ମୌସୁମୀ ସାହିତ୍ୟ ଓ ସଂସ୍କୃତି ପରିଷଦର ପୁସ୍ତକ ଉନ୍ମୋଚନ ଓ ସମ୍ବର୍ଦ୍ଧନା ସଭା

କେନ୍ଦ୍ରାପଡା, (ଚିତ୍ତରଞ୍ଜନ ଦାସ) :-ମୌସୁମୀ ସାହିତ୍ୟ ଓ ସଂସ୍କୃତି ପରିଷଦ ପକ୍ଷରୁ କେନ୍ଦ୍ରାପଡା ସ୍ୱୟଂଶାସିତ ମହାବିଦ୍ୟାଳୟ ସମ୍ମିଳନୀ କକ୍ଷରେ ପୁସ୍ତକ ଉନ୍ମୋଚନ ଓ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଯାଇଛି । ପରିଷଦର ସଭାପତି ପ୍ରଫେସର ନନ୍ଦ କିଶୋର ପରିଡାଙ୍କ ସଭାପତିତ୍ୱରେ ଅନୁଷ୍ଠିତ ଏହି ଉତ୍ସବରେ ମୁଖ୍ୟ ଅତିଥି ଭାବେ ଶାନ୍ତି ନିକେତନର ପ୍ରଫେସର ଡଃ. ବୈଷ୍ଣବ ଚରଣ ସାମଲ, ମୁଖ୍ୟବକ୍ତା ଭାବେ କେନ୍ଦ୍ରୀୟ ବିଶ୍ୱ ବିଦ୍ୟାଳୟର ପ୍ରଫେସର ଡଃ. କୃଷ୍ଣଚନ୍ଦ୍ର ପ୍ରଧାନ ଓ ସମ୍ମାନୀତ ଅତିଥି ଭାବେ ବରିଷ୍ଠ ସାମ୍ବାଦିକ, ସ୍ତମ୍ଭକାର ଶ୍ରୀରାମ ଦାଶ ପ୍ରମୁଖ ଯୋଗଦେଇ କବି ଡଃ. ଶ୍ରୀଧର ସାମଲଙ୍କ ଗୀତି କବିତା ସଂକଳନ “ଆଶାବରୀ”କୁ ଉନ୍ମୋଚନ କରିଥିଲେ । ଏହି ଅବସରରେ ଅତିଥିମାନେ ବିଭିନ୍ନ କ୍ଷେତ୍ରରେ ପାରଦର୍ଶିତା ହାସଲ କରିଥିବା ପରିବେଶବୀତ କାଶୀନାଥ ରାଉତରାୟ, ସାମ୍ବାଦିକ ଚିତ୍ତରଞ୍ଜନ ଦାସ, ଆଶୁକବି ହେମନ୍ତ ଜେନା, କବି ଶୁଭାଂଶୁ କୁମାର ଦାସ, କୁଞ୍ଜବିହାରୀ ପରିଡା, ବିଜୟ ପରିଡା ପ୍ରମୁଖ ପ୍ରତିଭାମାନଙ୍କୁ “ମୌସୁମୀ ପ୍ରତିଭା ସମ୍ମାନ” ପ୍ରଦାନ କରି ସମ୍ମାନିତ କରିଥିଲେ । ମୁଖ୍ୟଅତିଥି ପ୍ରଫେସର ସାମଲ କହିଥିଲେ ଯେ କେନ୍ଦ୍ରାପଡା ମାଟିର ଐତିହ୍ୟ ଓ ସଂସ୍କୃତିକୁ ଛାଡି ଓଡିଶାର ଇତିହାସ ଲେଖାଯାଇପାରିବ ନାହିଁ । ଲେଖକ ଡଃ. ଶ୍ରୀଧର ସାମଲଙ୍କ ‘ନିଶବ୍ଦ ଆଳାପ’ ଓ ‘ସ୍ୱପ୍ନ କିଛି ବାକିଥାଉ’ ପୁସ୍ତକ ପରେ ଆଜି ତାଙ୍କର ତୃତୀୟ ପୁସ୍ତକ “ଆଶାବରୀ”ର ଲୋକାର୍ପଣ ହୋଇଛି । ଆଜି ଆମେ ମୋହର ଦ୍ୱାରା ପରିଚିତ ହେଉଛେ । କିନ୍ତୁ ମୋହର ଜଣେ ସାହିତ୍ୟିକର ପ୍ରକୃତ ପରିଚୟ ନୁହେଁ । ମୋହର ପାଇଁ ଆମେ ବିବେକ ଭ୍ରଷ୍ଟ ହୋଇଯାଉଛେ ବୋଲି ସେ ମତବ୍ୟକ୍ତ କରିଥିଲେ । ମୁଖ୍ୟବକ୍ତା ଡଃ. ପ୍ରଧାନ କହିଥିଲେ ଯେ ଡଃ. ଶ୍ରୀଧର ସାମଲଙ୍କ ଆଶାବରୀ ପ୍ରଣୟ ଓ ଚେତନାକୁ ନେଇ ପରିପୃଷ୍ଠ ହୋଇଛି । କେନ୍ଦ୍ରାପଡାର ସାହିତ୍ୟ ପ୍ରତିଭାମାନଙ୍କୁ ଲୋକଲୋଚନକୁ ଆଣିବା ପାଇଁ ଏକ ସୁଯୋଗ ସୃଷ୍ଟି କରାଯିବାକୁ ସମସ୍ତଙ୍କ ସହଯୋଗ କାମନା କରିଥିଲେ ଡଃ. ପ୍ରଧାନ । ସମ୍ମାନୀତ ଅତିଥି ଶ୍ରୀରାମ ଦାଶ କହିଥିଲେ ଯେ ଆଧୁନିକତାର କବଳରେ ଗୀତି କବିତା ଲୋପ ପାଇଯିବ ବୋଲି ଲୋକେ ଭାବୁଥିଲେ । କିନ୍ତୁ ଗୀତି କବିତା ଆଜିବି ବଞ୍ଚି ରହିଛି ଓ ଭବିଷ୍ୟତରେ ବଞ୍ôଚ ରହିବ । କେନ୍ଦ୍ରାପଡା ମାଟି ହେଉଛି ବହୁ ବିଶିଷ୍ଟ ଗୀତିକାର ଓ ସାହିତ୍ୟିକଙ୍କ ଜନ୍ମମାଟି । କେନ୍ଦ୍ରାପଡାର ଇତିହାସ ଉପରେ ଗବେଷଣାତ୍ମକ ସାହିତ୍ୟ ସୃଷ୍ଟି କରିବାକୁ ସେ ଉପସ୍ଥିତ ସାହିତ୍ୟିକମାନଙ୍କୁ ଆହ୍ୱାନ ଦେଇଥିଲେ । ଅନ୍ୟତମ ଅତିଥି କଲେଜ ଉପାଧ୍ୟକ୍ଷ ପ୍ରଫେସର ଗୋପାଳ ଚନ୍ଦ୍ର ବେହେରା ଅଭିଭାଷଣ ପ୍ରଦାନ କରିଥିଲେ । ହେମନ୍ତ ଜେନା ଅତିଥି ପରିଚୟ ପ୍ରଦାନ କରିଥିବା ବେଳେ କଲେଜ ଅଧ୍ୟକ୍ଷ ଡଃ. ରାଜେନ୍ଦ୍ର ପ୍ରସାଦ ତ୍ରିପାଠୀ ସ୍ୱାଗତ ଭାଷଣ, ପରିଷଦର ସମ୍ପାଦକ ଡଃ. ଶ୍ରୀଧର ସାମଲ ବିବରଣୀ ପାଠ ଓ ଅଧ୍ୟାପକ ବୃନ୍ଦାବନ ଦାସ ଧନ୍ୟବାଦ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ ଡଃ. ଗିରିଶ ପାତ୍ର, କୈଳାସ ଚନ୍ଦ୍ର ବରାଳ, ପ୍ରାଧ୍ୟାପକ ତପନ କୁମାର ପତି, ଡଃ. ବାସୁଦେବ ଦାସ, ମେଜର ଭରତ ଚନ୍ଦ୍ର ଜେନା, ଅବନ୍ତୀ ବେହେରା, ଓଡିଶା ସାହିତ୍ୟ ଏକାଡେମୀ ସଦସ୍ୟ ସରୋଜ କୁମାର ମହାନ୍ତି, ପ୍ରେମାନନ୍ଦ ଖଣ୍ଡୁଆଳ, ରଣଧୀର ଜେନା, ରାଜେଶ ପଣ୍ଡା, ଦୁଷ୍ମନ୍ତ ମଲ୍ଲିକ, ପ୍ରଦୀପ କୁମାର ଦାଶ ପ୍ରମୁଖ ବହୁ ସାହିତ୍ୟିକ, କବି ଓ ବୁଦ୍ଧିଜୀବିମାନେ ଉପସ୍ଥିତ ଥିଲେ ।