ଜିଲ୍ଲାସ୍ତରୀୟ ଜାତୀୟ କନ୍ୟା ଶିଶୁ ଦିବସ ପାଳିତ
ଛତ୍ରପୁର,(ୱାଇ ଏନ ଏସ): କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟ, ରିକାପାଲି ଠାରେ ଜିଲ୍ଲା ସମାଜ କଲ୍ୟାଣ ଅଧିକାରୀ, ଗଞ୍ଜାମ ବିଜୟଲକ୍ଷ୍ମୀ ବେହେରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । କନ୍ୟା ଶିଶୁଙ୍କ ସୁରକ୍ଷା, ନିରାପତ୍ତା, ଜୀବନ କୌଶଳ ବିକାଶ ଓ ଆତ୍ମରକ୍ଷା ସମ୍ବନ୍ଧୀୟ ବିଷୟରେ ଆଲୋଚନା କରାଯାଇଥିଲା। ଅତିଥିମାନେ କନ୍ୟା ଶିଶୁଙ୍କ ଯତ୍ନ ଓ ସୁରକ୍ଷା, ଶିଶୁଙ୍କ ଅଧିକାର ଓ ସମ୍ପର୍କିତ ଆଇନ, ଶିଶୁ ସହାୟତା ନମ୍ବର ୧୦୯୮ର ବ୍ୟବହାର, ବାଲ୍ୟ ବିବାହ ପ୍ରତିରୋଧ, ଋତୁସ୍ରାବ ସମୟର ସ୍ୱଚ୍ଛତା, କନ୍ୟାମାନଙ୍କ ପାଇଁ ସାଇବର ସୁରକ୍ଷା, ଶିଶୁଙ୍କ ସ୍ୱାସ୍ଥ୍ୟ ସୁରକ୍ଷା ଓ ଟୀକାକରଣ, ଉପଯୁକ୍ତ ପୋଷଣ, ଶିକ୍ଷାରେ ଉନ୍ନତି, ବୈଷୟିକ ଜ୍ଞାନ ଓ ବୃତ୍ତିମୂଳକ ପ୍ରଶିକ୍ଷଣ, ପାଠପଢା ଛାଡ଼ିବାକୁ ରୋକିବା, ସ୍କୁଲ୍ଗୁଡ଼ିକରେ ମାସିକ ସ୍ୱାସ୍ଥ୍ୟ ପରୀକ୍ଷା ଓ ଲୌହ ଟାବଲେଟ୍ ବ୍ୟବହାର, ସଫା-ସୁଥା ଓ ହାତ ଧୋଇବାର ଅଭ୍ୟାସ, ଏବଂ ମହିଳା ଓ ଶିଶୁ ବିକାଶ ବିଭାଗର ବିଭିନ୍ନ ସୁବିଧା ଓ ସୁଯୋଗ ସମ୍ପର୍କରେ ମାର୍ଗଦର୍ଶନ ଦେଇଥିଲେ । ଏହା ସହିତ ବାଲ୍ୟ ବିବାହ ବିରୋଧରେ ଦସ୍ତଖତ ମାଧ୍ୟମରେ ସଂକଳ୍ପ ଅଭିଯାନ ମଧ୍ୟ କରାଯାଇଥିଲା। ଅବସରରେ ବେଟି ବଚାଓ ବେଟି ପଢ଼ାଓ ଯୋଜନା ଅଧୀନରେ ଜିଲ୍ଲାର ଚାରିଜଣ ଚ୍ୟାମ୍ପିଅନ ଯଥା ରୁକୁନି ବିଶୋୟୀ ଆଥଲେଟିକ୍ସରେ ରାଜ୍ୟ ସ୍ତରରେ ପ୍ରଥମ ସ୍ଥାନ ଅଧିକାର, ସ୍ନେହାରାଣୀ ଗୌଡ଼ ସୁରଭି କାର୍ଯ୍ୟକ୍ରମ ଅନ୍ତର୍ଗତ ରାଜ୍ୟସ୍ତରୀୟ କୁଇଜ୍ ପ୍ରତିଯୋଗିତାରେ ପ୍ରଥମ ସ୍ଥାନ ଅଧିକାର, ବୃନ୍ଦାରାଣୀ ପଣ୍ଡା ବୀର ଗାଥା ଚିତ୍ରକଳା