ନାସା ବୈଜ୍ଞାନିକଙ୍କୁ ବିଦ୍ୟାଳୟରେ ସମ୍ବର୍ଦ୍ଧନା

ଯାଜପୁର:ଯାଜପୁର ବ୍ଲକ ଭୁବନେଶ୍ୱରପୁର ପଂଚାୟତ ଅନ୍ତର୍ଗତ ଶେଷଦେବ ବାସନ୍ତୀ ସରକାରୀ ବିଦ୍ୟାଳୟ ପରିସରରେ ନାସାରେ କାର୍ଯ୍ୟରତ ବୈଜ୍ଞାନିକ ତଥା ବିଦ୍ୟାଳୟର ପୁରାତନ ଛାତ୍ର ସୁରେନ୍ଦ୍ର ନାଥ ରାୟଙ୍କୁ ସମ୍ବର୍ଦ୍ଧିତ କରାଯାଇଛି । ଶ୍ରୀଯୁକ୍ତ ରାୟ ନିଜ ଗାଁ ଆଦମପୁରକୁ ଛୁଟିରେ ଆସିଥିବା ବେଳେ ନିଜ ସ୍କୁଲକୁ ବୁଲିବାକୁ ଆସିଥିଲେ । ଏହି ଅବସରରେ ଏକ ସ୍ୱତନ୍ତ୍ର ସମ୍ବର୍ଦ୍ଧନା ସଭା ରେ ମୋ ସ୍କୁଲର ଅଧ୍ୟକ୍ଷ ତଥା ବିଦ୍ୟାଳୟର ପୂର୍ବତନ ପ୍ରଧାନଶିକ୍ଷକ ସୁରେନ୍ଦ୍ର କୁମାର ରାୟ ଅଧ୍ୟକ୍ଷତା କରିଥିଲେ । ପୂର୍ବତନ ଛାତ୍ର ସନ୍ତୋଷ ଦାସ ସ୍ୱାଗତ ଭାଷଣ ଦେଇ ଶ୍ରୀଯୁକ୍ତ ରାୟ ବିଦ୍ୟାଳୟର ଛାତ୍ର ଛାତ୍ରୀଙ୍କ ପ୍ରେରଣାର ଉତ୍ସ ବୋଲି ମତ ଦେଇଥିଲେ । ସମ୍ବର୍ଦ୍ଧନାର ଉତରରେ ଡଃ ରାୟ କହିଥିଲେ ସେ ସାଧାରଣ ପରିବାରରେ ଜନ୍ମ ହୋଇ ମଧ୍ୟ ସାଧନା ଓ ଦୂରଦୃଷ୍ଟି ବଳରେ ସପଂଳତାର ସହ ଏହି ସୋପାନରେ ପହଂଚିପାରିଛନ୍ତି । ଏଥିପାଇଁ ଦୃଢ଼ ଆତ୍ମବିଶ୍ୱାସ ର ଆବଶ୍ୟକତା ରହିଛି ବୋଲି ସେ ମତ ଦେଇଥିଲେ । ଏହି ଅବସରରେ ବିଦ୍ୟାଳୟରେ ପ୍ରତିଷ୍ଠା ହୋଇଥିବା ପ୍ରାଣକୃଷ୍ଣ ପରିଜା ଶିଶୁ ବିଜ୍ଞାନଗାରର ବିକାଶ ପାଇଁ ୧୦ ହଜାର ଟଙ୍କା ପ୍ରଦାନ କରିବାକୁ ଘୋଷଣା କରିଥିଲେ । ଏହି କାର୍ଯ୍ୟକ୍ରମ ପରିଚାଳନାରେ ବିଦ୍ୟାଳୟ ପରିଚାଳନା କମିଟିର ସଭାପତି ସୁରେଶ ସାହୁ,ମୋ ସ୍କୁଲ ସଭ୍ୟ ଗଣେଷ ସାହୁ,ନରେନ୍ଦ୍ର ସାହୁ,ଅନନ୍ତ ସାହୁ,ଶିକ୍ଷକ ଧିରେଶ ଦାସ,ଗଦାଧର ବିଶ୍ୱାଳ,ମଂଜୁଲତା ବିହାରୀ,ମୁରସିଦ ଅଲ୍ଲି,ରତିକାକନ୍ତ ରାୟ,ଅବିନାଶ ତରାଇ ଏବଂ ସୁରେନ୍ଦ୍ର ବେହେରା ସହଯୋଗ କରିଥିଲେ