ରୋଗ ଯନ୍ତ୍ରଣାରେ ଅତିଷ୍ଠ ବୃଦ୍ଧଙ୍କ ଆତ୍ମହତ୍ୟା ଉଦ୍ୟମ
ହାଟଡିହି (ଓ୍ବାଇଏନଏସ): ଦୀର୍ଘଦିନ ଧରି ରୋଗରେ ପୀଡ଼ିତ ଜଣେ ୭୫ ବର୍ଷୀୟ ବୃଦ୍ଧ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ହାଟଡିହି ବ୍ଲକ ଅନ୍ତର୍ଗତ ବେଲବନ୍ଧ ଗ୍ରାମର ଗୌରାଙ୍ଗ ଚରଣ ସା ଦୀର୍ଘଦିନ ଧରି କିଡ୍ନି ରୋଗରେ ପୀଡ଼ିତ ଥିବାବେଳେ ଆଜି ଘରେ ଥିବା ଫିନାଇଲ ପିଇ ଦେଇଥିବା ଜଣାପଡ଼ିଛି। ସୂଚନା ଅନୁଯାୟୀ, ଗୌରାଙ୍ଗଙ୍କ ପରିବାରରେ କେବଳ ସେ ଓ ତାଙ୍କ ପତ୍ନୀ ରହୁଛନ୍ତି। ଦୀର୍ଘଦିନ ଧରି କିଡ୍ନି ରୋଗରେ ପୀଡ଼ିତ ଥିବାରୁ ତାଙ୍କୁ ନିୟମିତ ଚିକିତ୍ସାର ଆବଶ୍ୟକତା ରହିଛି। ମାତ୍ର ପରିବାରରେ ଅନ୍ୟ କେହି ନଥିବା ଏବଂ ଆର୍ଥିକ ସ୍ଥିତି ସ୍ୱଚ୍ଛଳ ନଥିବାରୁ ଉପଯୁକ୍ତ ଚିକିତ୍ସା କରାଇବାରେ ସମସ୍ୟା ଦେଖାଦେଉଥିବା କୁହାଯାଉଛି। ଏଭଳି ପରିସ୍ଥିତିରେ ଆଜି ସେ ଘରେ ଥିବା ଫିନାଇଲ ପିଇ ଦେଇଥିଲେ। ଏହା ଜାଣିବା ପରେ ସାହିପଡ଼ିଶା ଲୋକେ ତୁରନ୍ତ ତାଙ୍କୁ ଉଦ୍ଧାର କରି ଶାଳଣିଆଁ ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରେ ତାଙ୍କର ଚିକିତ୍ସା ଜାରି ରହିଛି। ବାର୍ଦ୍ଧକ୍ୟ ଅବସ୍ଥାରେ ଦୀର୍ଘଦିନର ରୋଗ, ଆର୍ଥିକ ଅନାଟନ ଓ ପାରିବାରିକ ସହାୟତାର ଅଭାବ ଏହି ଘଟଣାକୁ ନେଇ ଚିନ୍ତା ବଢ଼ାଇଛି। ବୃଦ୍ଧଙ୍କୁ ଉନ୍ନତ ଚିକିତ୍ସା ଓ ଆବଶ୍ୟକୀୟ ସହାୟତା ଯୋଗାଇଦେବାକୁ ସ୍ଥାନୀୟ ଅଞ୍ଚଳରେ ଦାବି ହେଉଛି।
