ଆନନ୍ଦମାର୍ଗ ପ୍ରଚାର ସଂଘ ମହିଳା ବିଭାଗ କାର୍ଯ୍ୟାଳୟ ଉଦଘାଟିତ

ବାଲେଶ୍ୱର, (ସରୋଜ ପଣ୍ଡା):ଆନନ୍ଦମାର୍ଗ ପ୍ରଚାର ସଂଘ, ମହିଳା ବିଭାଗ କାର୍ଯ୍ୟାଳୟ ବାଲେଶ୍ୱର ସହର ଉପକଣ୍ଠ ଶ୍ରୀକଣ୍ଠପୁର କିଆଗୋହିରୀଠାରେ ଗୁରୁବାର ଉଦଘାଟିତ ହୋଇଯାଇଛି । ଏ ଅଞ୍ଚଳର ମହିୟସୀ ମହିଳା କବିତା ନାୟକଙ୍କ ଦାନରୁ ଏହି କାର୍ଯ୍ୟାଳୟ ପ୍ରତିଷ୍ଠା ହୋଇଛି ବୋଲି ସଂଘର କର୍ମକର୍ତ୍ତାମାନେ ସୂଚନା ଦେଇଛନ୍ତି । ଆଗାମୀ ଦିନରେ ଅବହେଳିତ ମହିଳାଙ୍କ ପାଇଁ ଏକ ଜରାନିବାସ, ଅବହେଳିତ ଶିଶୁକନ୍ୟାଙ୍କ ପାଇଁ କନ୍ୟା ସଦନ, ଏକ ଦାତବ୍ୟ ଚିକିତ୍ସାଳୟ ଓ ମହିଳାଙ୍କୁ ସ୍ୱାବଲମ୍ବୀ କରିବାକୁ ଏଠାରେ ଏକ ଦକ୍ଷତା ବିକାଶ ପ୍ରଶିକ୍ଷଣ କେନ୍ଦ୍ର ପ୍ରତିଷ୍ଠା ଯୋଜନା ରହିଛି ବୋଲି ପ୍ରଚାର ସଂଘ ପକ୍ଷରୁ ଜଣାପଡ଼ିଛି । ସ୍ୱାମୀ ଓ ପୁତ୍ରଙ୍କ ବିୟୋଗ ପରେ ଏହି ଗୃହ ସାଧାରଣ ଲୋକଙ୍କ ସେବା ପାଇଁ ସେ ଆନନ୍ଦମାର୍ଗ ପ୍ରଚାର ସଂଘକୁ ଦାନ କରିଥିବା ଶ୍ରୀମତୀ ନାୟକ ସୂଚନା ଦେଇଛନ୍ତି । ଏହି ଗୃହ ସମସ୍ତଙ୍କ କାର୍ଯ୍ୟରେ ଆସିଲେ ସେ ଆତ୍ମ ସନ୍ତୋଷ ପାଇବା ସହ ପରଲୋକ ଗତ ତାଙ୍କ ସ୍ୱାମୀ ଓ ପୁତ୍ରଙ୍କ ଆତ୍ମାକୁ ଶାନ୍ତି ମିଳିବ ବୋଲି ସେ ମତ ଦେଇଛନ୍ତି । ନୂତନ କାର୍ଯ୍ୟାଳୟକୁ ଆନନ୍ଦମାର୍ଗ ପ୍ରଚାର ସଂଘର କେନ୍ଦ୍ରୀୟ ସମ୍ପାଦକ ଆଚାର୍ଯ୍ୟ ସୁତୀର୍ଥାନନ୍ଦ ଅବଧୂତ ଉଦଘାଟନ କରିଥିଲେ । ଅବହେଳିତ ମହିଳାଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ ପାଇଁ ଏହି କାର୍ଯ୍ୟାଳୟ ନୂଆ ଠିକଣା ହେବ ବୋଲି ସେ ଆଶା ପ୍ରକାଶ କରିଥିଲେ । ଏହି ଅବସରରେ ଆୟୋଜିତ ଧର୍ମସଭାରେ ଯୋଗଦେଇ ସାମାଜିକ ଜୀବନରେ ଆଧ୍ୟାତ୍ମିକତା ଓ ମାନବ ଦର୍ଶନର ଗୁରୁତ୍ୱ ସମ୍ପର୍କରେ ସେ ଆଲୋଚନା କରିଥିଲେ । ଆନନ୍ଦମାର୍ଗ ପ୍ରଚାର ସଂଘର ଜିଲା ସଭାପତି ଡ. ଭାସ୍କର ଚନ୍ଦ୍ର ଜେନାଙ୍କ ସଭାପତିତ୍ୱରେ ଆୟୋଜିତ କାର୍ଯ୍ୟକ୍ରମରେ ଆଚାର୍ଯ୍ୟ ସୁଧାତ୍ମନନନ୍ଦ ଅବଧୂତ, ଆଚାର୍ଯ୍ୟ ସତ୍ୟସୁଧାନନ୍ଦ ଅବଧୂତ, ଅବଧୂତିକା ଆନନ୍ଦ ଅଭିସା ଆଚାର୍ଯ୍ୟା, ଅବଧୂତିକା ରୂପାଚିତା ଆଚାର୍ଯ୍ୟା ଓ ରେଣୁକା ବ୍ରହ୍ମଚାରିଣୀ ପ୍ରମୁଖ ଏଥିରେ ଯୋଗଦେଇ ଆଧ୍ୟାତ୍ମିକବାଦର ବିଭିନ୍ନ ଦିଗ ଉପରେ ଆଲୋଚନା କରିଥିଲେ । ଗୟାଧର ବେହେରା, ତୁରୁଲତା ଜେନା, ଭୂପେନ୍ଦ୍ର କୁମାର, ପ୍ରମୋଦ କୁମାର ବେହେରା, ପ୍ରଫୁଲ୍ଲ ବେହେରା ପ୍ରମୁଖ ସଂଘର କାର୍ଯ୍ୟକର୍ତ୍ତାମାନେ ଏହି ଉଦଘାଟନୀ କାର୍ଯ୍ୟକ୍ରମ ପରିଚାଳନାରେ ସକ୍ରିୟ ସହଯୋଗ କରିଥିଲେ ।