ପାର୍ବଣ ପୂର୍ବରୁ ପୁଲିସ ସ୍କାନ୍ରେ ପେସାଦାର ଅପରାଧୀ
କଟକ,(ଓ୍ବାଇଏନଏସ): ପାର୍ବଣକୁ ଶାନ୍ତିଶୃଙ୍ଖଳାର ସହିତ ଶେଷ କରିବା ପାଇଁ କଟକ ପୁଲିସ ଏବେ ଅଣ୍ଟା ଭିଡ଼ିଛି । ପୂଜାରେ ଯେପରି ପେସାଦାର ଅପରାଧୀ କୌଣସି ପ୍ରକାର ବିଶୃଙ୍ଖଳା କରିନପାରନ୍ତି ସେଥିପାଇଁ ପୁଲିସ ସଜାଗ ହୋଇଛି । ଦଶହରା ପୂର୍ବରୁ ସେମାନଙ୍କୁ ଜେଲ୍ର ଚାରିକାନ୍ଥ ଭିତରେ ରଖିବା ପାଇଁ ଆଇନଗତ ପଦକ୍ଷେପ ନେଉଛି । ଏହି କ୍ରମରେ କଟକ ସହରାଞ୍ଚଳ ପୁଲିସର ୨୩ଟି ଥାନା ପରିସରରେ ରହୁଥିବା ୧୩୨ ଜଣ ପେସାଦାର ଅପରାଧୀଙ୍କୁ ଭାରତୀୟ ନାଗରିକ ସୁରକ୍ଷା ସଂହିତା (ବିଏନ୍ଏସ୍ଏସ୍)ର ଧାରା ୧୨୯ରେ ଅର୍ଥାତ୍ ପୂର୍ବର (ସିଆର୍ପିସି-୧୧୦) କାର୍ଯ୍ୟାନୁଷ୍ଠାନ ନେବାକୁ ତାଲିକା ପ୍ରସ୍ତୁତ କରାଯାଇଛି । ବିଶେଷକରି ଚୋରି, ଛିନ୍ତାଇ, ନିଶା ବେପାରୀ, ବନ୍ଧୁକ ବେପାରୀ, ଦାଦାବଟି ଆଦାୟ କରୁଥିବା ଓ ଚୋରା ମଦ ବେପାର କରୁଥିବା ଦାଗିଙ୍କୁ ଏହି ତାଲିକାରେ ସାମିଲ କରାଯାଇଥିବା କଟକ ପୁଲିସର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି । ପାର୍ବଣ ଋତୁ ଆସିବା ମାତ୍ରେ ଅପରାଧୀମାନେ ଅଧିକ ସକ୍ରିୟ ହୋଇଥାନ୍ତି । ଚୋରି-ଛିନ୍ତାଇ ବଢ଼ିବା ସହିତ ଦାଦାବଟି ଆଦାୟ ଓ ମାରାତ୍ମକ ନିଶା କାରବାର ହଠାତ୍ ବଢ଼ିଯାଏ । ତେଣୁ ପୂଜା ପୂର୍ବରୁ ଗଲା ଦୁଇରୁ ତିନ ଦଶନ୍ଧି ହେବ କଟକ ପୁଲିସ ଅପରାଧୀଙ୍କ ବିରୋଧ କଡ଼ା କାର୍ଯ୍ୟାନୁଷ୍ଠାନ ନେଇଆସୁଛି । ଯେଉଁ ଅପରାଧୀଙ୍କଠାରୁ ଅଧିକ ବିପଦ ବା ଆଶଙ୍କା ଥାଏ ସେମାନଙ୍କର ଏକ ତାଲିକା ପ୍ରସ୍ତୁତ କରି ଥାନାୱାରୀ ସିଆର୍ପିସିର ୧୧୦ରେ ମାମଲା କରି ଗିରଫଦାରୀ କରାଯାଏ । ଆଉ ଯେଉଁମାନଙ୍କର ପୁରୁଣା ମାମଲାଗୁଡ଼ିକ ଦୀର୍ଘଦିନ ହେବ ପଡ଼ିଥାଏ ସେଗୁଡ଼ିକରେ ମଧ୍ୟ ୱାରେଣ୍ଟ୍ ଗୁଡ଼ିକ କାର୍ଯ୍ୟକାରୀ କରାଯାଏ । ଏହି କ୍ରମରେ କଟକ ପୁଲିସ ଅପରାଧୀଙ୍କର ଏକ ଲମ୍ବା ତାଲିକା ପ୍ରସ୍ତୁତ କରିଛି । ଜୋନ୍-୧ ଅଧିନରେ ଥିବା ଚୌଦ୍ୱାର ଥାନାରେ ୧୦ ଜଣ, ଜଗତପୁରରେ ୯ ଜଣ ଓ ମାଲ୍ଗୋଦାମ ଥାନାରେ ୬ ଜଣ ଅପରାଧୀଙ୍କ ତାଲିକା ପ୍ରସ୍ତୁତ ହୋଇଛି । ସେହିପରି ଜୋନ୍-୨ ଅଧିନ ଦରଘାବଜାର ୮, କ୍ୟାଣ୍ଟନମେଣ୍ଟ ୯ ଓ ମଙ୍ଗଳାବାଗ ଥାନାରେ ୮, ଜୋନ୍-୩ ଅଧିନ ଲାଲ୍ବାଗ ୮, ମର୍କତନଗର ୫, ସିଡିଏ ଫେଜ୍ ଦୁଇ ୪ ଓ ବିଡ଼ାନାସୀରେ ୬ ଜଣ ପେସାଦାର ଅପରାଧୀଙ୍କ ତାଲିକା ପ୍ରସ୍ତୁତ କରାଯାଇଛି । ଏହି କ୍ରମରେ ଜୋନ୍-୪ ଅଧିନ ସଦର ଥାନାରେ ୯, ବୟାଳିଶମୌଜା ୪ ଓ ବାରଙ୍ଗ ୯, ଜୋନ୍-୫ ଅଧିନ ସିଆର୍ଆର୍ଆଇ ଥାନାରେ ୩, କନ୍ଦରପୁର ୪ ଓ ଚାଉଳିଆଗଞ୍ଜ ୮ ଏବଂ ଜୋନ୍-୬ ଅଧିନ ମଧୁପାଟଣା ଥାନାରେ ୭, ବାଦାମବାଡ଼ିରେ ୮ ଓ ପୁରୀଘାଟ ଥାନା ଅଞ୍ଚଳର ୭ ଜଣ ଅପରାଧୀଙ୍କ ନାଁ ତାଲିକାଭୁକ୍ତ ହୋଇଛି । ତେବେ ଏହିସବୁ ଅପରାଧୀଙ୍କୁ ୧୨୯ ବିଏନ୍ଏସ୍ଏସ୍ରେ କାର୍ଯ୍ୟାନୁଷ୍ଠାନ ନେବାକୁ ନିଷ୍ପତ୍ତି ହୋଇଛି । ମାତ୍ର ପୁଲିସ ତନାଘନା କରୁଥିବା ଦେଖି କିଛି ଅପରାଧୀ ସହର ବାହାରକୁ ଚାଲିଯାଇଥିବା ବା ଅଣ୍ଡରଗ୍ରାଉଣ୍ଡ୍ ହୋଇଥିବା ଶୁଣିବାକୁ ମିଳିଛି । ସେହିପରି କିଛି ଅପରାଧୀ ବିଭିନ୍ନ ମାମଲାରେ ଏବେ ଜେଲ୍ରେ ଅଛନ୍ତି । ମାତ୍ର ପ୍ରାୟ ସବୁ ତାଲିକାଭୁକ୍ତ ଅପରାଧୀଙ୍କ ନାଁରେ ଏହି ଧାରା ଯୋଡ଼ାଯିବ ବା (ବିଏନ୍ଏସ୍ଏସ୍ର ୧୨୯)ରେ ନୂଆ ମାମଲା କରାଯିବ ବୋଲି ସୂଚନା ମିଳିଛି । ତେବେ ଗତ କିଛି ବର୍ଷ ହେବ ଲଗାତାର ଭାବେ ଅପରାଧରେ ସଂପୃକ୍ତ ରହି ପୁଲିସ ପାଇଁ ମୁଣ୍ଡ ବିନ୍ଧାର କାରଣ ପାଲଟିଥିବା ଅପରାଧୀଙ୍କୁ ହିଁ ଏଥିରେ ତାଲିକାଭୁକ୍ତ କରାଯାଇଛି ।
