ସଂଗ୍ରାମୀ ପର୍ଶୁରାମଙ୍କୁ ଉତ୍କଳ ଗୌରବ ସମ୍ମାନ
ଭୁବନେଶ୍ୱର, (ଯୁଗାବ୍ଦ ନ୍ୟୁଜ) :-ସମଗ୍ର ଓଡ଼ିଆଙ୍କ ଆଜିର ଗର୍ବ ଓ ଗୌରବ ଚିରବନ୍ଦନୀୟ ପ୍ରାତଃ ସ୍ମରଣୀୟ, ମହାନ ସ୍ୱାଧୀନତା ସଂଗ୍ରାମୀ ଉତ୍କଳ ଗୌରବ ମଧୁସୁଦନ ଦାସଙ୍କ ୮୮ତମ ଶ୍ରାଦ୍ଧ ଦିବସ ତାଙ୍କ ପ୍ରତିମୂର୍ତି ସ୍ଥଳ ରାଜଭବନ ସମ୍ମୁଖରେ ପୁଷ୍ପମାଲ୍ୟ ଅର୍ପଣ ସହ ଏକ ସ୍ମୃତିଚାରଣ ସଭା ପୂଜ୍ୟପୂଜା ସଂସ୍କୃତି ସୁରକ୍ଷା ଅଭିଯାନ ପକ୍ଷରୁ ଅନୁଷ୍ଠିତ ହୋଇଯାଇଛି । ଉକ୍ତ କାର୍ଯ୍ୟକ୍ରମରେ ବରିଷ୍ଠ ସାମ୍ବାଦିକ ତଥା ଅଭିଯାନର ଅଧ୍ୟକ୍ଷ ପ୍ରଦ୍ୟୁମ୍ନ ଶତପଥୀ ସ୍ମୃତିଚାରଣ ପୂର୍ବକ ମତବ୍ୟକ୍ତ କରିଥିଲେ ଯେ, ଉତ୍କଳ ଗୌରବ ମଧୁସୁଦନ ଦାସ ଥିଲେ ଓଡ଼ିଆ ଭାଷା ସାହିତ୍ୟ, ସଂସ୍କୃତି ପରମ୍ପରା ତଥା ସମଗ୍ର ଓଡ଼ିଆଙ୍କ ସ୍ୱାଭିମାନ ଓ ଅସ୍ମିତା ର ପ୍ରତୀକ । ବିଛିନ୍ନାଂଚଳରେ ଓଡ଼ିଆ ଭାଷା ସାହିତ୍ୟର ସୁରକ୍ଷା ସହିତ ଉତ୍କଳ ପ୍ରଦେଶକୁ କିପରି ସ୍ୱତନ୍ତ୍ର ଭାବେ ସମ୍ମାନ ଦିଆଯାଇପାରିବ ସେହି ଦିଗରେ ସର୍ବଦା ଚେଷ୍ଟିତ ଥିଲେ । ଏହାସହିତ ସେ ଥିଲେ ପ୍ରଥମ ବିହାର-ଓଡ଼ିଶା ବିଧାନସଭା ସଦସ୍ୟ, ମନ୍ତ୍ରୀ ତଥା ଉତ୍କଳ ଟ୍ୟାନେରୀ ଓ ଉତ୍କଳ ତାରକଷି କର୍ମଶାଳା ତାଙ୍କ ଦ୍ୱାରା ପ୍ରତିଷ୍ଠା ହୋଇଥିଲା । ଉକ୍ତ କାର୍ଯ୍ୟକ୍ରମରେ ସରକାରଙ୍କ ଅନୁଶାସନ ସଚିବ ଲକ୍ଷ୍ମିଧର ବେହେରା, ରୋହିତ କୁମାର, ବିଜୟ ପରିଡ଼ା, ରମେଶ ଚନ୍ଦ୍ର ପାତାଲସିଂହ, ଶିକ୍ଷାବିତ୍ ତଥା ଉତ୍କଳ ପୂର୍ଣ୍ଣାଙ୍ଗନ୍ୟାସ ସୀତାବଲ୍ଲଭ ମହାପାତ୍ର ପ୍ରମୁଖ ଉପସ୍ଥିତ ରହିବା ସହିତ ତାଙ୍କ ସ୍ମୃତିଚାରଣ କରିଥିଲେ । ଏହି ଅବସରରେ ବର୍ଷିଆନ ସ୍ୱାଧୀନତା ସଂଗ୍ରାମୀ, ଭାଷାବିତ୍ ପର୍ଶୁରାମ ଦ୍ୱିବେଦୀଙ୍କୁ ଉତ୍କଳ ଗୌରବ ମଧୁସୁଦନ ଦାସ ସ୍ମୃତି ସମ୍ମାନ ପ୍ରଦାନ କରାଯାଇଥିଲା । ଆଜିର ଯୁବପୀଢ଼ୀ ତାଙ୍କ ଆଦର୍ଶରେ ଅନୁପ୍ରାଣୀତ ହେବାକୁ ଅତିଥିମାନେ ମତବ୍ୟକ୍ତ କରିଥିଲେ ବୋଲି ମୁଖପାତ୍ର ଅରବିନ୍ଦ ତ୍ରିପାଠୀ ଜଣାଇଛନ୍ତି ।
