ଗରୁଡ ଦ୍ଵାଦଶୀ ପାଳିତ

ଭଣ୍ଡାରିପୋଖରୀ, ( ଦୁର୍ଯ୍ୟଧନ ଲେଙ୍କା) : ଭଣ୍ଡାରିପୋଖରୀ ବ୍ଲକ ନିର୍ଗୁଣ୍ଡି ପଞ୍ଚାୟତ ଗୁହାଳିଆ ଭାଗବତ ଟୁଙ୍ଗି ଠାରେ ଗରୁଡ ଦ୍ଵାଦଶୀ ମହାସମାରୋହରେ ପାଳିତ ହୋଇଯାଇଛି। ଭାଗବତ ଟୁଙ୍ଗି ପରିଚାଳକ ଉଦ୍ଧବ ରାଉତଙ୍କ ସଂଯୋଜନାରେ ଅନୁଷ୍ଠିତ ଉତ୍ସବରେ ମୁଖ୍ୟଅତିଥି ଭାବେ ଜିଲ୍ଲା ସଂସ୍କୃତି ଅଧିକାରୀଣୀ ତନୁଜା ଶ୍ରୀକା ଯୋଗଦେଇ ଗରୁଡ ଦ୍ଵାଦଶୀ ମହାତ୍ମ୍ୟ ସଂପର୍କରେ ବକ୍ତବ୍ୟ ପ୍ରଦାନ କରିଥିଲେ।ଅନ୍ୟ ମାନଙ୍କ ମଧ୍ୟରେ ଜିଲ୍ଲା କଳାକାର ସଂଘ ସଭାପତି ତ୍ରିଲୋଚନ ପଣ୍ଡା, ପ୍ରାକ୍ତନ ସରପଞ୍ଚ ସୁରେନ୍ଦ୍ର ପାଲ, ସମାଜ ସେବୀ ନାରାୟଣ ସାହୁ ପ୍ରମୁଖ ଯୋଗଦେଇ ଭାଗବତ ଟୁଙ୍ଗି ସହିତ ଜଡିତ ଉତ୍ସବ ବାବଦରେ ମତ ଦେଇଥିଲେ। ଏହି ଅବସରରେ ଅତିଥି ମାନେ ଅତିବଡ଼ି ଜଗନ୍ନାଥ ଦାସଙ୍କ ପାଦ ପଦ୍ମରେ ପୁଷ୍ପାଞ୍ଜଳି ଅର୍ପଣ କରିଥିଲେ। କାର୍ଯ୍ୟକ୍ରମରେ ଗ୍ରାମ ସମେତ ଆଖପାଖ ଅଞ୍ଚଳର ବହୁ ଶ୍ରଦ୍ଧାଳୁ ଯୋଗଦେଇ ବିଭୁ କୃପା ଲାଭ କରିଥିଲେ।