ନାଉଗାଁ ବଜାରରୁ ଜବରଦଖଲ ଉଚ୍ଛେଦ

ନାଉଗାଁ,(ଓ୍ବାଇଏନଏସ):ଜଗତସିଂହପୁର ଜିଲ୍ଲା ନାଉଗାଁ ତହସିଲ ଅଧିନ ନାଉଗାଁ ବଜାରରୁ ଗୁରୁବାର ଜବରଦଖଲ ଉଚ୍ଛେଦ କରାଯାଇଛି। ତହସିଲଦାର ଅକ୍ଷୟ କୁମାର ବଡୁ, ଅତିରିକ୍ତ ତହସିଲଦାର ଶରତ ପରିଡାଙ୍କ ଉପସ୍ଥିତିରେ ଏହି ଜବରଦଖଲ ଉଚ୍ଛେଦ କାର୍ଯ୍ୟ କରାଯାଇଥିଲା। ଜବରଦଖଲ ଉଚ୍ଛେଦ ପୁର୍ବରୁ ତହସିଲ କାର୍ଯ୍ୟାଳୟ ପକ୍ଷରୁ ନୋଟିସ ପ୍ରଦାନ କରାଯାଇଥିଲା। ପୋଲିସ ପ୍ରଶାସନ ସହାୟତାରେ ଶାନ୍ତିଶୃଙ୍ଖଳା ସହ ଜବରଦଖଲ ଉଛଦେ କରାଯାଇଥିଲା। ଧାର୍ଯ୍ୟ ସମୟ ପୂର୍ବରୁ ଦୋକାନୀମାନେ ଦୋକାନ ଗୃହ ଗୁଡିକୁ ଖାଲି କରିଥିଲେ। ସୂଚନାଯୋଗ୍ୟ ଯେ ଏହି ବଜାରଟି ବାଲିଭଉଁରୀ-ଶିଖରଘାଟ ପୂର୍ତ ବିଭାଗ ରାସ୍ତା ପାଶ୍ୱର୍ରେ ଅବସ୍ଥିତ। ଦେବୀନଦୀରେ ଶିଖରଘାଟ ସେତୁ ନିର୍ମାଣ ହେବା ପରେ ଏହି ରାସ୍ତାର ଗୁରୁତ୍ୱ ବୃଦ୍ଧି ପାଇଥିଲା। ପ୍ରତ୍ୟେହ ଏହି ରାସ୍ତାରେ ପୁରୀ, କେନ୍ଦ୍ରାପଡା, ପାରାଦୀପ, କଟକ ଆଦି ସ୍ଥାନକୁ ଯାତ୍ରୀବାହୀ,ମାଲବାହୀ ଗାଡି ଯିବା ଆସିବା କରିଥାଏ। ଗାଡି ଗୁଡିକ ଯିବା ସମୟରେ ଏହି ବଜାର ନିକଟରେ ରାସ୍ତା ସଂକୁଚିତ ଯୋଗୁ ଦୀର୍ଘ ସମୟ ଯାନବାହାନ ଅଟକି ରହୁଥିଲା। ଏପରିକି ଜରୁରୀକାଳିନ ସେବାରେ ଯାଉଥିବା ଆମ୍ବୁଲାନସ, ଅଗ୍ନିଶମ ଗାଡି ଗୁଡିକ ଦୀର୍ଘ ସମୟ ଅଟକି ରହୁଥିବାର ଦେଖିବାକୁ ମିଳିଥିଲା। ଜବରଦଖଲ ଉଚ୍ଛେଦ ପରେ ଏହି ରାସ୍ତା ଦେଇ ଯିବା ଆସିବା ସୁବିଧାଜନକ ହୋଇପାରିବ। ଅପରପକ୍ଷେ ଉକ୍ତ ବଜାରରେ ଛୋଟ ବଡ ଶହେରୁ ଉର୍ଦ୍ଧ୍ୱ ଦୋକାନୀମାନେ ବିଭିନ୍ନ ଛୋଟ ବ୍ୟବସାୟୀ କରି ନିଜର ପରିବାର ପ୍ରତିପୋଷଣ କରୁଥିଲେ। ଜବରଦଖଲ ଉଚ୍ଛେଦ ହେବା ପରେ ସେମାନେ ଜୀବିକା ହରାଇଥିବା କହିଛନ୍ତି। ତେଣୁ ସରକାରଙ୍କ ତରଫରୁ ଏହି ଦୋକାନୀମାନଙ୍କୁ ଥଇଥାନ କରିବା ପାଇଁ ଦାବି କରାଯାଇଛି।