ନୂଆଗାଁରେ ଜଳିଗଲା ୨ବଖରା

ହାଟଡ଼ିହି, (ବିକାଶ ବିଶ୍ୱାଳ):ହାଟଡ଼ିହି ବ୍ଲକ ଆଇତିପୁର ପଞ୍ଚାୟତ ଅଧିନସ୍ଥ ନୂଆଗାଁ ଗ୍ରାମରେ ୨ବଖରା ଘର ଜଳିଯାଇଛି। ସୂଚନା ଅନୁସାରେ, ସୋମବାର ବିଳମ୍ବିତ ରାତିରେ କୌଣସି କାରଣ ବଶତଃ ଗ୍ରାମର ବିଦ୍ୟାଧର ବେହେରାଙ୍କ ଘରେ ନିଆଁ ଲାଗି ସମ୍ପୂର୍ଣ୍ଣ ୨ବଖରା ଘର ସମେତ ଘରର ସମସ୍ତ ସରଞ୍ଜାମ ସହ ଦରକାରୀ କାଗଜପତ୍ର ଜଳିପୋଡ଼ି ନଷ୍ଟ ହୋଇଯାଇଛି । ପରିବାର ଲୋକେ ନିଆଁକୁ ଆୟତ୍ତ କରି ନପାରିବାରୁ ଅଗ୍ନିଶମ ବାହିନୀକୁ ଖବର ଦେଇଥିଲେ। ଖବର ପାଇ ନିକଟସ୍ଥ ଭଣ୍ଡାରିପୋଖରୀ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ । ଏହି ଅଗ୍ନିକାଣ୍ଡରେ ବିଦ୍ୟାଧରଙ୍କ ୨ବଖରା ଘର ସମ୍ପୂର୍ଣ୍ଣ ଜଳିପୋଡ଼ି ନଷ୍ଟ ହୋଇଯାଇଥିଲା ବେଳେ ବିଦ୍ୟାଧରଙ୍କ ଘରକୁ ଲାଗିଥିବା ଅନ୍ୟଜଣେ ପଡୋଶୀଙ୍କ ଘରେ ମଧ୍ୟ ଆଂଶିକ ନିଆଁ ଲାଗିଥିଲା। ତେବେ ଏହି ଅଗ୍ନିକାଣ୍ଡରେ ବିଦ୍ୟାଧରଙ୍କ ଅନେକ କ୍ଷୟକ୍ଷତି ହୋଇଛି। ଖବର ପାଇ ଆଜି ରାଜସ୍ବ ନିରୀକ୍ଷକ ଘଟଣାସ୍ଥଳକୁ ଯାଇ ପରିଦର୍ଶନ ପରେ ଖଣ୍ଡିଏ ପଲିଥିନ ଯୋଗାଇ ଦେଇଛନ୍ତି। ବିଦ୍ୟାଧର ଜଣେ ନିହାତି ଗରିବ ଶ୍ରେଣୀର ଲୋକ ହୋଇଥିଲା ବେଳେ ଏବେ ସମ୍ପୂର୍ଣ୍ଣ ବାସଶୁନ୍ୟ ହୋଇ ଯାଇଛନ୍ତି। ଏପରି ଅବସ୍ଥାରେ ସେ ଏବେ ନିଜ ସ୍ତ୍ରୀ ଓ ୨ପିଲାଙ୍କୁ ନେଇ କିପରି ଦିନକାଟିବେ ତାହା ଚିନ୍ତାର କାରଣ ସାଜିଥିବା ବେଳେ ପ୍ରଶାସନ ପକ୍ଷରୁ ତାଙ୍କୁ ତୁରନ୍ତ ଆବାସ ଯୋଜନାରେ ଘର ଖଣ୍ଡିଏ ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି।