ଛାତ୍ର ବିଦ୍ୟାଳୟ ପରିଷଦ ନିର୍ବାଚନ
ଚୌଦ୍ୱାର, (ଦୀପକ କୁମାର ବେଉରା) ସ୍ଥାନୀୟ ଦ ବି ଆଇ ପି ଏଫ୍ ବିଦ୍ୟାଳୟ ପକ୍ଷରୁ ଛାତ୍ରଛାତ୍ରୀଙ୍କ ମଧ୍ୟରେ ଗଣତାନ୍ତ୍ରିକ ମୂଲ୍ୟବୋଧ, ନେତୃତ୍ୱ ଗୁଣ ଏବଂ ଦାୟିତ୍ୱବୋଧର ବିକାଶ ଉଦ୍ଦେଶ୍ୟରେ ଛାତ୍ର ବିଦ୍ୟାଳୟ ପରିଷଦ ନିର୍ବାଚନ୨୦୨୬ ସଫଳତାର ସହ ଆୟୋଜିତ ହୋଇଛି। ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ପ୍ରାର୍ଥୀମାନଙ୍କ ନାମାଙ୍କନ, ପ୍ରଚାର କାର୍ଯ୍ୟକ୍ରମ ଏବଂ ମତଦାନ ଶାନ୍ତିପୂର୍ଣ୍ଣ ଓ ଶୃଙ୍ଖଳିତ ପରିବେଶରେ ସମ୍ପନ୍ନ ହୋଇଥିଲା। ବିଦ୍ୟାଳୟର ହେଡ୍ ବଏ,ହେଡ୍ ଗର୍ଲ୍, ବିଭିନ୍ନ ହାଉସ୍ର କ୍ୟାପଟେନ୍, ଶ୍ରେଣୀ ପ୍ରତିନିଧି ସମେତ ଅନ୍ୟାନ୍ୟ ଛାତ୍ରଛାତ୍ରୀ ଉତ୍ସାହର ସହ ମତଦାନରେ ଅଂଶଗ୍ରହଣ କରି ଗଣତନ୍ତ୍ର ପ୍ରତି ନିଜ ଦାୟିତ୍ୱବୋଧର ପରିଚୟ ଦେଇଥିଲେ। ଶିକ୍ଷକମାନଙ୍କ ତତ୍ତ୍ୱାବଧାନରେ ସମଗ୍ର ନିର୍ବାଚନ ପ୍ରକ୍ରିୟା ସ୍ୱଚ୍ଛ, ନିରପେକ୍ଷ ଏବଂ ସୁଚାରୁ ଭାବେ ପରିଚାଳିତ ହୋଇଥିଲା। ନିର୍ବାଚନ ପ୍ରକ୍ରିୟା ମାଧ୍ୟମରେ ଛାତ୍ରଛାତ୍ରୀମାନେ ମତଦାନର ଗୁରୁତ୍ୱ, ଗଣତାନ୍ତ୍ରିକ ପ୍ରକ୍ରିୟା ଓ ଦାୟିତ୍ୱଶୀଳ ନେତୃତ୍ୱ ସମ୍ପର୍କରେ ବ୍ୟବହାରିକ ଅନୁଭୂତି ଲାଭ କରିଥିଲେ। ବିଦ୍ୟାଳୟ କର୍ତ୍ତୃପକ୍ଷଙ୍କ କହିବା ଅନୁସାରେ, ଏଭଳି କାର୍ଯ୍ୟକ୍ରମ ଛାତ୍ରଛାତ୍ରୀଙ୍କ ମଧ୍ୟରେ ନେତୃତ୍ୱ, ସହଯୋଗ, ଶୃଙ୍ଖଳା ଓ ଗଣତାନ୍ତ୍ରିକ ଚେତନାକୁ ସୁଦୃଢ଼ କରିବା ସହ ଭବିଷ୍ୟତର ଦାୟିତ୍ୱବାନ ନାଗରିକ ଗଠନରେ ସହାୟକ ହେବ। ଏହି ନିର୍ବାଚନକୁ ବିଦ୍ୟାଳୟର ଏକ ସଫଳ ଓ ଶିକ୍ଷଣୀୟ ପଦକ୍ଷେପ ଭାବେ ଅଭିହିତ କରାଯାଇଛି।
