିଯୋଗ କରିଥିଲେ। ଏହାକୁ ଆଧାର କରି ଚୌଦ୍ୱାର ଥାନା କେସ୍ ନମ୍ବର ୭୧୩ରେ ଭାରତୀୟ ନ୍ୟାୟ ସଂହିତା (ବିଏନ୍‌ଏସ୍‌)ର ଧାରା ୭୫(୨), ୩୫୧(୨) ଓ ୩(୫) ଅନୁଯାୟୀ ମାମଲା ରୁଜୁ ହୋଇଛି। ଥାନା ଅଧିକାରୀ ବିକାଶ ସେଠୀ ଏହାର ତଦନ୍ତ କରୁଛନ୍ତି।

ବ୍ୟକ୍ତିଗତ ସାକ୍ଷାତ ପାଇଁ ଚାପ ଦେବାର ଅଭିଯୋଗ

ଅଭିଯୋଗ ଅନୁଯାୟୀ, ୨୦୨୫ ମସିହା ମଧ୍ୟଭାଗରେ ଜେଲ୍ ନିରୀକ୍ଷଣ ପରେ ଏହି ଘଟଣାକ୍ରମ ଆରମ୍ଭ ହୋଇଥିଲା। କୁଲଦୀପ ରଥ ନାମକ ଜଣେ ବ୍ୟକ୍ତି ନିଜକୁ ଜେଲ୍ ଡିଜିଙ୍କ ସହଯୋଗୀ ବା ବନ୍ଧୁ ଭାବେ ପରିଚୟ ଦେଇ ତାଙ୍କ ମୋବାଇଲ୍ ନମ୍ବର ସଂଗ୍ରହ କରିଥିବା ସନ୍ତୋଷିନୀ ଅଭିଯୋଗ କରିଛନ୍ତି। ପରେ ତାଙ୍କୁ ଇଙ୍ଗିତପୂର୍ଣ୍ଣ ଇମୋଜି ଥିବା ବାର୍ତ୍ତା ପଠାଯାଇଥିବା ମଧ୍ୟ ସେ ଦର୍ଶାଇଛନ୍ତି। ଅଭିଯୋଗରେ କୁହାଯାଇଛି ଯେ, ୨୦୨୫ ଅଗଷ୍ଟ ୨୯ ତାରିଖରେ ‘ବ୍ଲାଷ୍ଟ’ ନାମକ ଏକ ରେସ୍ତୋରାଁକୁ ଏବଂ ସେହି ବର୍ଷ ସେପ୍ଟେମ୍ବର ୨୫ କିମ୍ବା ୨୬ ତାରିଖରେ ହୋଟେଲ ପ୍ରମୋଦକୁ ରାତ୍ରିଭୋଜନ ପାଇଁ ଆମନ୍ତ୍ରଣ କରାଯାଇଥିଲା। ଉଭୟ ଅବସରରେ ଡିଜି ତାଙ୍କୁ ବ୍ୟକ୍ତିଗତ ଭାବେ ଭେଟିବାକୁ ଚାହୁଁଥିବା କୁହାଯାଇଥିବା ସେ ଅଭିଯୋଗ କରିଛନ୍ତି। କିନ୍ତୁ ସରକାରୀ କାର୍ଯ୍ୟାଳୟ ବାହାରେ ବ୍ୟକ୍ତିଗତ ସାକ୍ଷାତ କରିବାକୁ ସେ ମନା କରିଥିବା ଦର୍ଶାଇଛନ୍ତି।

ନିଲମ୍ବନ ଓ ବିଭାଗୀୟ ତଦନ୍ତକୁ ନେଇ ପ୍ରଶ୍ନ

ବ୍ୟକ୍ତିଗତ ସାକ୍ଷାତ ପ୍ରସ୍ତାବକୁ ପ୍ରତ୍ୟାଖ୍ୟାନ କରିବା ପରେ ନିଜ ବିରୋଧରେ ବିଭିନ୍ନ ପ୍ରଶାସନିକ ପଦକ୍ଷେପ ନିଆଯାଇଥିବା ସନ୍ତୋଷିନୀ ଅଭିଯୋଗ କରିଛନ୍ତି। ୨୦୨୬ ଫେବ୍ରୁଆରୀ ୧୯ରେ ତାଙ୍କୁ ନିଲମ୍ବନ କରାଯିବା, ଦରମା ଓ ନିର୍ବାହ ଭତ୍ତା ବନ୍ଦ କରିବା ସହ ପାଞ୍ଚଟି ବିଭାଗୀୟ କାର୍ଯ୍ୟାନୁଷ୍ଠାନ ଆରମ୍ଭ କରାଯାଇଥିବା ସେ ଦାବି କରିଛନ୍ତି।

ସେପ୍ଟେମ୍ବର ୭ ଓ ୮ ତାରିଖରେ ହୋଇଥିବା ବୈଠକ ସମୟରେ ସୁଶାନ୍ତ ନାଥ ତାଙ୍କୁ ବ୍ୟକ୍ତିଗତ ଭାବେ ଭେଟିଥିଲେ ଏପରି ପରିସ୍ଥିତି ଉପୁଜି ନଥାନ୍ତା ବୋଲି କହିଥିବା ମହିଳା ଜେଲର ଅଭିଯୋଗରେ ଉଲ୍ଲେଖ କରିଛନ୍ତି। ଏହି ମନ୍ତବ୍ୟକୁ ସେ ନିଜ ବିରୋଧରେ ନିଆଯାଇଥିବା ପ୍ରଶାସନିକ ପଦକ୍ଷେପ ସହ ଯୋଡ଼ିଛନ୍ତି।

ପୁରୁଣା ଏତଲା ପ୍ରତ୍ୟାହାର ପାଇଁ ଚାପ ଅଭିଯୋଗ

ଏହି ଅଭିଯୋଗରେ ଆଉ ଏକ ପୁରୁଣା ମାମଲାର ପ୍ରସଙ୍ଗ ମଧ୍ୟ ଉଠାଯାଇଛି। ତତ୍କାଳୀନ ବରିଷ୍ଠ ଅଧୀକ୍ଷକ ସୁଜିତ କୁମାର ରାଉଳାଙ୍କ ବିରୋଧରେ ସନ୍ତୋଷିନୀ ଦାଶ ଏଫ୍‌ଆଇଆର୍ ନମ୍ବର ୩୫/୨୦୨୫ ରୁଜୁ କରିଥିଲେ। ଜେଲ୍‌ରୁ କଏଦୀ ଫେରାର ଘଟଣା ସହ ସମ୍ପୃକ୍ତ ସରକାରୀ ରେକର୍ଡରେ ଜାଲିଆତି ଏବଂ ତାଙ୍କ ଦସ୍ତଖତ ଜାଲ୍ କରାଯାଇଥିବା ନେଇ ସେ ଅଭିଯୋଗ କରିଥିଲେ। ପରବର୍ତ୍ତୀ ସମୟରେ ଉକ୍ତ ଏତଲା ପ୍ରତ୍ୟାହାର କରିବା ପାଇଁ ଡିଜି ତାଙ୍କ ଉପରେ ଚାପ ପକାଇଥିବା ସେ ଦାବି କରିଛନ୍ତି। ଏଥିରେ ରାଜି ନହେଲେ ଚାକିରିରୁ ବହିଷ୍କାର, ନିମ୍ନ ପଦବିକୁ ଅବନତି ଏବଂ ଶାରୀରିକ କ୍ଷତି ପହଞ୍ଚାଇବାର ଧମକ ମିଳିଥିବା ମଧ୍ୟ ଅଭିଯୋଗ ହୋଇଛି।