ନୂଆ ବିଦେଶୀ ମଦ ଦୋକାନ ଖୋଲିବାକୁ ବିରୋଧ କରୁଛନ୍ତି ମଦ ଦୋକାନୀ

ଯାଜପୁର,(ପ୍ରଦୀପ କୁମାର ମଲ୍ଲିକ): ଯାଜପୁର ସହରରେ ନୂଆ ବିଦେଶୀ ମଦ ଦୋକାନ ଖୋଲିବାକୁ ନେଇ ଏବେ ରାଜନୀତିଠାରୁ ଆରମ୍ଭ କରି ବ୍ୟବସାୟିକ ସ୍ୱାର୍ଥ ପର୍ଯ୍ୟନ୍ତ ବିଭିନ୍ନ ଚର୍ଚ୍ଚା ଜୋର ଧରିଛି। ବିଶେଷକରି ଯାଜପୁର ମ୍ୟୁନିସିପାଲିଟି ୧ ନମ୍ବର ୱାର୍ଡ ନଦୀବନ୍ଧ ନିକଟରେ ଆଇ ଏମ ଏଫ ଏଲ ଯାଜପୁର ଟାଉନ ନମ୍ବର-୨ ବିଦେଶୀ ଠିପି ବନ୍ଦ ମଦ ଦୋକାନ ଖୋଲିବାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଗତକାଲି ଦୋକାନ ଖୋଲିବା ଘଟଣାକୁ ନେଇ ସ୍ଥାନୀୟ ଲୋକଙ୍କ ଏକ ଅଂଶ ଏହାକୁ ବିରୋଧ କରିବା ସହ ଦୋକାନ ବନ୍ଦ କରିବାକୁ ଦାବି ଉଠାଇଛନ୍ତି। ତେବେ ଏହି ବିରୋଧକୁ ନେଇ ଏବେ ଏକ ଭିନ୍ନ ପ୍ରଶ୍ନ ଉଠିଛି ମଦ ଦୋକାନକୁ ବିରୋଧ କରୁଥିବା ଲୋକଙ୍କ ପଛରେ ଆଉ କେଉଁ ମଦ ବ୍ୟବସାୟୀଙ୍କ ସ୍ୱାର୍ଥ ରହିଛି କି? ସ୍ଥାନୀୟ ସ୍ତରରେ ଏଭଳି ଚର୍ଚ୍ଚା ଜୋର ଧରିଥିଲେ ମଧ୍ୟ, ଏହାର ସତ୍ୟତା ସମ୍ପର୍କରେ ଏପର୍ଯ୍ୟନ୍ତ କୌଣସି ସ୍ପଷ୍ଟ ଆଧିକାରିକ ପ୍ରମାଣ ସାମ୍ନାକୁ ଆସିନାହିଁ। ତେଣୁ ବିରୋଧ ପଛରେ କେବଳ ଜନସ୍ୱାର୍ଥ ରହିଛି ନା ବ୍ୟବସାୟିକ ପ୍ରତିସ୍ପର୍ଦ୍ଧା ଏହା ଏବେ ତଦନ୍ତ ଓ ସ୍ପଷ୍ଟୀକରଣର ବିଷୟ ହୋଇଛି।ଜନବିରୋଧ ନା ବ୍ୟବସାୟିକ ପ୍ରତିସ୍ପର୍ଦ୍ଧା? ଏକପଟେ ସ୍ଥାନୀୟ ଲୋକେ ମଦ ଦୋକାନ ବନ୍ଦ ଦାବି କରୁଛନ୍ତି। ଅନ୍ୟପଟେ ସହରର ମଦ ବ୍ୟବସାୟ ସହ ଜଡ଼ିତ କିଛି ମହଲରେ ଏହି ବିରୋଧକୁ ନେଇ ଭିନ୍ନ ଆଲୋଚନା ହେଉଥିବା ଶୁଣିବାକୁ ମିଳୁଛି। ନୂଆ ଦୋକାନ ଖୋଲିଲେ ପୁରୁଣା ବ୍ୟବସାୟ ଉପରେ ପ୍ରଭାବ ପଡ଼ିବା ଆଶଙ୍କାରୁ କେହି ପରୋକ୍ଷ ଭାବେ ବିରୋଧକୁ ପ୍ରୋତ୍ସାହନ ଦେଉଛନ୍ତି କି ନାହିଁ ସେନେଇ ମଧ୍ୟ ପ୍ରଶ୍ନ ଉଠିଛି। ଯଦି ଏହା ପ୍ରକୃତରେ ଜନସାଧାରଣଙ୍କ ଦାବି, ତେବେ ସ୍ଥାନୀୟ ଲୋକଙ୍କ ଅଭିଯୋଗ, ଆଇନଗତ ମାନଦଣ୍ଡ, ଦୋକାନର ସ୍ଥାନ ଓ ଅନୁମତି ସମ୍ପର୍କିତ ସମସ୍ତ ତଥ୍ୟ ସାର୍ବଜନୀନ ହେବା ଆବଶ୍ୟକ। ଆଉ ଯଦି ଏହା ପଛରେ ବ୍ୟବସାୟିକ ପ୍ରତିସ୍ପର୍ଦ୍ଧା ରହିଛି, ତେବେ ସେହି ଦିଗରେ ମଧ୍ୟ ପ୍ରଶାସନ ପକ୍ଷରୁ ନିରପେକ୍ଷ ତଦନ୍ତ ଆବଶ୍ୟକ।ପ୍ରଶାସନର ଭୂମିକା ଉପରେ ନଜର ଘଟଣାକୁ ନେଇ ଏବେ ଅବକାରୀ ବିଭାଗ ଓ ସ୍ଥାନୀୟ ପ୍ରଶାସନର ଭୂମିକା ଉପରେ ସମସ୍ତଙ୍କ ନଜର। ଦୋକାନ ଖୋଲିବା ପାଇଁ ଆବଶ୍ୟକ ଲାଇସେନ୍ସ, ନିର୍ଦ୍ଧାରିତ ସ୍ଥାନ ସମ୍ପର୍କିତ ନିୟମ ଓ ଅନ୍ୟାନ୍ୟ ଆଇନଗତ ବ୍ୟବସ୍ଥା ପାଳନ ହୋଇଛି କି ନାହିଁ ତାହା ସ୍ପଷ୍ଟ କରିବା ଦାୟିତ୍ୱ ସମ୍ପୃକ୍ତ ବିଭାଗର। ଅନ୍ୟପଟେ, ଯଦି ସ୍ଥାନୀୟ ଲୋକଙ୍କ ଅଭିଯୋଗ ଯଥାର୍ଥ, ତେବେ ତାହାର ସମାଧାନ କରିବା ମଧ୍ୟ ପ୍ରଶାସନର ଦାୟିତ୍ୱ। କିନ୍ତୁ ଯଦି ଜନବିରୋଧର ଆଡ଼ରେ କୌଣସି ବ୍ୟବସାୟିକ ସ୍ୱାର୍ଥ କାମ କରୁଛି, ତେବେ ସେଥିରେ ମଧ୍ୟ ପରଦା ଉଠିବା ଦରକାର।ମଦ ଦୋକାନକୁ ବିରୋଧ କରୁଛନ୍ତି ଜନତା, ନା ବ୍ୟବସାୟୀ?
ଯାଜପୁର ସହରରେ ଏବେ ଏହି ପ୍ରଶ୍ନ ହିଁ ସବୁଠାରୁ ବଡ଼ ଚର୍ଚ୍ଚାର ବିଷୟ।