ସ୍କୁଲ ଯାଉଥିବା ବେଳେ ଅଧାରାସ୍ତାରେ ଟଳି ପଡ଼ିଲେ ଛାତ୍ର : ପୁଅଙ୍କୁ ହରାଇ ଭାଙ୍ଗି ପଡ଼ିଲେ ପରିବାର

   ଦିଗପହଣ୍ଡି,(ଅଳକ ନାଥ ମିଶ୍ର) : ଗଞ୍ଜାମ ଜିଲା ଦିଗପହଣ୍ଡି ବ୍ଲକ ନିମଖଣ୍ଡିପେଣ୍ଠ ଗ୍ରାମ ସ୍ଥିତ ରାଧାମୋହନ ନୋଡାଲ ବିଦ୍ୟାପୀଠ ର ୭ ମ ଶ୍ରେଣୀ ଛାତ୍ର ଆକାଶ କୁମାର ଗୌଡ଼(୧୨) ସ୍କୁଲ ଯାଉଥିବା ବେଳେ ଅସୁସ୍ଥତା କାରଣରୁ ଅଧାରାସ୍ତା ରେ ବହି ବସ୍ତାନି ସହ ଟଳି ପଡ଼ିଥିଲେ। ଖବରପାଇ ପରିବାର ଲୋକେ ତାଙ୍କୁ ଉଦ୍ଧାର କରି ଅଚେତ ଅବସ୍ଥାରେ ଆମ୍ବୁଲାନ୍ସ ଯୋଗେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ରେ ଭର୍ତ୍ତି କରିବା ପରେ ସେଠାରେ ଉପସ୍ଥିତ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଗତ ଶୁକ୍ରବାର ପୂର୍ବାହ୍ନ ପ୍ରାୟ ୧୦ ଟା ରେ ଏଭଳି ଦୁଃଖଦ ଘଟଣା ଘଟିଥିଲା।  ପୋଲିସ ଆସି ତଦନ୍ତ କରିବା ପରେ ମାମଲା ରୁଜୁ କରିବ। ବ୍ୟବଚ୍ଛେଦ ପାଇଁ ଘରୋଇ ଆମ୍ବୁଲାନ୍ସ କରିବାକୁ ପଡ଼ିବ। ଏଥିପାଇଁ ଟଙ୍କା ଖର୍ଚ୍ଚ କରିବାକୁ ହେବ ଭାବନା କରି  ପରିବାର ଲୋକେ ଆକାଶ ଙ୍କ ମୃତଦେହ କୁ ତାଙ୍କ ବାସଭବନକୁ ନେଇ ଯାଇଥିଲେ। ମଧ୍ୟାହ୍ନରେ ଗାଁ ଶ୍ମଶାନ ରେ ଶୋକାକୁଳ ପରିବେଶ ମଧ୍ୟରେ ତାଙ୍କ ଶେଷକୃତ୍ୟ କରାଯାଇଥିଲା। ହାଇସ୍କୁଲ ଭାରପ୍ରାପ୍ତ ପ୍ରଧାନଶିକ୍ଷକ ପ୍ରଶାନ୍ତ କୁମାର ସାହୁ ଏନେଇ ଦିଗପହଣ୍ଡି ବିଡ଼ିଓ ଅନାମିକା ପାଣ୍ଡେ ଏବଂ ବ୍ଲକ ଶିକ୍ଷାଧିକାରୀ ଡ଼. ଶଙ୍କର ନାରାୟଣ ବେଜ ଙ୍କୁ ଜଣାଇବା ପରେ ସ୍କୁଲ ରେ ତାଙ୍କ ଅମର ଆତ୍ମାର ସଦଗତି କାମନା ପୂର୍ବକ ଶୋକସଭା କରାଯାଇଥିଲା।ପରେ ଆକାଶ ଙ୍କ ଶ୍ରେଣୀ ଶିକ୍ଷକ ଲାବଣ୍ୟ ସାହୁ ଏବଂ ଶିକ୍ଷୟତ୍ରୀ ସୁରଭି ନାୟକ ତାଙ୍କ ବାସଭବନରେ ପହଞ୍ଚି ଶୋକ ସନ୍ତପ୍ତ ପରିବାର ଲୋକଙ୍କୁ ସମବେଦନା ଜଣାଇଥିଲେ। ଗତ ଶୁକ୍ରବାର ପୂର୍ବାହ୍ନ ପ୍ରାୟ ୧୦ ଟା ରେ ଏଭଳି ଦୁଃଖଦ ଘଟଣା ଘଟିଥିଲା। ନିମଖଣ୍ଡିପେଣ୍ଠ ଗ୍ରାମ ଚୈତନ୍ୟ ନିତ୍ୟାନନ୍ଦ ମଠ ସାହିର ସିମାଞ୍ଚଳ ଗୌଡ଼ ଙ୍କ ଏକମାତ୍ର ପୁଅ ଆକାଶ ଗତ କିଛିଦିନ ହେଲା ମସ୍ତିଷ୍କ ମ୍ୟାଲେରିଆ ଜ୍ଵର ରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିଲେ। ଆଗକୁ ସ୍କୁଲ ପରୀକ୍ଷା ଥିବାରୁ ସେ ଘରେ ରହି ପାଠ ପଢୁଥିଲେ। ଶୁକ୍ରବାର ସକାଳେ ସେ ସାମାନ୍ୟ ସୁସ୍ଥ ଅନୁଭବ କରିବାରୁ ସ୍କୁଲ ଯିବା ପାଇଁ ପ୍ରସ୍ତୁତ ହୋଇଥିଲେ। ପ୍ରତିଦିନ ଭଳି ଘରେ କିଛି ଖାଦ୍ୟ ଖାଇ ସାରିବା ପରେ ତରବର ହୋଇ ବହି ବସ୍ତାନି ଧରି ସ୍କୁଲ ଅଭିମୁଖେ ବାହାରି ପଡ଼ିଥିଲେ।ସ୍କୁଲ ରେ ପହଞ୍ଚିବା ପୂର୍ବରୁ ସେ ଅସୁସ୍ଥତା କାରଣରୁ ଗ୍ରାମର ବଡ଼ ସାହି ଚାରିଛକ ରାସ୍ତାରେ ଟଳି ପଡ଼ିଥିଲେ।ଆକାଶ ଙ୍କ ବାପା ସିମାଞ୍ଚଳ ଜଣେ ଅସହାୟ ଗରିବ ବ୍ୟକ୍ତି ଭାବେ ଗାଁ ରେ ଜଣାଶୁଣା। ମୂଲ ମଜୁରୀ ଖଟି ସେ ପରିବାର ପ୍ରତିପୋଷଣ କରୁଥିଲେ।ସ୍ତ୍ରୀ ଏବଂ ଗୋଟିଏ ପୁଅ ଓ ଗୋଟିଏ ଝିଅ ଙ୍କୁ ନେଇ ତାଙ୍କ ପରିବାର।ବିବାହ ଉପଯୁକ୍ତ ବୟସ ହୋଇଥିଲେ ମଧ୍ୟ ଆବଶ୍ୟକ ଅର୍ଥ ଅଭାବରୁ ଝିଅ କୁ ବିବାହ ଦେଇ ପାରିନାହାଁନ୍ତି। ପୁଅ ଆକାଶ ଙ୍କ ଆକସ୍ମିକ ମୃତ୍ୟୁ ପରେ ମା ବାପା ଓ ଭଉଣୀ ଦୁଃଖରେ ମ୍ରିୟମାଣ ହୋଇପଡିଛନ୍ତି।କାଲିଠାରୁ ସେମାନେ ଖିଆପିଆ ଛାଡି ଦେଇଛନ୍ତି।କେବଳ ବାହୁନି ବାହୁନି କାନ୍ଦୁଛନ୍ତି।ସମ୍ପର୍କୀୟ ଲୋକେ କେତେ ବୁଝାଇଲେ ମଧ୍ୟ ସେମାନଙ୍କ ଲୁହ ବୋଲ ମାନୁନି। ଗୁମୁରି ଗୁମୁରି କୋହ ଉଠାଇ କାନ୍ଦୁଛନ୍ତି। କେତେ ଆଶା କରିଥିଲେ ସିମାଞ୍ଚଳ। ପୁଅ ବଡ ହୋଇ ଉଚ୍ଚ ଶିକ୍ଷିତ ହେବ।ବୃଦ୍ଧ ବେଳେ ପୁଅ ତାଙ୍କ ଆଶା ବାଡ଼ିହେବ।ବଂଶ ରକ୍ଷା କରିବ।କିନ୍ତୁ ସବୁ ସ୍ବପ୍ନ ତାଙ୍କ ଧୂଳିସାତ୍ ହୋଇଗଲା।କଣ କରିବେ ତାଙ୍କୁ କିଛି ବୁଦ୍ଧି ଦିଶୁନାହିଁ ବୋଲି ସିମାଞ୍ଚଳ କହିଛନ୍ତି। ଅନ୍ୟପକ୍ଷରେ ହାଇସ୍କୁଲ ଶିକ୍ଷୟତ୍ରୀ ଶିକ୍ଷକ ଏବଂ ବ୍ଲକ ସହକାରୀ ଗୋଷ୍ଠୀ ଶିକ୍ଷାଧିକାରୀ ବାଳା ମାଝୀ ଙ୍କ ପକ୍ଷରୁ ତାଙ୍କ ପରିବାର ଙ୍କୁ ଆର୍ଥିକ ସହାୟତା ଦିଆଯାଇଛି।ରେଡକ୍ରସ ପାଣ୍ଠି ରୁ ମୃତ ଛାତ୍ର ଙ୍କ ପରିବାର ଲୋକଙ୍କୁ ସହାୟତା ଯୋଗାଇ ଦେବାକୁ ଗ୍ରାମବାସୀ ଦାବୀ କରିଛନ୍ତି ।