ସୁପ୍ରିମକୋର୍ଟଙ୍କ ଛାଟ
୨୦୨୧ରେ ବୁଲଡୋଜର ଲଗାଇ ବାସଗୃହ ଭଙ୍ଗାଯାଇଥିବା ବିପନ୍ନମାନଙ୍କୁ ୧୦ଲକ୍ଷ ଟଙ୍କା ଲେଖାଁଏ କ୍ଷତିପୂରଣ ଦେବା ଲାଗି ପ୍ରୟାଗରାଜ ଉନ୍ନୟନ କର୍ତ୍ତୃପକ୍ଷଙ୍କୁ ସୁପ୍ରିମକୋର୍ଟଙ୍କ ନିର୍ଦ୍ଦେଶ ତଥାକଥିତ ବୁଲଡୋଜର ନ୍ୟାୟା ପ୍ରତି ଏକ ବଡ ଚେତାବନୀ ବୋଲି କୁହାଯାଇପାରିବ। ଆଇନ ଠାରୁ କେହି ଉର୍ଦ୍ଧ୍ୱରେ କୁହଁନ୍ତି, ସୁପ୍ରିମକୋର୍ଟଙ୍କ ନିର୍ଦ୍ଦେଶ ଏହି ସ୍ପଷ୍ଟ ବାର୍ତା ଦେଇଛି। ତଥାକଥିତ ବୁଲଡୋଜର ନ୍ୟାୟା ଚଳାଇଥିବା ରାଜ୍ୟ ସରକାର, ଉନ୍ନୟନ କର୍ତୁପକ୍ଷ ଏବଂ ପୌରପାଳିକାଗୁଡିକ ସୁପ୍ରିମକୋର୍ଟ ଅତୀତରେ ଜାରି କରିଥିବା ମାର୍ଗଦର୍ଶିକା (ଗାଇଡଲାଇନ) ପ୍ରତି ଧ୍ୟାନ ଦେବା ଉଚିତ୍, ଏହି ସନ୍ଦେଶ ଦେଇଛି। ଉଲ୍ଲେଖ କରାଯାଇପାରେ ଯେ, ଗତ ନଭେମ୍ବରରେ ସୁପ୍ରିମକୋର୍ଟ ଜାରି କରିଥିବା ମାର୍ଗଦର୍ଶିକାରେ ଉଚ୍ଛେଦ ପୂର୍ବରୁ ସମ୍ପୃକ୍ତ ବ୍ୟକ୍ତି ଦୁଇ ସପ୍ତାହ ପୂର୍ବରୁ ନୋଟିସ ଦେବା ସହ ନିଜର ପକ୍ଷ ରଖିବା ପାଇଁ ଆଇନଗତ ଲଢେଇ ଲାଗି ସୁଯୋଗ ଦେବା, ଆଦି ନିର୍ଦ୍ଦେଶ ଅର୍ନ୍ତଭୁକ୍ତ ଥିଲା। ଏହା ବ୍ୟତୀତ ପୌରପାଳିକା, ସ୍ଥାନୀୟ କର୍ତୁପକ୍ଷ ନିଜର ଅନଲାଇନ ପୋର୍ଟାଲରେ ଏନେଇ ବିସ୍ତୃତ ବିବରଣୀ ଦେବା, ନୋଟିସର ଉତର ଲାଗି ଦୁଇ ସପ୍ତାହ ତଥା ୧୫ଦିନ ସମୟ ଦେବା ଆଦି ନିର୍ଦ୍ଦେଶ ଦେଇଥିଲେ। ଏହି ମାର୍ଗଦର୍ଶିକାରେ ଉଲଂଘନ ଅଦାଲତ ଅବମାନନା ସଦୃଶ ହେବ ଏବଂ ଦୋଷୀ ଅଧିକାରୀଙ୍କ ବିରୁଦ୍ଧରେ ମାମଲା ରୁଜୁ ଲାଗି ଚେତାବନୀ ଦେଇଥିଲେ। କେବଳ ଏତିକି ନୁହେଁ, ଉଚ୍ଛେଦ ନିର୍ଦ୍ଦେଶନା ଜାରି କରିଥିବା ଅଫିସରଙ୍କ ଠାରୁ ଉଚ୍ଛେଦ ସମ୍ପତିର ମୂଲ୍ୟ ଆଦାୟ ହେବ। କହିବା