ହୃଦୟେ ଦର୍ଶନ

ହୃଦୟକୁ କଲି
ରତ୍ନସିଂହାସନ
ତୁମରି ବସିବା ପାଇଁ,
ହୃଦୟେ ବସିଲେ
ଶରୀର ମୋହରି
ଶ୍ରୀମନ୍ଦିର ଯିବ ହୋଇ ।

କେତେ ବା ଆୟୁଷ
କାହାକୁ ଦେଇଛ
କେତେ ବାଟ ଯିବ ଚାଲି,
ଚାଲୁ ଚାଲୁ ଯଦି
ଜୀବ ଚାଲିଗଲା
ଦର୍ଶନ କାହୁଁ ପାଇଲି ।

ମୁଁ ଚାଲି ନପାରେ
ତୁମେ ଚାଲିପାର
ଭକତଙ୍କ ଭାବ ବହି,
ଯେଉଁଠି ବସିବ
ରତ୍ନସିଂହାସନେ
ଭକ୍ତଙ୍କ ହୃଦୟ ସେହି ।

ତୁମେ ହିଁ କହିଛ
ତୁମରି ଭକତ
ଯହିଁ ଡାକେ ଥାଅ ସେଠି,
ଭକ୍ତ ପାଶେ ଗଲେ
ହୃଦୟେ ନବସି
ବସିବ ଆଉ କୋଉଠି ।

ତେଣୁ ମୋ ହୃଦୟ
ରତ୍ନସିଂହାସନ
ଜନ୍ମରୁ ତୁମରି ପାଇଁ,
ପ୍ରାଣ ଯିବାବେଳେ
ହୃଦେ ବସିଥିବ
ଦର୍ଶନ କରିବି ମୁହିଁ ।

ଗଦାଧର ସାହୁ,
ବ୍ରହ୍ମଗିରି,ପୁରୀ