ଶ୍ରୀକ୍ଷେତ୍ରେ ଭଉଁରୀ

ସରି ସରି ଆସୁଅଛି ଚନ୍ଦନ ଯାତ
ଭଉଁରୀରେ ଯାତ ଶେଷ ଭ୍ରମ ଲୋ ମିତ ।

ଅକ୍ଷୟ ତୃତୀୟା ଦିନ ଆରମ୍ଭ ହେଲା
ଏକୋଇଶ ଦିନ ବାହ୍ଯେ ଯାତ୍ରା ଚାଲିଲା ।

ବଇଶାଖ ଜ୍ଯେଷ୍ଠେ ଗ୍ରୀଷ୍ମ ଝାଞ୍ଜି ତପତ
ଶ୍ରୀଅଙ୍ଗକୁ ଛୁଇଁଦେଲେ ଲାଗେ ଉତ୍ତପ୍ତ ।

ଶ୍ରୀଅଙ୍ଗ ଶୀତଳ ପ୍ରଭୁ କରିବାପାଇଁ
ସର୍ବାଙ୍ଗେ ଚନ୍ଦନ ବୋଳି ଜଗତ ସାଇଁ ।

ମଦନମୋହନ ମଣିବିମାନେ ବିଜେ
ଭୂଦେବୀ ଶ୍ରୀଦେବୀ ବେନି ପାରୁଷେ ସାଜେ ।

ରାମକୃଷ୍ଣ ବେନି ଭାଇ ଅଛନ୍ତି ଚାହିଁ
ପଞ୍ଚସାଗର ଆସନ୍ତି ନରେନ୍ଦ୍ର ଧାଇଁ ।

ଏଣେ ଚାପ ଖେଳ ତେଣେ ଚକ ତିଆରି
ଅଖ ଚକ ଯୋଖା ହେବ ଆସେ ଭଉଁରୀ ।

ଚନ୍ଦନ ଚକଡା ପରେ ଜଗତ ସାଇଁ
ମଣ୍ଡଳାକାରରେ ଚାପ ଖେଳନ୍ତି ଯହିଁ ।

ଏକୋଇଶ ଘେରା ବୁଲି ସମୟ ଶେଷ
ତେଣେ ରଥଚକ ଡାକେ ଆସ ମୋ ପାଶ ।

ଫେରିବା ବାଟରେ ଚାହିଁ ଦେବ ହେ ପ୍ରଭୁ
ବୟାଳିଶ ଚକ ଆମେ ଗଢା ହୋଇବୁ।

ରଥଯାତ ସେବା ପାଇଁ ହେବୁ ପ୍ରସ୍ତୁତ
ରଥପରେ ବିଜେ ହେବ ଜଗତନାଥ ।

ବୟାଳିଶ ଦିନେ ଅନ୍ତ ଚନ୍ଦନ ଯାତ
ବୟାଳିଶ ଚକ ଆମ୍ଭେ ହେବୁ ପ୍ରସ୍ତୁତ ।

ଗଡି ଗଡି ଯିବୁ ଆମେ ଗୁଣ୍ଡିଚାଘର
ଫରି ଆସିବୁ ଘୂରି ଘୂରି ଶ୍ରୀମନ୍ଦିର ।

ଏକୋଇଶି ଏକୋଇଶି ଯେ ବୟାଳିଶି
ବୟାଳିଶି ଯାଏ ଆସେ ମିଶି ଚୌରାଶି ।

ସମୟ ଖେଳ କରିଛି ଋତୁଙ୍କୁ କୋଳ
ସବୁଠାରେ ଲାଗିଅଛି ଭଉଁରୀ ଖେଳ ।

ଗଦାଧର ସାହୁ,
ବ୍ରହ୍ମଗିରିର,ପୁରୀ