ଯଥାର୍ଥ ଯେ, ପ୍ରୟାଗରାଜ ଉଚ୍ଛେଦ ଏବେ ସୁପ୍ରିମକୋର୍ଟଙ୍କ ନିର୍ଦ୍ଦେଶର ଏକ ଜ୍ୱଳନ୍ତ ଉଦାହରଣ ବୋଲି କୁହାଯିବ। ଉଲ୍ଲେଖଯୋଗ୍ୟ ଯେ, ବେଆଇନ ଭାବେ ତଥା ସରକାରୀ ଜମିରେ ଗଢିଉଠିଥିବା କୋଠାଗୁଡିକୁ କେବଳ ତଥାକଥିତ ବୁଲଡୋଜର ନ୍ୟାୟାରେ ଭଙ୍ଗାଯାଉନାହିଁ, ଯେକୌଣସି ଅପରାଧରେ ସମ୍ପୃକ୍ତ ବ୍ୟକ୍ତିଙ୍କୁୁ ବାସଭବନକୁ ସରକାର ମାଟିରେ ମିଶାଇ ଦେଉଛନ୍ତି। ବଳାତ୍କାର ହେଉ ବା ହଂସାକାଣ୍ଡ ହେଉ ସମ୍ପୃକ୍ତ ଅପରାଧିର ଘରକୁ ଭାଙ୍ଗି ଦିଆଯିବା ଏବେ ଏକ ନିୟମିତ ଘଟଣାରେ ପରିଣତ ହୋଇଥିବା ମନେହଏ। ସାମ୍ପ୍ରଦାୟିକ ଉତେଜନା କିମ୍ବା ହିଂସାକାଣ୍ଡରେ ସମ୍ପୃକ୍ତ ଥିବା ଅଭିଯୋଗରେ ସେମାନଙ୍କ ବାସଗୃହ ଭାଙ୍ଗି ଦିଆଯାଇଥିବା ବହୁ ପିଟିସନକାରୀ ଦର୍ଶାଇଛନ୍ତି। ୨୦୨୧ ପ୍ରୟାଗରାଜ ମାମଲାରେ ସେହିଦିନ ଅର୍ଥାତ ମାର୍ଚ୍ଚ ୨୪ ତାରିଖ ଦିନ ସୁପ୍ରିମକୋର୍ଟ ପ୍ରତିକ୍ରିୟା ପ୍ରକାଶ କରି ବିବେକହୀନତାର ପରିଚାୟକ ବୋଲି ଦର୍ଶାଇଥିଲେ। ଏହ ମାମଲାରେ ବିଚାରପତି ଅଭୟ ଏସଓକା ଏବଂ ବିଚାରପତି ଉଜ୍ଜଳ ଭୂୟାଁଙ୍କୁ ନେଇ ଗଠିତ ଖଣ୍ଡପୀଠ ଉତରପ୍ରଦେଶର ଯୋଗୀ ଆଦିତ୍ୟନାଥ ସରକାର ଓ ଉନ୍ନୟନ କର୍ତୁପକ୍ଷଙ୍କୁ କଠୋର ଭାଷାରେ ଭର୍ତ୍ସନା କରିବା ସହ ନାଗରିକଙ୍କ ବାସଭବନ ମାଟିରେ ମିଶାଇ ଦେବା ଅମାନବୀୟ ଓ ବେଆଇନ ବୋଲି କହିଛନ୍ତି। ଭଙ୍ଗାଯାଇଥିବା ୬ଜଣ ଆବେଦନକାରୀଙ୍କୁ ୬ ସପ୍ତାହ ମଧ୍ୟରେ ପ୍ରତ୍ୟେକଙ୍କୁ ୧୦ଲକ୍ଷ ଟଙ୍କା ଲେଖାଁଏ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି। ଅଦାଲତ ତାଙ୍କ ରାୟରେ ଦର୍ଶାଇଛନ୍ତି ଯେ, ସମ୍ବିଧାନର ଧାରା ୨୧ରେ ପ୍ରତ୍ୟେକ ନାଗରିକଙ୍କର