ବାଇକ୍ ଧକ୍କାରେ ମହିଳା ମୃତ,ଚାଳକ ଗୁରୁତର

ବେଲଗୁଣ୍ଠା, (ସନ୍ତୋଷ ବିଷୋୟୀ): ବେଲଗୁଣ୍ଠା ବ୍ଲକ ଅନ୍ତର୍ଗତ କ୍ଷତ୍ରିୟବରପୁର ହାଇସ୍କୁଲ ଛକ ନିକଟରେ ଏକ ବାଇକ୍ ଧକ୍କାରେ ଜଣେ 50 ବର୍ଷୀୟ ମହିଳା ମୃତ୍ୟୁ ବରଣ କରିଥିବା ବେଳେ ବାଇକ୍ ଆରୋହୀ ଜଣଙ୍କ ଗୁରୁତର ଆହତ ହୋଇ ଭଞ୍ଜନଗର ମେଡ଼ିକାଲକୁ ସ୍ଥାନାନ୍ତର ହୋଇଛନ୍ତି । ସୂଚନା ପ୍ରକାରେ ଆଜି ସକାଳ 8 ଘଣ୍ଟା 30 ମିନିଟ୍ ସମୟରେ କ୍ଷତ୍ରିୟବରପୁରର ଅଜିତ୍ ପଟ୍ଟନାୟକଙ୍କ ଧର୍ମପତ୍ନୀ ଝୁନୁ ପଟ୍ଟନାୟକ (50) ପାଣି ଆଣିବା ପାଇଁ ଯିବା ସମୟରେ ପାଇଲିପଡା ଗ୍ରାମର ସ୍ୱର୍ଗତ ରାଧାକୃଷ୍ଣ ପାତ୍ରଙ୍କ ପୁଅ ବାଦଲ ପାତ୍ର (23) OD07V6479 ନମ୍ବର୍ ବିଶିଷ୍ଟ ଏକ ସୁଜୁକି ଗାଡ଼ିରେ ଆସି ଭାରସାମ୍ୟ ହରାଇ ଝୁନୁଙ୍କୁ ପଛପଟୁ ଧକ୍କା ଦେଇଥିଲେ । ଫଳରେ ଉଭୟ ଝୁନୁ ଏବଂ ବାଦଲ ରାସ୍ତାରେ ଛିଟିକି ପଡ଼ିଥିଲେ I ଘଟଣାସ୍ଥଳରୁ ସ୍ଥାନୀୟ ଲୋକେ ଗୁରୁତର ଅବସ୍ଥାରେ ଝୁନୁଙ୍କୁ ଉଦ୍ଧାର କରି ଏକ ଘରୋଇ ଗାଡ଼ି ଯୋଗେ ଭଞ୍ଜନଗର ମେଡ଼ିକାଲକୁ ନେବା ରାସ୍ତାରେ ତାଙ୍କର ମୃତ୍ୟୁ ହୋଇଥିଲା। ଭଞ୍ଜନଗର ମେଡିକାଲରେ ଡାକ୍ତର ମୃତ୍ୟୁ ଘୋଷଣା କରିବା ସହ ଶବ ବ୍ୟବଚ୍ଛେଦ ପାଇଁ ପଠାଇଥିଲେ। ମୃତ ଝୁନୁର ମୁଣ୍ଡରେ ଗଭୀର ଆଘାତ ହୋଇ ଅଧିକ ରକ୍ତସ୍ରାବ ହେଇଯିବାରୁ ଝୁନୁଙ୍କର ମୃତ୍ୟୁ ଘଟିଥିଲା I ଅନ୍ୟପକ୍ଷରେ ଆହତ ବାଇକ୍ ଆରୋହୀ ବାଦଲକୁ ମଧ୍ୟ ଘଟଣାସ୍ଥଳରୁ ଉଦ୍ଧାର କରାଯାଇ
ଗୋବରା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ହେବାରୁ ଆମ୍ବୁଲାନ୍ସ ଯୋଗେ ଭଞ୍ଜନଗର ମେଡ଼ିକାଲ ସ୍ଥାନାନ୍ତର କରାଯାଇଥିଲା। ଘଟଣା ସମ୍ପର୍କରେ ଖବର ପାଇ ଗାଙ୍ଗପୁର ଥାନା ଏସଆଇ ସୁକାନ୍ତ କୁମାର ପ୍ରଧାନ ଏବଂ ହାବିଲଦାର ବିପିନ ବିହାରୀ ସ୍ବାଇଁ ଘଟଣା ସ୍ଥଳରେ ପହଞ୍ଚି ବାଇକ୍ କୁ ଜବତ କରିବା ସହ ଅନୁସନ୍ଧାନ ଯାରି ରଖିଛନ୍ତି।