ଅସ୍ଥିତ୍ଵ ହରାଇବାକୁ ବସିଛି ନନ୍ଦିପଦା ହାଟ
ହାଟଡ଼ିହି,(ଓ୍ବାଇଏନଏସ): କେନ୍ଦୁଝର ଜିଲ୍ଲାର ଶେଷ ସ୍ଥଳରେ ଅବସ୍ଥିତ ଅଛି ସର୍ବ ପୁରାତନ ନନ୍ଦିପଦା ହାଟ । ସମୟଚକ୍ରରେ ଅସ୍ଥିତ୍ଵ ହରାଇବାକୁ ବସିଲାଣି ନନ୍ଦିପଦା ଓ ବସନ୍ତିଆ ଗ୍ରାମର ଶେଷ ସୀମାରେ ଥିବା ଏହି ହାଟ l ୧୯୬୬ ମସିହାରେ ବସନ୍ତିଆ ଗ୍ରାମର ସମାଜସେବୀ ସ୍ବର୍ଗତ କପିଳ ପାଣିଗ୍ରାହୀଙ୍କ ଉଦ୍ୟମ ଏବଂ ସ୍ଥାନୀୟ ଜନସାଧାରଣଙ୍କ ସହଯୋଗରେ ନନ୍ଦିପଦା ହାଟ ସ୍ଥାପିତ ହୋଇଥିଲା । ଯାହା ସମୟକ୍ରମେ ବସନ୍ତିଆ ହାଟ ନାମରେ ପରିଚିତ ହୋଇଛି। ବସନ୍ତିଆ ପଞ୍ଚାୟତର ତତ୍କାଳୀନ ଆନନ୍ଦପୁର-ଭଦ୍ରକ ମୁଖ୍ୟ ରାସ୍ତାର ଦକ୍ଷିଣ ପାର୍ଶ୍ବ ସ୍ଥିତ ୪ଏକର ୪୨ଡ଼େସିମିଲ ଜମି ଉପରେ ଏହି ହାଟ ଅବସ୍ଥିତ । ଏହା ୫୩ନଂ ଆନନ୍ଦପୁର- ଭଦ୍ରକ ରାଜ୍ୟ ରାଜପଥ ପାର୍ଶ୍ଵରେ ଅବସ୍ଥିତ l ହାଟ ଆରମ୍ଭରୁ ପ୍ରାୟ ୩ଟି ଜିଲ୍ଲା କେନ୍ଦୁଝର, ଭଦ୍ରକ ଓ ମୟୂରଭଞ୍ଜର ବିଭିନ୍ନ ଗ୍ରାମବାସୀ ଏହା ଉପରେ ନିର୍ଭର କରୁଥିଲେ। ବର୍ତ୍ତମାନ ପ୍ରତି ଗ୍ରାମରେ ବ୍ୟବସାୟିକ କେନ୍ଦ୍ର ସ୍ଥାପିତ ହେବାରୁ ତାହା ସୀମିତ ହୋଇଯାଇଛି । ଏହାର ଗୋଟିଏ ପାର୍ଶ୍ବ କେନ୍ଦୁଝର ଜିଲ୍ଲାର ଓରାଳି, ଶାଳଣିଆଁ, ଡ଼ଅଁର ସହିତ ସଂଯୁକ୍ତ ହୋଇଥିବା ବେଳେ ମୁଖ୍ୟରାସ୍ତାରେ ମରୈଗାଁ, ହାଟଡ଼ିହି ଓ ଛେନାପଦି, ବଞ୍ଚୋ ଦେଇ ଆନନ୍ଦପୁର ପର୍ଯ୍ୟନ୍ତ ସଂଯୁକ୍ତ । ଭଦ୍ରକ ଜିଲ୍ଲାର ସିଲନ୍ଦି, ଅଡାଳପଙ୍କ, ଆଡ଼ିଆ ଦେଇ ଆଗରପଡ଼ା ଯାଏଁ ସଂଯୁକ୍ତ l ଓରାଳି ପଞ୍ଚାୟତର ନନ୍ଦିପଦା ଗ୍ରାମ ଅଧୀନସ୍ଥ ଏହି ହାଟଟିର ଭୌଗଳିକ ସ୍ଥିତି ବସନ୍ତିଆ ବଜାର ମଧ୍ଯରେ ଅବସ୍ଥିତ। ତେଣୁ ଓରାଳି ପଞ୍ଚାୟତରୁ ଜଣକୁ ନିଲାମ ମାଧ୍ୟମରେ ହାଟଦାଣ୍ଡିଆ ଭାବେ ଚୟନ କରିବାର ପରମ୍ପରାରହି ଆସିଛି । ସେତେବେଳେ ମାତ୍ର ୨୦ଟଙ୍କାରେ ଏକ ବର୍ଷ ପାଇଁ ହାଟ ନିଲାମ ହେଉଥିଲା । ବର୍ତ୍ତମାନ ଏହା ୨୨ହଜାର ଟଙ୍କା ସରକାରୀ ମୂଲ୍ୟରେ ହେଉଥିବା ଜଣାଯାଇଛି । ବର୍ଷାଦିନେ ହାଟ ଭିତରଟା ପାଣି କାଦୁଅରେ ପଚପଚ ହୋଇ ଯାଇଥାଏ l ଉଭୟ ବ୍ୟବସାୟୀ ଓ ଗ୍ରାହକ ମାନେ ହାଟର କଦର୍ଯ୍ୟ ଓ ପରିତ୍ୟକ୍ତ ଅବସ୍ଥା ପାଇଁ ମୁହଁ ଫେରାଇ ନେଉଛନ୍ତି l ସରକାରଙ୍କ ଦ୍ଵାରା ଏହାକୁ ପକ୍କାଗୃହ, ଆଲୋକୀକରଣ, ପାନୀୟଜଳ, ସାଇକେଲ ଓ ବାଇକ ଷ୍ଟାଣ୍ଡ ଆଦିର ସୁବିଧା କରାଗଲେ ବ୍ୟବସାୟିକ କ୍ଷେତ୍ରରେ ଉନ୍ନତି ହୁଅନ୍ତା l ହାଟର ଉନ୍ନତିକରଣ ବ୍ୟବସ୍ଥା ପାଇଁ ପ୍ରସ୍ତାବ ହୋଇଥିବା ବେଳେ ଏଯାଏଁ ଏହାର ସାମାନ୍ୟ ପରିବର୍ତ୍ତନ ହୋଇନି । ଫଳରେ ଏହାର ଆକାର କ୍ରମଶଃ ସ୍ଵଳ୍ପ ହେବା ସହ ସରକାରଙ୍କ ଦୃଷ୍ଟି ଆଢୁଆରେ ଏହା ଲୁଚି ଯାଉଥିବାରୁ ଏହାର ଅସ୍ଥିତ୍ବ ଦିନକୁ ଦିନ ହଜିବାକୁ ବସିଛି । ଏହାକୁ ନୂତନ ଭାବେ ନିର୍ମାଣ କରାଯାଇ ପାରିଲେ ଏହାର ପୂର୍ବ ଅବସ୍ଥା ଫେରିବା ସହ ଏହି ହାଟ ଉପରେ ନିର୍ଭର କରୁଥିବା ବ୍ୟବସାୟୀ ଓ ଗ୍ରାହକ ମାନେ ନିଜର ଜୀବନ ଆଉ ଜୀବିକାକୁ ଭଲ ଭାବରେ ନିର୍ବାହ କରିପାରନ୍ତେ ଏବଂ ସମୟ ଚକ୍ରରେ ହଜିବାକୁ ବସିଥିବା ହାଟ ପରମ୍ପରା ଉଜ୍ଜୀବିତ ହୋଇପାରନ୍ତା ବୋଲି ବୁଦ୍ଧିଜୀବୀ ମାନେ ମତ ପ୍ରକାଶ କରିଛନ୍ତି l
