ମାଣିତରା ପଞ୍ଚାୟତରେ ଆଦିବାସୀ ସମାଜର ଗ୍ରାମସଭା

ବୁଗୁଡା, (ଓ୍ବାଇଏନଏସ): ଗଞ୍ଜାମ ଜିଲ୍ଲାର ବୁଗୁଡା ବ୍ଲକ ଅନ୍ତର୍ଗତ ମାଣିତରା ଗ୍ରାମ ପଞ୍ଚାୟତର କଣ୍ଡରାଇ ଆଦିବାସୀ ଗ୍ରାମରେ ଆଦିବାସୀ ସମାଜର ଗ୍ରାମସଭା ନଭେମ୍ବର ୨୧ ତାରିଖରେ ଅନୁଷ୍ଠିତ ହୋଇଥିଲା। ଆଦିବାସୀଙ୍କ ହକ ପାଇଁ ଲଢେଇ କରି ଜୀବନକୁ ବାଜି ଲଗାଇ ଅକାଳରେ ମୃତ୍ୟୁବରଣ କରିଥିବା କ୍ୟାମ୍ପେନ୍ ଫର୍ ସର୍ଭାଇବାଲ୍ ଆଣ୍ଡ୍ ଡିଗ୍ନିଟି- (ସି.ଏସ୍.ଡି) ର ନେତା ପ୍ରଦୀପ ସାହୁଙ୍କ ସ୍ମୃତି ଚାରଣ କରିବା ସହ ୨ ମିନିଟ ନୀରବ ପ୍ରାର୍ଥନା କରଯାଇଥିଲା। ଏହି ଗ୍ରାମସଭାରେ ଆଦିବାସୀଙ୍କ ଜଳ, ଜମି ଓ ଜଙ୍ଗଲ ଅଧିକାର ଓ ମର୍ଯ୍ୟାଦାର ସହ ବଞ୍ଚିବା ଅଧିକାର ହାସଲ ପାଇଁ ଆଲୋଚନା ହୋଇଥିଲା। ଉଭୟ ବ୍ୟକ୍ତିଗତ ତଥା ଗୋଷ୍ଠୀଗତ ଜଙ୍ଗଲ ଅଧିକାର, ଦଶନ୍ଧି ଦଶନ୍ଧି ଧରି ପୁରୁଷାନୁକ୍ରମେ ଜଙ୍ଗଲରୁ ଆମ୍ବ, ପଣଷ, କେନ୍ଦୁ, ମହୁଲ ପ୍ରଭୃତି ଜଙ୍ଗଲ ଜାତ ଦ୍ରବ୍ୟ ସଂଗ୍ରହ ଓ ଜଙ୍ଗଲ ଜମିରେ ଚାଷ କରି ପରିବାର ପ୍ରତିପୋଷଣ କରି ଆସୁଥିବା କଣ୍ଡରାଇ, ବେଲଗାଁ, ସମଲାଇ, ନିମପଲ୍ଲୀ ଗ୍ରାମର ଜଙ୍ଗଲ ଜମିରେ ଗ୍ରାମ ସଭାର ଅନୁମୋଦନ ବିନା ଆନ୍ଧ୍ର ଜମି ମାଫିଆ, ଓଡ଼ିଆ ଜମିମାଫିଆ, ପ୍ରଭାବଶାଳି ଦଲାଲ ପ୍ରବେଶ କରି ବଳପୂର୍ବକ ଜଙ୍ଗଲ କାଟିବା, ଜଙ୍ଗଲଜମିରେ ବୁଲଡୋଜର ଲଗାଇ ଆଦିବାସୀଙ୍କ ଜୀବନ ଓ ଜୀବିକାକୁ ପ୍ରଭାବିତ କରିବା, ବନ୍ୟଜନ୍ତୁଙ୍କ ଜୀବନ ପ୍ରତି ବିପଦ ସୃଷ୍ଟି କରିବା ସହ ଜଙ୍ଗଲ ଧ୍ବଂସ, ପାରମ୍ପରିକ ଜୀବନଜୀବିକା, ସ୍ୱାସ୍ଥ୍ୟ ତଥା ସମ୍ମାନର ସହ ବଞ୍ଚିବା କ୍ଷେତ୍ରରେ ସମସ୍ୟା ସୃଷ୍ଟି କରୁଛନ୍ତି । ୩୦୦ ରୁ ୪୦୦ ଫୁଟ ଗଭୀର ନଳ କୂଅ ଖୋଲି ପାଣି ଶୋଷି ନେଉଥିବା ଯୋଗୁଁ ୨ ବର୍ଷ ହେଲା ଚାଷ ଗଭୀର ଭାବେ ପ୍ରଭାବିତ ହୋଇ ଧାନଚାଷ ହୋଇପାରୁନାହିଁ। ଜଙ୍ଗଲ ଅଧିକାର ଆଇନ ୨୦୦୬ କୁ ଆଜି ପର୍ଯ୍ୟନ୍ତ ଆଦିବାସୀଙ୍କ ସ୍ବାର୍ଥରେ କାର୍ଯ୍ୟକାରୀ ହୋଇନାହିଁ। ଜଙ୍ଗଲ ଅଧିକାର କମିଟି ଗଠନ କରି ଜିଲ୍ଲା ପ୍ରଶାସନ ଚିର ନିଦ୍ରାରେ ଶୋଇବା ନେଇ ଗ୍ରାମସଭା କ୍ଷୋଭ ପ୍ରକାଶ କରିବା ସହ  ଏଦିଗରେ ଅବହେଳାକୁ ଆଉ ବରଦାସ୍ତ କରାଯିବ ନାହିଁ। ଅନ୍ୟାୟ ବିରୋଧରେ ଆଦିବାସୀ ମେଳି କରାଯିବ ବୋଲି ଗ୍ରାମସଭା ନିଷ୍ପତ୍ତି ନେଇଛି। ଅନେକ ବ୍ୟକ୍ତିଗତ ଜମିକୁ ମଧ୍ୟ ଜମି ମାଫିଆ ପ୍ରବେଶ କରି ବିଶୃଙ୍ଖଳା ସୃଷ୍ଟି କରିବା, ଗୋଷ୍ଠୀଗତ ଜଙ୍ଗଲକୁ ଦଖଲକୁ ନେବା, ଆଦିବାସୀ ପିଲାଙ୍କ ଶିକ୍ଷାରୁ ବଞ୍ଚିତ କରିବା, ରାସ୍ତା ଆଦି ମୌଲିକ ସୁବିଧା ସୁଯୋଗରୁ ବଞ୍ଚିତ କରିବା, ହାତକୁ କାମ, ନିଶ୍ଚିତ କର୍ମ ନିଯୁକ୍ତି ଆଇନ ଅନୁଯାଇ କାମ ପ୍ରଦାନ ନ କରିବା ଏପରି ଅନେକ ସମସ୍ୟା ଉପରେ ନେତୃବୁନ୍ଦ ମତ ରଖିଥିଲେ। ଏହାର ସ୍ଥାୟୀ ସମାଧାନ ପାଇଁ ନଭେମ୍ବର ୨୬ ତାରିଖ ସଂବିଧାନ ଦିବସରେ ବୁଗୁଡା ଗୋଷ୍ଠି ଉନ୍ନୟନ ଅଧିକାରୀଙ୍କ ସମୁଖରେ ବିକ୍ଷୋଭ କରି ଜିଲ୍ଲା ପ୍ରଶାସନର ଦୃଷ୍ଟି ଆକର୍ଷଣ କରାଯିବ। ଏହି ଗ୍ରାମସଭାରେ ଆଦିବାସୀ ଭାରତ ମହାସଭାର ରାଜ୍ୟ ଆବାହକ ଟୁନା ମଳିକ, ଜିଲ୍ଲା ସଭାପତି ପୂର୍ଣ ଚନ୍ଦ୍ର ପ୍ରଧାନ, ଜଗନ୍ନାଥପ୍ରସାଦ ମୁଠାର କାର୍ତିକ ପ୍ରଧାନ, ଡମ୍ବୁରୁ ପ୍ରଧାନ, ପଞ୍ଚାନନ ପ୍ରଧାନ, ବୁଗୁଡା ଆଦିବାସୀ ସମାଜ ସମ୍ପାଦକ ପ୍ରଶନ ଦଳ ବେହେରା, ଦଣ୍ଡପାଣି ଯାନୀ, ସୁରେନ୍ଦ୍ର ମଳିକ, ସି.ପି.ଆଇ(ଏମ-ଏଲ)ରେଡଷ୍ଟାର ଜିଲ୍ଳା ସମ୍ପାଦକ ଶଙ୍କର ଇନକିଲାବ, ଅଖିଳ ଭାରତ କ୍ରାନ୍ତିକାରୀ କୃଷକ ସଭାର ସନ୍ତୋଷ ଯାନୀ ପ୍ରମୁଖ ଯୋଗଦେଇଥିଲେ। ସଂଯୁକ୍ତା ପ୍ରଧାନ, ନର୍ମଦା ପ୍ରଧାନ, ସୁକାନ୍ତି ମଲ୍ଲିକ ମହିଳା ନେତ୍ରୀମାନେ ଆଦିବାସୀଙ୍କ ପ୍ରତି ହୋଇଥିବା ଐତିହାସିକ ଅନ୍ୟାୟ ବୋଲି ମତ ପ୍ରକାଶ କରି ଯେଉଁ ଆଇନ ୨୦୦୬ ରେ ହୋଇଥିଲା ତାହା ୧୯ ବର୍ଷ ବିତିଗଲା ପରେ ମଧ୍ୟ କାର୍ଯ୍ୟକାରୀ ନହେବା ବିଷୟରେ ଆମ ମୁଖ୍ୟମନ୍ତ୍ରୀ ଓ ରାଷ୍ଟ୍ରପତି ନ୍ୟାୟ କେବେ ପ୍ରଦାନ କରିବେ ତାହାକୁ ଅପେକ୍ଷା କରିଅଛୁ।