ଡ୍ରାଇଭର୍ ମହାସଂଘର ଷ୍ଟିୟରିଂ ଛାଡ ଆନ୍ଦୋଳନ ଅବ୍ୟାହତ
ଆସିକା (ୱାଇଏନ୍ଏସ୍) ଓଡିଶା ଡ୍ରାଇଭର୍ ମହାସଂଘର ଆହ୍ୱାନକ୍ରମେ ୭ ଦଫା ଦାବୀ ପୂରଣ ଲାଗି ରାଜ୍ୟବ୍ୟାପୀ ଷ୍ଟିୟରିଂ ଛାଡ ଆନ୍ଦୋଳନ ଗତ ମଙ୍ଗଳବାର ଠାରୁ ଆରମ୍ଭ ହୋଇଥିବା ଜଣାପଡିଛି । ଏହି ଷ୍ଟିୟରିଂ ଛାଡ ଆନ୍ଦୋଳନରେ ଆସିକା ସଂଘର ଶତାଧୀକ କାର୍ଯ୍ୟକର୍ତ୍ତା ସାମିଲ୍ ହୋଇଥିବା ଯୋଗୁଁ ଦୈନନ୍ଦିନ ଜୀବନଯାତ୍ରା ବିଶେଷ ଭାବେ ପ୍ରଭାବିତ ହେଉଛି । ଡ୍ରାଇଭର୍ ମହାସଂଘର ଷ୍ଟିୟରିଂ ଛାଡ ଆନ୍ଦୋଳନ ଗୁରବାର ତୃତୀୟ ଦିନରେ ପହଞ୍ଚିସାରିଛି । ଏହି ଆନ୍ଦୋଳନ ଯୋଗୁଁ ଯାତ୍ରୀବାହୀ ଘରୋଇ ବସ୍, ମିନିବସ୍ ଓ ଅନ୍ୟାନ୍ୟ କେତେକ ଯାନ ଚଳାଚଳ ପ୍ରାୟତଃ ବନ୍ଦ ରହିଥିବା ଯୋଗୁଁ ସାଧାରଣ ଜନତାଙ୍କ ଠାରୁ ଆରମ୍ଭ କରି ଯୁକ୍ତ ଦୁଇ ପ୍ରଥମ ବର୍ଷରେ ନାମ ଲେଖାଇବା ପାଇଁ ଚୟନ ହୋଇଥିବା ବିଦ୍ୟାର୍ଥୀମାନେ ନିଜ ନିଜ ଗନ୍ତବ୍ୟସ୍ଥଳରୁ ଯାଇନପାରି ନାନା ସମସ୍ୟାର ସମ୍ମୁଖୀନ ହେଉଥିବା ଦେଖିବାକୁ ମିଳୁଛି । ଗାଡି ଯାଞ୍ଚ ପାଇଁ ପୋଲିସକୁ ଅଧିକ କ୍ଷମତା ପ୍ରଦାନକୁ ବିରୋଧ, ସାମାଜିକ ସୁରକ୍ଷାକୁ ସୁନିଶ୍ଚିତ କରିବା ଭଳି ଅନ୍ୟାନ୍ୟ କେତେକ ଦାବୀ ପୂରଣ ଲାଗି ଡ୍ରାଇଭର୍ ମହାସଂଘର ଆହ୍ୱାନକ୍ରମେ ଏହି ଷ୍ଟିୟରିଂ ଛାଡ ଆନ୍ଦୋଳନ ଜାରି ରହିଥିବା ଜଣାପଡିଛି । ୭ ଦଫା ଦାବୀ ପୂରଣ କର ନଚେତ୍ ଗାଡି ଜମା ଚାଲିବନି ଏଭଳି ଜିଦ୍ରେ ଅଟଳ ରହିଛି ଡ୍ରାଇଭର୍ ମହାସଂଘ । ଖରାବର୍ଷା ଶୀତ କାକରକୁ ତିଳେମାତ୍ର ଖାତିର୍ ନକରି ନିଜର ପରିବାର ଓ ମୋହମାୟା ସଂସାରକୁ ଛାଡି ରାସ୍ତା ଉପରେ ନିଜ ଜୀବନକୁ ପ୍ରତିଟି ମୂହୁର୍ତ୍ତରେ ବାଜି ଲଗାଇ ଯାନବାହାନ ଚଳାଇ ଜନସାଧାରଣଙ୍କୁ ସେବା ଯୋଗାଇଦେଇ ଆସୁଥିବା ଡ୍ରାଇଭର ମହାସଂଘର ଦୀର୍ଘ ଦିନର ନ୍ୟାୟୋଚିିତ ଦାବୀ ପୂରଣ ଦିଗରେ ସରକାର ପଦକ୍ଷେପ ନେବାକୁ ଆସିକା ସଂଘର ସଭାପତି ଜଗନ୍ନାଥ ବେହେରା ଓ ସଂପାଦକ ସୁଶାନ୍ତ କୁମାର ସେଠୀ ଅନୁରୋଧ କରିଛନ୍ତି । ଡ୍ରାଇଭର ମହାସଂଘର ଷ୍ଟିୟରିଂ ଛାଡ ଆନ୍ଦୋଳନ ଯୋଗୁଁ ଆସିକା ଅଞ୍ଚଳକୁ ରନ୍ଧନ ଗ୍ୟାସ ଗାଡି ଆସିପାରିନଥିବା ବେଳେ ପେଟ୍ରୋଲ୍ ଟାଙ୍କିକୁ ମଧ୍ୟ ଆବଶ୍ୟକତା ଅନୁଯାୟୀ ଟ୍ୟାଙ୍କର୍ ଆସନିଥିବା ଜଣାପଡିଛି । ଡ୍ରାଇଭର ମହାସଂଘର ଷ୍ଟିୟରିଂ ଛାଡ ଆନ୍ଦୋଳନ ଯୋଗୁଁ ତୈଳ ଓ ରନ୍ଧନ ଗ୍ୟାସ ପରିବହନ ସବୁଠାରୁ ଅଧିକ ପ୍ରଭାପିତ ହୋଇଛି । ଆସିକା ସହର ତଥା ଏହାର ଆଖପାଖ ଅଞ୍ଚଳରେ ଥିବା ୩ଟି ପେଟ୍ରୋଲ୍ ଟ୍ୟାଙ୍କରେ ମହଜୁଦ ଥିବା ତୈଳ ସରିବାକୁ ଲାଗିଲାଣି । ଆସିକାର ପେଟ୍ରୋଲ୍ ଟାଙ୍କି ଗୁଡିକରେ ତେଲ ପକାଇବା ଲାଗି ଗୁରବାର ଦିନତମାମ ଗ୍ରାହକଙ୍କ ପ୍ରବଳ ଭିଡ ଲାଗିଥିଲା । ଅତିଶୀଘ୍ର ପେଟ୍ରୋଲ୍ ଟ୍ୟାଙ୍କ୍ ଗୁଡିକୁ ତୈଳ ପରିବହନ ନହୋଇପାରିଲେ ଆସିକାରେ ତେଲସଙ୍କଟ ଦେଖାଦେବା ସମ୍ଭାବନାକୁ ଏଡାଇ ହେବ ନାହିଁ ବୋଲି ବିଭିନ୍ନ ମହଲରେ ମତ ପ୍ରକାଶ ପାଉଛି । ରନ୍ଧନ ଗ୍ୟାସ ଗାଡି ମଧ୍ୟ ଆସିକାର ବିଭିନ୍ନ ଡିଲରମାନଙ୍କ ପାଖକୁ ଆସିପାରିନଥିବା ଯୋଗୁଁ ସମସ୍ୟା ମଧ୍ୟ ସୃଷ୍ଟି ହେବାରେ ଲାଗିଲାଣି । ଆସିକା ସହର ତଥା ଏହାର ଆଖପାଖ ଅଞ୍ଚଳରେ ଡ୍ରାଇଭର ମହାସଂଘର ଷ୍ଟିୟରିଂ ଛାଡ ଆନ୍ଦୋଳନ ଯୋଗୁଁ ଟ୍ରକ ଓ ବସ୍ ସମେତ ଅନ୍ୟ କେତେକ ଯାନ ଗଡୁନାହିଁ । ଯାହାରି ଫଳରେ ଅତ୍ୟାବଶ୍ୟକୀୟ ସାମଗ୍ରୀ ଯୋଗାଣ ଗୁରୁତର ଭାବେ ପ୍ରଭାବିତ ହେବାରେ ଲାଗିଛି । ରାଜ୍ୟ ସରକାର ତଥା ବିଭାଗୀୟ ଉଚ୍ଚ କର୍ତ୍ତୃପକ୍ଷ ତୁରନ୍ତ ଧ୍ୟାନ ଦେଇ ସମସ୍ୟାର ସମାଧାନ ଦିଗରେ ପଦକ୍ଷେପ ନେବାକୁ ସଚେତନ ନାଗରିକ ମହଲରେ ଦୃôଢ ମତ ପ୍ରକାଶ ପାଉଥିବା ଲକ୍ଷ୍ୟ କରାଯାଉଛି ।
