ସର୍ବୋଦୟ ନେତା ପ୍ରଶାନ୍ତ ମହାନ୍ତିଙ୍କ ଜୟନ୍ତୀ ପାଳିତ
ଭୁବନେଶ୍ୱର, (ଓ୍ବାଇଏନ୍ଏସ୍) : ବିଶିଷ୍ଟ ସର୍ବୋଦୟ ଓ ଭୂଦାନ ନେତା ସ୍ୱର୍ଗତ ପ୍ରଶାନ୍ତ ମହାନ୍ତିଙ୍କ ୭୯ତମ ଜୟନ୍ତୀ ଉତ୍ସବ ବିନୋବା ସ୍ମାରକ ଟ୍ରଷ୍ଟ ଓ ସବୁଜ ଭାରତ ତରଫରୁ ଭୁବନେଶ୍ୱରଠାରେ ପାଳିତ ହୋଇଯାଇଛି । ଏହି ଜୟନ୍ତୀ କାର୍ଯ୍ୟକ୍ରମରେ ସବୁଜ ଭାରତର କାର୍ଯ୍ୟକର୍ତ୍ତାମାନଙ୍କ ଦ୍ୱାରା ପ୍ରଥମେ ସର୍ବଧର୍ମ ପ୍ରାର୍ଥନା ଗାନ କରାଯାଇଥିଲା ଏବଂ ରାଜଭବନ ସରକାରୀ ବିଦ୍ୟାଳୟ ପ୍ରାଙ୍ଗଣରେ ଏକ ବୃକ୍ଷରୋପଣ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି କାର୍ଯ୍ୟକ୍ରମରେ ଅତିଥି ଭାବେ ସାମ୍ବାଦିକ ଓ ସମାଜସେବୀ ଶ୍ରୀଯୁକ୍ତ ପ୍ରକାଶ ନାୟକ ଓ ସମାଜସେବୀ, କବି ପ୍ରବୀର ମହାନ୍ତି ଯୋଗଦାନ କରି ନିଜ ଅଭିଭାଷଣ ରଖିଥିଲେ । ଏହାପରେ କ୍ୟାପିଟାଲ ହସ୍ପିଟାଲରେ ଏକ ରକ୍ତଦାନ ଶିବିର ଅନୁଷ୍ଠିତ ହୋଇଥିଲା । ଏଥିରେ ଅନେକ ଯୁବସାଥୀ ରକ୍ତଦାନ କରିଥିଲେ । ଏହାକୁ ଉଦ୍ଘାଟନ କରି ଡ. ସରୋଜ ବିହାରୀ ମହାନ୍ତି ଓ ଡ. ଆଲୋକ ସ୍ୱାଇଁ, କ୍ୟାପିଟାଲ ହସ୍ପିଟାଲର ଡ. ଦେବାଶିଷ ମିଶ୍ର ରକ୍ତଦାତାମାନଙ୍କୁ ଉତ୍ସାହିତ କରିଥିଲେ । ସବୁଜ ଭାରତର ସଭାପତି ସତ୍ୟବ୍ରତ ଜେନାଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ବାମନ ମାଝୀ, ମନସ୍ୱିନୀ ପରିଡ଼ା, ଡ. ନଳିନୀକାନ୍ତ ମିଶ୍ର, ରୋଜାଲିନ ନାୟକ, ମନୋରଞ୍ଜନ ନାୟକ ପ୍ରମୁଖ ଉପସ୍ଥିତ ଥିଲେ ।
