ନାବାଳକଙ୍କୁ ଗଣ ବଳାତ୍କାର, ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି
ହାଟଡିହି (ଓ୍ବାଇଏନଏସ): ବାହାର ରାଜ୍ୟକୁ କାମକୁ ଯାଉଥିବା ଓଡ଼ିଆ ଶ୍ରମିକଙ୍କ ସୁରକ୍ଷାକୁ ନେଇ ପୁଣି ଥରେ ପ୍ରଶ୍ନ ଉଠିଛି। କେନ୍ଦୁଝର ଜିଲା ହାଟଡ଼ିହି ବ୍ଲକ୍ ଅଞ୍ଚଳରୁ ତାମିଲନାଡୁ ଯାଇଥିବା ଜଣେ ୧୫ ବର୍ଷୀୟ ନାବାଳକଙ୍କ ସହ ଏକାଧିକ ଯୁବକ ଅପ୍ରାକୃତିକ ଯୌନ ସମ୍ପର୍କ ରଖିବା ଦ୍ୱାରା ନା ବାଳକ ଗୁରୁତର ଅସୁସ୍ଥ ହୋଇଛନ୍ତି I ପୀଡ଼ିତଙ୍କ ସ୍ବାସ୍ଥ୍ୟ ଅବସ୍ଥା ଗୁରୁତର ହୋଇ ପଡ଼ିଥିବା ବେଳେ ସେ ଏବେ କଟକ ମେଡିକାଲରେ ଚିକିତ୍ସାଧୀନ ଅବସ୍ଥାରେ ଜୀବନ ସହ ସଂଘର୍ଷ କରୁଛନ୍ତି। ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରିଛି। ସୂଚନା ଅନୁସାରେ, ନାବାଳକ ଜଣକ ତାମିଲନାଡୁର ଏକ ଲୁଗା କମ୍ପାନୀରେ କାମ କରୁଥିଲେ। ନଭେମ୍ବର ୪ରେ ନିଜ ରୁମ୍ରେ ଥିବା ବେଳେ ୪ ଜଣ ଯୁବକ ତାଙ୍କ ସହ ଅପ୍ରାକୃତିକ ଯୌନ ସମ୍ବର୍କ ରଖିଥିଲେ। ନାବାଳକ ଜଣକ ମୁର୍ମୁଷ ଅବସ୍ଥାରେ ନିଜ ରୁମ୍ରେ ପଡ଼ିଥିବା ବେଳେ ତାଙ୍କର ଜଣେ ସମ୍ପର୍କୀୟ ଦେଖିବା ପରେ ସେହି ସମ୍ପର୍କୀୟଙ୍କ ସହଯୋଗରେ ଓଡ଼ିଶା ଆସି ନଭେମ୍ବର ୮ରେ ଘରେ ପହଞ୍ଚିଥିଲେ। ପରଦିନ ୯ ତାରିଖ ତାଙ୍କୁ କଟକ ମେଡିକାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ନାବାଳକଙ୍କ ପରିବାର ଲୋକ ଶୁକ୍ରବାର ନନ୍ଦିପଦା ଥାନାରେ ଏନେଇ ଅଭିଯୋଗ କରିଛନ୍ତି। ଆନନ୍ଦପୁର ଏସ୍ଡିପିଓ କମଳ କୁମାର ପଣ୍ଡା କହିଛନ୍ତି, ଉକ୍ତ ଘଟଣା ତାମିଲନାଡୁରେ ଘଟିଛି। ଅଭିଯୋଗ ଅନୁସାରେ ଜିରୋ ଏଫ୍ଆଇଆର କରାଯାଇ ଅଭିଯୋଗକୁ ତାମିଲନାଡୁର ସମ୍ପୃକ୍ତ ଥାନାକୁ ପଠାଇ ଦିଆଯାଇଛି । ନନ୍ଦିପଦା ଥାନାଧିକାରୀ ଧର୍ମେନ୍ଦ୍ର କୁମାର ଶାନ୍ତି କହିଛନ୍ତି, ପୀଡ଼ିତ ନାବାଳକ କଟକ ମେଡିକାଲରେ ଚିକିତ୍ସିତ ହେଉଛନ୍ତି। ପରିବାର ତରଫରୁ ଅଭିଯୋଗ ହେବା ପରେ ଆଇନଗତ କାର୍ଯ୍ୟାନୁଷ୍ଠାନ ନିମନ୍ତେ ଅଭିଯୋଗକୁ ତାମିଲନାଡୁ ସ୍ଥାନାନ୍ତର କରାଯାଇଛି। ଅଭିଯୁକ୍ତଙ୍କୁ ତୁରନ୍ତ ଗିରଫ କରି କଠୋର ଦଣ୍ଡ ଦିଆଯାଉ ବୋଲି ପରିବାର ଲୋକ ଦାବି କରିଛନ୍ତି।