ଆଶ୍ରୟ ପାଇବାର ଅଧିକାର ରହିଛି। ଉଲ୍ଳେଖଯୋଗ୍ୟ ଯେ, ଆଦିତ୍ୟ ନାଥ ଯୋଗୁଁ ଉତରପ୍ରଦେଶରେ ପ୍ରଥମ ଥର ଲାଗି ଏହି ତଥାକଥିତ ବୁଲଡୋଜର ନ୍ୟାୟା କାର୍ଯ୍ୟକାରୀ କରିଥିବାବେଳେ ଏଥିରେ ଉଦବୁଦ୍ଧ ହୋଇ ମଧ୍ୟଦେଶ, ମହାରାଷ୍ଟ୍ର, ରାଜସ୍ଥାନ ସରକାର ବୁଲଡୋଜର ନ୍ୟାୟା କାର୍ଯ୍ୟକାରୀ କରିଥିଲେ। ଏଥିରେ ସଂଖ୍ୟାଧିକ ମୁସଲିମ ସମ୍ପ୍ରଦାୟ ବ୍ୟକ୍ତି ବିଶେଷ କ୍ଷତିଗ୍ରସ୍ତ ହୋଇଥିବା କୁହାଯାଏ। ଦେଶରେ ଏଭଳି ତଥାକଥିତ ନ୍ୟାୟା କାର୍ଯ୍ୟାନୁଷ୍ଠାନ ଘଟଣା ବୃଦ୍ଧି ପାଇବା ପରେ ଗତ ନଭେମ୍ବର ମାସରେ ସୁପ୍ରିମକୋର୍ଟ ଏହାକୁ ଉଦ୍ଧତ ପଣିଆ ବୋଲି ଦର୍ଶାଇବା ସହ ସମବିଧାନର ୧୪୨ ଧାରା ଅନୁଯାୟୀ ନିଜ କ୍ଷମତାର ପ୍ରୟୋଗ କରି ଗାଇଡଲାଇନ ଜାରି କରିଥିଲେ। ଯାହାଫଳରେ କୌଣସି ସରକାରୀ ଅଫିସର ଉଦ୍ଧତ ପଣିଆ, ସ୍ୱେଚ୍ଛାଚାରୀ, ଏବଂ ବାଛବିଚାର ମୂଳକ କାର୍ଯ୍ୟରୁ କ୍ଷାନ୍ତ ହେବେ। କହିବା ବାହୁଲ୍ୟ ଯେ, ସୁପ୍ରିମକୋର୍ଟଙ୍କ ଗାଇଡଲାଇନ ସତ୍ୱେ ଉତରପ୍ରଦେଶ ସରକାର ଏହାକୁ ଉପେକ୍ଷା କରିଆସିଛନ୍ତି। ଏପରିକି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥ ତଥାକଥିତ ବୁଲଡୋଜର ନ୍ୟାୟା ଔଚିତ୍ୟ ପ୍ରଶ୍ନାତୀତ ବୋଲି ବାରମ୍ବାର କହିଛନ୍ତି। ଅନ୍ୟପକ୍ଷରେ ବହୁ ରାଜ୍ୟ ସରକାର ଗାଇଡଲାଇନ ଗ୍ରହଣ କରିଥିବାବେଳେ ଯେଉଁମାନେ ଚଙ୍କୁ ଉପେକ୍ଷା କରିଆସୁଛନ୍ତି, ନିଶ୍ଚିତ ଭାବେ ନିନ୍ଦନୀୟ ଏବଂ ଆଇନର କାର୍ଯ୍ୟାନୁଷ୍ଠାନ ଆବଶ୍ୟକତା କରେ।
ସୌଭାଗ୍ୟ ରଂଜନ ମହାନ୍ତି(ରାଜା),
ସମ୍ମାନ ଭବନ,
ପ୍ଲଟ ନଂ-୫୮/୩୫୮୧, ଗାଙ୍ଗୋତ୍ରୀ ନଗର,
ରୋଡ ନଂ-୩, ଶିଶୁପାଳଗଡ,-୭୫୧୦୦୨
ମୋବାଇଲ ନଂ-୭୯୭୮୬୬୬୪୦୩
