ବସ ଧକ୍କାରେ ଛେଳି ଜଗୁଆଳି ମୃତ ଚାଳକ ଅଟକ, ଥାନାରେ ଏତଲା

ସାନଖେମୁଣ୍ଡି, (ପଦ୍ମଲୋଚନ ପାଣିଗ୍ରାହୀ ) : ଗଞ୍ଜାମ ଜିଲ୍ଲା କେ. ନୂଆଗାଁ ଥାନା ଜକର ଗ୍ରାମ ଏୟାରଟେଲ ଟାୱାର ନିକଟରେ ମଙ୍ଗଳବାର ଅପରାହ୍ନରେ ଏକ ଘରୋଇ ବସ୍ ଧକ୍କାରେ ଜଣେ ଛେଳି ଜଗୁଆଳୀଙ୍କ ମୃତ୍ୟୁ ହୋଇଥିବା ଜଣାପଡିଛି । ମୃତ ଯୁବକ ଜଣକ ହେଲେ ଦିଗପହଣ୍ଡି ବ୍ଲକ ଜକର ଗ୍ରାମର ରମେଶ କନ୍ଯାରୀ । ଏନେଇ ମୃତକଙ୍କ ପତ୍ନୀ ବାସନ୍ତୀ କନ୍ଯାରୀ ଗାଡ଼ି ଚାଳକଙ୍କ ବିରୋଧରେ ଥାନାରେ ଏତଲା ଦେଇଛନ୍ତି । ମଙ୍ଗଳବାର ଅପରାହ୍ନ ପ୍ରୟ ୩ ଘଣ୍ଟା ସମୟରେ ରମେଶ ଛେଳିଗୋଠକୁ ଧରି ଘରକୁ ଫେରୁଥିବା ବେଳେ ଦିଗପହଣ୍ଡିରୁ ଚିକିଟି ଅଭିମୁଖେ ଦ୍ରୁତ ଗତିରେ ଯାଉଥିବା ଟୁଟୁ ନାମକ ଘରଇ ବସ୍ ( ଓଆର ୨୦ ୩୧୬୫) ଧକ୍କା ଦେଇଥିଲା । ଫଳରେ ରମେଶଙ୍କୁ ଗୁରୁତର ଆହତ ଅବସ୍ଥାରେ ଉଦ୍ଧାର କରାଯାଇ ଚିକିତ୍ସା ନିମନ୍ତେ ଚିକିଟି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ପ୍ରାଥମିକ ଚିକିତ୍ସା ପରେ ସଙ୍କଟାପନ୍ନ ଅବସ୍ଥାରେ ବ୍ରହ୍ମପୁର ବଡ଼ମେଡ଼ିକାଲ ସ୍ଥାନାନ୍ତରିତ କରାଯାଇଥିଲା । ତେବେ ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା ଡାକ୍ତର ପରିବାରକୁ ଜଣାଇଥିଲେ । ଏନେଇ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣା ଘଟାଇଥିବା ଗାଡ଼ିକୁ ଜବତ କରିଥିବା ବେଳେ ଚାଳକକୁ ଥାନାରେ ଅଟକ ରଖିଥିଲା । ବୁଧବାର ଶବ ବ୍ୟବଚ୍ଛେଦ କରାଯିବା ପରେ ମୃତଦେହ ପରିବାରକୁ ହସ୍ତାନ୍ତର କରାଯାଇଥିଲା । ତେବେ ବାସନ୍ତୀଙ୍କ ଏତଲାକୁ ଭିତ୍ତିକରି ଥାନା କେଶ ନମ୍ବର ୧୭/୨୨ ଅନୁଯାଇ ମାମଲା ରୁଜୁ କରାଯାଇ ତଦନ୍ତ ଚଳାଇଥିବା ଥାନା ଅଧିକାରୀ ମୃତ୍ୟୁଞ୍ଜୟ ସ୍ବାଇଁ କହିଛନ୍ତି ।