ପ୍ରତିଯୋଗିତାରେ ରାଜ୍ୟ ସ୍ତରରେ ପ୍ରଥମ ସ୍ଥାନ ଅଧିକାର କରି ସମଗ୍ର ଭାରତରୁ ଶ୍ରେଷ୍ଠ ୧୪ ଜଣ ମଧ୍ୟରେ ଚୟନିତ ଓ କନ୍ଦିଗାଁ ଅଙ୍ଗୱାଡ଼ି କେନ୍ଦ୍ର ୨, ଖଲ୍ଲିକୋଟ ଆଇସିଡିଏସ ପ୍ରୋଜେକ୍ଟର ଅଲିଶା ପାଳଙ୍କୁ ପ୍ରାକ୍-ପ୍ରାଥମିକ ଶିକ୍ଷା , ଆଦ୍ୟ ଶୈଶବ ର ଯତ୍ନ, ଅନ୍ୟାନ୍ୟ କାର୍ଯ୍ୟକଳାପ ଏବଂ ସୋସିଆଲ ମିଡିଆ ମାଧ୍ୟମରେ ସଚେତନତା ସୃଷ୍ଟି ପାଇଁ ସମ୍ମାନିତ କରାଯାଇଥିଲା । ଏହା ବ୍ୟତୀତ, ବାଲ ବିବାହ ମୁକ୍ତ ଭାରତ–ବାଲ୍ୟ ବିବାହ ନିବାରଣ ୧୦୦ ଦିନିଆ ଅଭିଯାନ ଅଧୀନରେ ଆୟୋଜିତ ବିଭିନ୍ନ ପ୍ରତିଯୋଗିତାରେ କୃତିତ୍ବ ହାସଲ କରିଥିବା ହେତୁ ୭ ଜଣ ଚ୍ୟାମ୍ପିଅନଙ୍କୁ ସମ୍ମାନିତ କରାଯାଇଥିଲା।କାର୍ଯ୍ୟକ୍ରମରେ ଛତ୍ରପୁର ସମାଜ କଲ୍ୟାଣ ଅଧିକାରୀ ପାର୍ବତୀ ସୋରେନ, ମୁନିଶିପେଣ୍ଠ ସିଏସିର ସୁପରିଣ୍ଟେଣ୍ଡେଣ୍ଟ ଡା ସ୍ଵାଧୀନ ରଥ; ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଡଃ ପ୍ରଭାତୀ ମହାପାତ୍ର, ଉପ-ନିରୀକ୍ଷକ ସାଇବର ସେଲ କିରଣ ଚନ୍ଦ୍ର ପାତ୍ର, ପିଓଆଇସି ଶରତ ମହାରଣା, ଏସଡିପିଓ ପଦ୍ମା ମୁର୍ମୁ, ସିଡିପିଓ ପ୍ରଣମିତା ପଣ୍ଡା, ୟୁନିସେଫ୍ ଜିଲ୍ଲା ସଂଯୋଜକ ଦେବବ୍ରତ ମହନ୍ତ, ସେବା ଏନଜିଓର ସମ୍ପାଦିକା ଅଳକା ସାହୁ, କେଜିବିଭି ରିକାପାଲିର ପ୍ରଧାନ ଶିକ୍ଷୟିତ୍ରୀ ରିତା ରଥ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ । ଏହି କାର୍ଯ୍ୟକ୍ରମକୁ ଜିଲ୍ଲା ସଂଯୋଜିକା ଗୀତାଞ୍ଜଳୀ ମହାରଣା ପରିଚାଳନା ଏବଂ ଜିଲ୍ଲା ମହିଳା ସଶକ୍ତିକରଣ ହବ, ଗଞ୍ଜାମର କର୍ମଚାରୀମାନେ ଆବଶ୍ୟକୀୟ ସହଯୋଗ ଯୋଗାଇଦେଇଥିଲେ । ବିଭିନ୍ନ ବ୍ଲକ୍ର ପ୍ରାୟ ୧୫୦ ଜଣ ଛାତ୍ରୀ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ।
