ବୁଲାଣି ଘାଟିରେ କାର ଓଲଟି ୧୫ ଫୁଟ ତଳକୁ ଖସିଲା, ୩ ଗୁରୁତର

ପାରଳାଖେମୁଣ୍ଡି, (ତାରିଣୀ ପ୍ରସାଦ ପଣ୍ଡା):ଗଜପତି ଜିଲ୍ଲା ମୋହନା ବ୍ଲକ ଅନ୍ତର୍ଗତ ଖ୍ରୀଷ୍ଟପୁର ଗ୍ରାମ ନିକଟରେ ରହିଥିବା ଘାଟିର ବୁଲାଣିଆ ରାସ୍ତାରେ ଗତକାଲି ସକାଳ ସମୟରେ ଏକ କାରଟି ଭରସାମ୍ୟ ହରାଇ ଓଲଟି ପଡିବା ଯୋଗୁଁ କରରେ ଡ୍ରାଇଭରଙ୍କ ସମେତ ବସିଥିବା ୫ ଜଣ ଆହତ ହୋଇଛନ୍ତି. ଏଥିରୁ ୩ ଜଣ ଗୁରୁତର ଆହତ ହୋଇଛନ୍ତି. ଗତକାଲି ପୁରୀରୁ ଏହି କାରଟି ଜୟପୁର ଅଭିମୁଖେ ଯାଉଥିବାବେଳେ ଖ୍ରୀଷ୍ଟପୁର ଗ୍ରାମର ବୁଲାଣି ଘାଟିରେ କୌଣସି କାରଣରୁ କାରଟି ଭରସାମ୍ୟ ରକ୍ଷା କରି ନ ପାରିବାରୁ ୧୫ ଫୁଟ ତଳକୁ କାରଟି ଓଲଟି ପଡିଥିଲା. କରରେ ବସିଥିବା ୫ ଜଣଙ୍କ ମଧ୍ୟରୁ ଜଣେ ମହିଳା ଥିବାବେଳେ ୪ ଜଣ ପୁରୁଷ ଅଛନ୍ତି. ଆହତ ମାନେ ହେଲେ ନରେଶ ପଣ୍ଡା, ଦିଲ୍ଲୀପ ରଥ, ରାମଚନ୍ଦ୍ର ମିଶ୍ର, ଦେବାଶିଷ ପଟ୍ଟନାୟକ ଏବଂ ସରୋଜିନୀ ରଥ. ଏମାନଙ୍କୁ ଗତକାଲି ମୋହନା ସରକାରୀ ଡାକ୍ତରଖାନରେ ଭର୍ତ୍ତି କରାଯାଇଥିଲା. ୩ ଜଣଙ୍କ ଅବସ୍ଥା ଗୁରୁତର ଥିବାରୁ ଗତକାଲି ଅପରାହ୍ନରେ ଏହି ୩ ଜଣଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି ବୋଲି ଡାକ୍ତର ଜୟ କୁମାର ପଣ୍ଡା ସୂଚନା ଦେଇଛନ୍ତି. ଘଟଣା ନେଇ ମୋହନା ପୋଲିସ ଥାନାରେ ଏକ ମାକଦମ ରୁଜୁ ହୋଇ ତଦନ୍ତ ଜାରି ରହିଛି.