ବୁଲା କୁକୁରକୁ ମାଡ ମାରି ୩ ଭାଇ  ହଟହଟା

ପାରଳାଖେମୁଣ୍ଡି,(ତାରିଣୀ ପ୍ରସାଦ ପଣ୍ଡା):ଗଜପତି ଜିଲ୍ଲା ମହକୁମା ପାରଳାଖେମୁଣ୍ଡି ସହରରେ ଏକ ବିରଳ ଘଟଣା ଦେଖିବାକୁ ମିଳିଛି । ବୁଲା କୁକୁରକୁ ମାଡ ମାରିବା ଅଭିଯୋଗରେ ପାରଳାଖେମୁଣ୍ଡି ଥାନାରେ ୩ଭାଇଙ୍କ ନାମରେ ମକଦ୍ଦମା ରୁଜୁ ହୋଇଥିବା ସୁଚନା ମିଳିଛି । ଘଟଣାରୁ ପ୍ରକାଶ ପାରଳାଖେମୁଣ୍ଡି ସହରର ବାଟଗୌଡ ସାହି ଠାରେ ଗତ ୨୦ ତାରିଖ ଦିନ ୩ଜଣ ଭାଇ ମିଳିତ ଭାବେ ଏକ ବୁଲା କୁକୁରକୁ ବାରମ୍ବାର ମାଡ ଦେଇଥିବା ସୋସିଆଲ ମିଡିଆରେ ଭାଇରଲ ହୋଇଥିଲା । ଏହାକୁ ନେଇ ବିଭିନ୍ନ ମହଲରେ ଲୋକେ ପ୍ରତିକ୍ରୀୟା ପ୍ରକାଶ କରିବା ସହ ଘଟଣାଟିକୁ ନିନ୍ଦା କରିଥିଲେ । ଏହି ଭିଡିଓ ଭାଇରଲକୁ ନେଇ ପାରଳା ଥାନାରେ ବୁଲା କୁକୁରକୁ ମାଡ ମାରିଥିବା ଅଭିଯୋଗରେ ଗୋଟିଏ ପରିବାରର ୩ଭାଇଙ୍କ ନାମରେ ମକଦ୍ଦମା ରୁଜୁ ହୋଇଛି । ପାରଳାଖେମୁଣ୍ଡି ଥାନା ଆଇଆଇସି ବିବେକାନନ୍ଦ ସ୍ୱାଇଁ ଏ ନେଇ କହିଛନ୍ତି,କୁକୁରକୁ ମାଡ ଦେବା ଘଟଣାରେ ପାରଳା ଥାନାରେ କେସ୍ ନଂ ୧୯୫/୨୦ରେ ମକଦ୍ଦମା ରୁଜୁ କରାଯାଇ ଏହି ୩ଭାଇଙ୍କୁ ୪୧ଏ ଧାରାରେ ନୋଟିସ୍ କରାଯାଇ ଘଟଣାର ତଦନ୍ତ ଜାରି ରହିଛି ।