ପୁସ୍ତକ ‘ଦ୍ୱାରକା ଲୀଳା’ ଲୋକାର୍ପିତ
ଭୁବନେଶ୍ୱର,(ଯୁଗାବ୍ଦ ନ୍ୟୁଜ୍) : ବିଶିଷ୍ଟ ଐତିହାସିକ, ଗବେଷକ, ପ୍ରତ୍ନତତ୍ତ୍ୱ ବଶାରଦ ଓ ବହୁ ପ୍ରତିଭାଦୀପ୍ତ ବ୍ୟକ୍ତିତ୍ୱ ଡଃ ପ୍ରଫୁଲ୍ଲ ଚନ୍ଦ୍ର ତ୍ରିପାଠୀଙ୍କ ୭୮ତମ ଜନ୍ମ ଦିିବସରେ ତାଙ୍କ ସ୍ୱରଚିତ ପୁସ୍ତକ ‘ଦ୍ୱାରକା ଲୀଳା’ ସ୍ଥାନୀୟ ଜୟଦେବ ଭବନସ୍ଥିତ ଗୀତଗୋବିନ୍ଦ ସଦନରେ ଲୋକର୍ପିତ ହେବା ସହିତ ପୂଜ୍ୟପୂଜା ସଂସ୍କୃତି ସୁରକ୍ଷା ଅଭିଯାନର ୧୯ତମ ସପ୍ତାହରେ ପଦାର୍ପଣ କରିଥିବା ବିଭିନ୍ନ ସାମାଜିକ ଓ ସାଂସ୍କୃତିକ କାର୍ଯ୍ୟକ୍ରମର ଗଣମାଧ୍ୟମରେ ପ୍ରକାଶିତ ଫଟୋଚିତ୍ରର ବିବରଣୀ ଓ ଗୀତଗୋବିନ୍ଦ ମହାତ୍ମ୍ୟ ଶୀର୍ଷକ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା । ଉକ୍ତ କାର୍ଯ୍ୟକ୍ରମରେ ମୁଖ୍ୟ ସୂଚନା ଆୟୁକ୍ତ ଶ୍ରୀ ସୁନିଲ୍ କୁମାର ମିଶ୍ର, କଥାକାର ଓ ବାଗ୍ମୀ ଡଃ କୃଷ୍ଣ କେଶବ ଷଡ଼ଙ୍ଗୀ, ସାମ୍ବାଦିକ ସୁରେଶ ମନ୍ତ୍ରୀ, ପ୍ରାକ୍ତନ ପ୍ରଶାସକ ଦିଗମ୍ବର ମହାନ୍ତି୍, ସ୍ତମ୍ଭକାର, ସାହିତ୍ୟିକ ଅସିତ୍ ମହାନ୍ତି, ଦୂରଦର୍ଶନର ବରିଷ୍ଠ ସମାଚାର ମୁଖ୍ୟ ନିଳାଦ୍ରୀ ମୋହନ ଶତପଥୀ ପ୍ରମୁଖ ଯୋଗଦେଇ ଡଃ ତ୍ରିପାଠୀଙ୍କ ୭୮ତମ ଜନ୍ମଦିବସ ଅବସରରେ ସାରସ୍ୱତ ଦୀର୍ଘ ଜୀବନ କାମନା କରିବା ସହିତ ଡଃ ତ୍ରିପାଠୀଙ୍କ ଗବେଷଣାକୁ ଭୂୟସୀ ପ୍ରଶଂସା କରିଥିଲେ । ଓଡ଼ିଶା ଓ ଜୟଦେବଙ୍କ ସମ୍ପର୍କରେ ତାଙ୍କର ତଥ୍ୟଭିତ୍ତିକ ଗବେଷଣା, ଲେଖା ପ୍ରମୁଖ ଆଜିର ଯୁବ ଗବେଷକମାନଙ୍କୁ ପ୍ରେରଣା ଯୋଗାଇବ ବୋଲି ଅତିଥିମାନେ ମତବ୍ୟକ୍ତ କରିଥିଲେ । ଡ଼ଃ ଷଡ଼ଙ୍ଗୀ କହିଥିଲେ ଯେ, ସଙ୍ଗୀତ ଓ ସାହିତ୍ୟକୁ ମନୁଷ୍ୟ ସଠିକ୍ କାର୍ଯ୍ୟରେ ଲଗାଇ ପାରିଲେ ରାଷ୍ଟ୍ରର ପ୍ରଭୂତ ଉନ୍ନତ ହୋଇପାରିବ ବୋଲି ମତବ୍ୟକ୍ତ କରିଥିଲେ । ଏହି ଅବସରରେ ବରିଷ୍ଠ ସାମ୍ବାଦିକ ତଥା ପୂଜ୍ୟପୂଜା ସଂସ୍କୃତି ସୁରକ୍ଷା ଅଭିଯାନର ଅଧ୍ୟକ୍ଷ ପ୍ରଦ୍ୟୁମ୍ନ ଶତପଥୀ ସ୍ୱାଗତ ଭାଷଣ ଓ ସଭାପତିତ୍ୱ କରି ମତ ରଖିଥିଲେ ଯେ, ଆଜିର ଯୁବପିଢୀ ମହାପୁରୁଷ ଓ ଶହୀଦମାନଙ୍କୁ ଭୁଲିବାରେ ଲାଗିଲେଣି । ବର୍ତ୍ତମାନ ସମୟରେ ସରକାର ଓ ଗଣମାଧ୍ୟମ ସମସ୍ତଙ୍କର ଦାୟିତ୍ୱ ରହିଛି ଯେ ଭବିଷ୍ୟତ ପିଢୀଙ୍କୁ ମହାପୁରୁଷମାନଙ୍କ କୀର୍ତ୍ତି ଓ କୃତି ସମ୍ବନ୍ଧରେ ଅବଗତ କରାଇବା । ସରକାରଙ୍କ ଉପରେ ପୂଜ୍ୟପୂଜା ଅଭିଯାନର ପ୍ରଭାବ ଧୀରେ ଧୀରେ ପଡ଼ିବାକୁ ଲାଗିଲାଣି ଯାହା ସ୍ୱାଗତଯୋଗ୍ୟ । ଏହି ଅବସରରେ ଡଃ ତ୍ରିପାଠୀଙ୍କୁ ବିଭିନ୍ନ ବ୍ୟକ୍ତିବିଶେଷ ଓ ସଂଗଠନ ପକ୍ଷରୁ ଜନ୍ମଦିନର ଶୁଭକାମନା ଜ୍ଞାପନ କରାଯାଇଥିଲା । ଐତହାସିକ ଡଃ ପ୍ରଫୁଲ୍ଲ ତ୍ରିପାଠୀ ମତବ୍ୟକ୍ତ କରିଥିଲେ ଯେ, ଓଡ଼ିଶାର ଗବେଷଣା ହେବା ଆବଶ୍ୟକ ଓ ନୂତନ ଗବେଷକମାନେ ସଠିକ୍ ଭାବରେ ତଥ୍ୟ ଉପସ୍ଥାପନ ପୂର୍ବକ ଗବେଷଣା, ତଥ୍ୟଭିତ୍ତିକ ବିବରଣୀ ପ୍ରଦାନ କଲେ ସମାଜ ପାଇଁ ହିତକର ହେବ । ଏହି କାର୍ଯ୍ୟକ୍ରମରେ ପୂଜ୍ୟପୂଜା ସଂସ୍କୃତିପ୍ରାଣର ସଦସ୍ୟ ଓ ବିଭିନ୍ନ ସଂଗଠନର ସଦସ୍ୟ, ବ୍ୟକ୍ତିବିଶେଷ ଯୋଗଦେଇ ଡଃ ତ୍ରିପାଠୀଙ୍କୁ ଜନ୍ମଦିନର ଶୁଭେଚ୍ଛା ଜ୍ଞାପନ କରିଥିଲେ । କାର୍ଯ୍ୟକ୍ରମକୁ ମୁଖପାତ୍ର ଅରବିନ୍ଦ ତ୍ରିପାଠୀଙ୍କ ସମେତ ଯୁଗ୍ମ ସଂଯୋଜକ ନାରାୟଣ ଚନ୍ଦ୍ର ଓଝା, ସଂଗ୍ରାମ ବଳିୟାରସିଂହ, ସୀତାଂଶୁ ଶେଖର ମହାରଣା, ସମିତା ମହାରଣା, ମିଟୁ ମହାରଣା ପ୍ରମୁଖ ପରିଚାଳନାରେ ସହଯୋଗ କରିଥିଲେ ।
