ନିଖିଳ ଓଡିଶା ନାଇଟ ୱାଚମ୍ୟାନ ଆଣ୍ଡ ୱାର୍ଡ ଓ ହାଉସ କିପିଙ୍ଗ କର୍ମଚାରୀ ସଙ୍ଘ ପକ୍ଷରୁ ଧାରଣା

କେନ୍ଦ୍ରାପଡ଼ା,(ଚିତ୍ତ ରଞ୍ଜନ ଦାଶ):ନିଖିଳ ଓଡିଶା ନାଇଟ ୱାଚମ୍ୟାନ ଆଣ୍ଡ ୱାର୍ଡ ଓ ହାଉସ କିପିଙ୍ଗ କର୍ମଚାରୀ ସଙ୍ଘ ପକ୍ଷରୁ ବକେୟା ପାରିଶ୍ରମିକ ପ୍ରଦାନ ଦାବିରେ ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯାଇଛି। ସଙ୍ଘ ପକ୍ଷରୁ କୁହାଯାଇଛି ଯେ ବିଦ୍ୟାଳୟର ପିଲାମାନଙ୍କ ଭବିଷ୍ୟତ ଉଜ୍ଜ୍ୱଳ ଓ ବିଦ୍ୟାଳୟର ସୁରକ୍ଷା ପାଇଁ ରାତିରେ ଜଗିବା, ଝାଡୁ କରିବା ସହିତ ନିଜ ଜୀବନରୁ ପାଣି ଛଡାଇ ଦେଶର ଭବିଷ୍ୟତ ଆଶା ରଖି କାର୍ଯ୍ୟ କରୁଥିବା ରାତ୍ର ଜଗୁଆଳ ଓ ଝାଡୁଦାରମାନଙ୍କ ୧୮ମାସର ବକେୟା ପାରିଶ୍ରମିକ ତୁରନ୍ତ ପ୍ରଦାନ ଦାବିରେ ସଙ୍ଘ ପକ୍ଷରୁ ଧାରଣା ଦିଆଯାଇଥିଲା। ଏହି ଉପଲକ୍ଷେ ସଙ୍ଘର ସଭାପତି ବସନ୍ତ କୁମାର ସାହୁଙ୍କ ପୈାରହିତ୍ୟରେ ଅନୁଷ୍ଠିତ ପ୍ରତିବାଦ ସଭାରେ ଉପଦେଷ୍ଟା ଆଇନଜୀବୀ ରମଣୀରଞ୍ଜନ ରାଉତରାୟ,ସମାଜସେବୀ କେଦାରନାଥ ସାମନ୍ତରାୟ, ସିପିଆଇ ଜିଲ୍ଲା ସମ୍ପାଦକ ବିକାଶ ଚନ୍ଦ୍ର ବେଉରା, ନାରୀନେତ୍ରୀ ସଂଯୁକ୍ତା ରାଉତ, ଅଧ୍ୟାପକ ଅଜୟ ସାମଲ, ଅଜୟ କୁମାର ଦାସ,ସମ୍ପାଦିକା ଝରଣା ବେହେରା, କୋଷାଧ୍ୟକ୍ଷ ସୁଶାନ୍ତ କୁମାର ନାୟକ ପ୍ରମୁଖ ଯୋଗଦେଇ ବିଭିନ୍ନ ଦାବି ଉପସ୍ଥାପନ କରିଥିଲେ। ଶେଷରେ ଧାରଣାସ୍ଥଳରେ ଜିଲ୍ଲା ଶିକ୍ଷାଧିକାରୀ ପବିତ୍ର ମୋହନ ବାରିକ ପହଞ୍ଚି ଧାରଣାକାରୀଙ୍କ ସହ ଆଲୋଚନା କରି ତୁରନ୍ତ ବକେୟା ଦରମା ପ୍ରଦାନ କରାଯିବ ବୋଲି ପ୍ରତିଶୃତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା। ଅନ୍ୟମାନଙ୍କ ମଧ୍ୟରେ ସଙ୍ଘର ବିଭିନ୍ନ ବ୍ଲକର ପ୍ରତିନିଧି ଭାବେ ପବିତ୍ର ସାହୁ, ପ୍ରକାଶ କବି, ପବିତ୍ର ଦାସ, ପ୍ରମୋଦ କୁମାର ନାୟକ, ଚିନ୍ମୟ କୁମାର ସିଂହ, ବିରେନ ବିଶ୍ୱାଳ, ମଧୁସ୍ମିତା ବେହେରା, ଜଗନ୍ନାଥ ପଣ୍ଡା, ନମିତା ନାଥଶର୍ମା ପ୍ରମୁଖ ଶତାଧିକ ସଦସ୍ୟ ଧାରଣାରେ ଉପସ୍ଥିତ ଥିଲେ।