ଡ୍ରେନ୍ ସଫେଇ ନାଁରେ ଖର୍ଚ୍ଚ, ରାସ୍ତାରେ ନର୍ଦ୍ଦମା ପାଣି !
ଯାଜପୁର, (ପ୍ରଦୀପ କୁମାର ମଲ୍ଲିକ): ସହରର ରାସ୍ତାରେ ଗାଡ଼ି ଚାଲିବା କଥା, ଲୋକେ ଚାଲିବା କଥା; ହେଲେ ଯାଜପୁର ସହରର ଏକ ପ୍ରମୁଖ ରାସ୍ତା ଏବେ ନର୍ଦ୍ଦମା ପାଣିରେ ବୁଡ଼ି ରହିଛି। ଡ୍ରେନ୍ ସଫେଇ ଓ ଜଳ ନିଷ୍କାସନ ବ୍ୟବସ୍ଥାର ଅବ୍ୟବସ୍ଥା ଯୋଗୁଁ ସର୍ବହରା ଛକରୁ ବଲ୍ଲଭୀଘାଟ ପର୍ଯ୍ୟନ୍ତ ରାସ୍ତାରେ ଡ୍ରେନ୍ ପାଣି ବୋହୁଥିବା ଅଭିଯୋଗ ହୋଇଛି। ଫଳରେ ଦୈନିକ ଯାତାୟାତ କରୁଥିବା ଲୋକଙ୍କ ଦୁର୍ଦ୍ଦଶା ବଢ଼ିଛି।ବର୍ଷା ହେଲେ ସ୍ଥିତି ଆହୁରି ସଙ୍ଗୀନ। ଡ୍ରେନ୍ରେ ଜମିଥିବା ପଙ୍କ ଓ ଆବର୍ଜନା ଯୋଗୁଁ ପାଣି ନିଷ୍କାସନ ବାଧାପ୍ରାପ୍ତ ହୋଇ ନର୍ଦ୍ଦମା ପାଣି ରାସ୍ତାକୁ ଉଠିଆସୁଛି। ଦୁଇଚକିଆ ଯାନ ଯିବାବେଳେ ଦୂଷିତ ପାଣିର ଛିଟା ପଥଚାରୀଙ୍କ ଉପରେ ପଡ଼ୁଛି। ଦୁର୍ଗନ୍ଧରେ ନାକ ଫାଟୁଥିବା ବେଳେ ବୃଦ୍ଧ, ମହିଳା ଓ ଛୋଟ ପିଲାଙ୍କ ଯାତାୟାତ ମଧ୍ୟ କଷ୍ଟକର ହୋଇପଡ଼ିଛି।ଭକ୍ତଙ୍କ ଯାତାୟାତରେ ବି ଯନ୍ତ୍ରଣାଏହି ରାସ୍ତା କେବଳ ସହରବାସୀଙ୍କ ଦୈନିକ ଯାତାୟାତର ମାର୍ଗ ନୁହେଁ, ବିଭିନ୍ନ ଧାର୍ମିକ ସ୍ଥଳକୁ ଯାଉଥିବା ଭକ୍ତଙ୍କ ପାଇଁ ମଧ୍ୟ ଏକ ପ୍ରମୁଖ ରାସ୍ତା। ରାସ୍ତା ଉପରେ ଦୂଷିତ ପାଣି ବୋହୁଥିବାରୁ ଭକ୍ତମାନଙ୍କୁ ମଧ୍ୟ ନାକେଦମ୍ ହେବାକୁ ପଡ଼ୁଛି। ଏଭଳି ସ୍ଥିତି ସହରର ପରିମଳ ବ୍ୟବସ୍ଥା ନେଇ ପୌରପାଳିକାର ଦାୟିତ୍ୱବୋଧ ଉପରେ ପ୍ରଶ୍ନ ଉଠାଇଛି। ଠିକା ସଂସ୍ଥା କାମ କରୁଛି, ତଦାରଖ କରୁଛି କିଏ? ସହରର ଡ୍ରେନ୍ ସଫେଇ ଦାୟିତ୍ୱ ଠିକା ସଂସ୍ଥାକୁ ଦିଆଯାଇଥିବା କୁହାଯାଉଛି। ତେବେ ଯଦି ଡ୍ରେନ୍ରେ ପଙ୍କ ଓ ଆବର୍ଜନା ଜମି ରହିଛି ଏବଂ ଜଳ ନିଷ୍କାସନ ହେଉନାହିଁ, ତେବେ ସଫେଇ କାମର ବାସ୍ତବ ଚିତ୍ର କ’ଣ—ତାହା ନେଇ ଏବେ ଲୋକଙ୍କ ମନରେ ପ୍ରଶ୍ନ। ଠିକା ସଂସ୍ଥାକୁ ଦାୟିତ୍ୱ ଦେଇଦେଲେ ପୌରପାଳିକାର ଦାୟିତ୍ୱ ଶେଷ ହୋଇଯାଏ ନାହିଁ। ନିର୍ଦ୍ଧାରିତ ମାନଦଣ୍ଡରେ ସଫେଇ ହେଉଛି କି ନାହିଁ, କାମ ଠିକ୍ ଭାବେ ହେଉଛି କି ନାହିଁ ଓ ଅଭିଯୋଗ ପରେ ତୁରନ୍ତ ପଦକ୍ଷେପ ନିଆଯାଉଛି କି ନାହିଁ—ଏସବୁର ତଦାରଖ ପୌର ପ୍ରଶାସନର ଦାୟିତ୍ୱ। ତେଣୁ ସହରବାସୀଙ୍କ ସରଳ ପ୍ରଶ୍ନ—ଦାୟିତ୍ୱ ଠିକା ସଂସ୍ଥାର ହୋଇପାରେ, ହେଲେ ଜବାବଦେହି କିଏ? ‘ସ୍ୱଚ୍ଛ ସହର’ ଦାବି ନା କାଗଜରେ ସଫେଇ? ବର୍ଷା ପୂର୍ବରୁ ଡ୍ରେନ୍ ସଫେଇ ନେଇ ବିଭିନ୍ନ ପଦକ୍ଷେପ ନିଆଯାଇଥିବା କୁହାଯାଏ। ହେଲେ ବର୍ଷା ହେବାମାତ୍ରେ ଯଦି ନର୍ଦ୍ଦମା ପାଣି ରାସ୍ତାକୁ ଉଠିଆସେ, ତେବେ ସଫେଇ କାମର ପ୍ରକୃତ ଚିତ୍ର ନେଇ ପ୍ରଶ୍ନ ଉଠିବା ସ୍ୱାଭାବିକ। ରାସ୍ତାରେ ଦୂଷିତ ପାଣି ଜମି ରହିବା କେବଳ ଯାତାୟାତ ସମସ୍ୟା ନୁହେଁ। ଏହା ଦୁର୍ଗନ୍ଧ, ମଶା ବଂଶବୃଦ୍ଧି ଓ ଅସ୍ୱାସ୍ଥ୍ୟକର ପରିବେଶର କାରଣ ହୋଇପାରେ। ତେଣୁ ଏହାକୁ ଏକ ପରିମଳ ଓ ଜନସ୍ୱାସ୍ଥ୍ୟ ସମସ୍ୟା ଭାବେ ଦେଖିବାକୁ ଦାବି ହେଉଛି। ଲୋକଙ୍କ ଟିକସ, ରାସ୍ତାରେ ନର୍ଦ୍ଦମା ପାଣି! ସହରର ବିକାଶ ଓ ପରିମଳ ବ୍ୟବସ୍ଥା ପାଇଁ ସହରବାସୀ ପୌରପାଳିକାକୁ ବିଭିନ୍ନ ପ୍ରକାରର କର ପ୍ରଦାନ କରୁଛନ୍ତି। ତେବେ ଟିକସ ଦେଉଥିବା ଲୋକଙ୍କୁ ଯଦି ପୁଣି ରାସ୍ତାରେ ନର୍ଦ୍ଦମା ପାଣି ଭିତରେ ଯାତାୟାତ କରିବାକୁ ପଡ଼େ, ତେବେ ପୌରପାଳିକାର କାର୍ଯ୍ୟଦକ୍ଷତା ଓ ଜବାବଦେହିତା ଉପରେ ପ୍ରଶ୍ନ ଉଠିବା ସ୍ୱାଭାବିକ।ସହରବାସୀଙ୍କ ଦାବି, ସର୍ବହରା ଛକରୁ ବଲ୍ଲଭୀଘାଟ ପର୍ଯ୍ୟନ୍ତ ଡ୍ରେନ୍ର ସ୍ଥିତିକୁ ତୁରନ୍ତ ଅନୁଧ୍ୟାନ କରାଯାଉ। ଜାମ୍ ହୋଇଥିବା ସ୍ଥାନ ଚିହ୍ନଟ କରି ପଙ୍କ ଓ ଆବର୍ଜନା ବାହାର କରାଯିବା ସହ ଜଳ ନିଷ୍କାସନକୁ ସ୍ୱାଭାବିକ କରାଯାଉ। ଏଥିସହ ଠିକା ସଂସ୍ଥାର କାର୍ଯ୍ୟର ଯାଞ୍ଚ କରି ଅବହେଳା ଥିଲେ ନିୟମାନୁସାରେ ପଦକ୍ଷେପ ନିଆଯାଉ।ନଚେତ୍ ‘ସ୍ୱଚ୍ଛ ସହର’ର ସ୍ୱପ୍ନ କେବଳ ଫାଇଲ୍ ଓ ଫଟୋରେ ସୀମିତ ରହିଯିବ ନାହିଁ ତ? ଏହି ପ୍ରଶ୍ନ ଏବେ ଯାଜପୁର ସହରବାସୀଙ୍କ ମୁହଁରେ। ନର୍ଦ୍ଦମା ପାଣିର ଏହି ଯନ୍ତ୍ରଣାରୁ ଲୋକଙ୍କୁ କେବେ ମୁକ୍ତି ମିଳୁଛି, ଏବେ ତାହାକୁ ଅପେକ୍ଷା।
