ସେବା ସମବାୟ ସମିତିର ପରିଚାଳନା କମିଟି ନିଲମ୍ବିତ
ହାଟଡିହି (ଓ୍ବାଇଏନଏସ): କେନ୍ଦୁଝର ଜିଲ୍ଲା ହାଟଡିହି ବ୍ଲକ ଅଧୀନ ବଡ଼ରମ୍ପାସ ଏସ୍ସିଏସ୍ ଲିମିଟେଡ୍ର ପରିଚାଳନା କମିଟିକୁ ଓଡ଼ିଶା ସମବାୟ ସମିତି ଆଇନ, ୧୯୬୨ର ଧାରା ୩୨(୭) ଅନୁଯାୟୀ ନିଲମ୍ବନ କରାଯାଇଛି। ଏନେଇ ଉପନିବନ୍ଧକ, ସମବାୟ ସମିତି, କେନ୍ଦୁଝର ଡିଭିଜନ, କେନ୍ଦୁଝରଙ୍କ ପକ୍ଷରୁ ଆଦେଶ ନଂ. ୨୬୧୩ /ଏଲଏକ୍ସ – ୧- ୦୪ /୨୦୨୬ ତା ୧୭/୮/୨୦୨୬ରେ ନିର୍ଦେଶନାମା ଜାରି ହୋଇଛି। ବଡ଼ରମ୍ପାସ ଏସ୍ସିଏସ୍ ଲିମିଟେଡ୍ ଏକ ପ୍ରାଥମିକ କୃଷି ସମବାୟ ସମିତି ଭାବେ ଓଡ଼ିଶା ସମବାୟ ସମିତି ଆଇନ, ୧୯୬୨ ଅନୁଯାୟୀ ପଞ୍ଜୀକୃତ ହୋଇଛି। ପ୍ରାଥମିକ କୃଷି ସମବାୟ ସମିତି ଭାବେ ବଡ଼ରମ୍ପାସ ଏସ୍ସିଏସ୍ ଲିମିଟେଡ୍ର ପରିଚାଳନା କମିଟି ସମବାୟ ଆଇନ, ୧୯୬୨ ଏବଂ ଏହା ଅଧୀନରେ ପ୍ରଣୀତ ନିୟମାବଳୀ ଅନୁଯାୟୀ ସଦସ୍ୟମାନଙ୍କ ବୃହତ୍ତର ସ୍ୱାର୍ଥ ଦୃଷ୍ଟିରୁ ସମିତିର ଦୈନନ୍ଦିନ କାର୍ଯ୍ୟ ସୁଚାରୁ ରୂପେ ପରିଚାଳନା କରିବା ଦାୟିତ୍ୱରେ ରହିଛି। ବଡ଼ରମ୍ପାସ ଏସ୍ସିଏସ୍ ଲିମିଟେଡ୍ର ପରିଚାଳନା କମିଟିର କାର୍ଯ୍ୟପ୍ରଣାଳୀ ସମ୍ପର୍କରେ ଆନନ୍ଦପୁର ସର୍କଲ୍ର ଏଆର୍ସିଏସ୍ଙ୍କ ପତ୍ର ନଂ. ୨୯୨୭, ତାରିଖ ୧୪-୦୮-୨୦୨୬ ମାଧ୍ୟମରେ ରିପୋର୍ଟ ଗ୍ରହଣ କରାଯାଇଛି। ରିପୋର୍ଟ ଅନୁଯାୟୀ, ୨୦୨୩-୨୪ ଏବଂ ୨୦୨୫-୨୬ ଆର୍ଥିକ ବର୍ଷ ପାଇଁ ବଡ଼ରମ୍ପାସ ଏସ୍ସିଏସ୍ ଲିମିଟେଡ୍ ପକ୍ଷରୁ ବାର୍ଷିକ ସାଧାରଣ ସଭା ଆୟୋଜନ କରାଯାଇନାହିଁ। ଫଳରେ ବାର୍ଷିକ ଆୟ-ବ୍ୟୟର ଅନୁମୋଦନ ଏବଂ ବାର୍ଷିକ ବଜେଟ୍ ଅନୁମୋଦନ ମଧ୍ୟ ହୋଇନାହିଁ।ଏହା ସହିତ, ୨୦୨୪-୨୫ ବର୍ଷର ବୈଧାନିକ ଅଡିଟ୍ ରିପୋର୍ଟ ବଡ଼ରମ୍ପାସ ଏସ୍ସିଏସ୍ ଲିମିଟେଡ୍ ପକ୍ଷରୁ ପରିଚାଳନା କମିଟି କିମ୍ବା ବାର୍ଷିକ ସାଧାରଣ ସଭା ସମ୍ମୁଖରେ ବିଚାର ପାଇଁ ଉପସ୍ଥାପନ କରାଯାଇନାହିଁ। ଏଥିସହ ନିୟମ ଅନୁଯାୟୀ ଏହାର କୌଣସି ଅନୁପାଳନ ରିପୋର୍ଟ ମଧ୍ୟ ସମ୍ପୃକ୍ତ କର୍ତ୍ତୃପକ୍ଷଙ୍କ ନିକଟରେ ଦାଖଲ ହୋଇନାହିଁ। ଏହା ଓସିଏସ୍ ଆଇନ, ୧୯୬୨ର ଧାରା ୨୯(୨)(ଇ) ଏବଂ ଓସିଏସ୍ ନିୟମ, ୧୯୬୫ର ନିୟମ ୫୮(ଏ )ର ଉପନିୟମ-୩ର ଉଲ୍ଲଂଘନ ବୋଲି ଉଲ୍ଲେଖ କରାଯାଇଛି।ଅନ୍ୟପକ୍ଷରେ, ବଡ଼ରମ୍ପାସ ଏସ୍ସିଏସ୍ ଲିମିଟେଡ୍ର ଏନ୍ପିଏ (ଏନପିଏ ) ପରିମାଣ ପ୍ରତିବର୍ଷ ବୃଦ୍ଧି ପାଇଚାଲିଛି। ପରିଚାଳନା କମିଟି ଏନ୍ପିଏର ବକେୟା ସ୍ଥିତି ସମୀକ୍ଷା କରିନାହାନ୍ତି। ଏଥିସହ ୨୦୨୫-୨୬ ବର୍ଷରେ ବକେୟା ଋଣ ଖିଲାପକାରୀଙ୍କ ବିରୋଧରେ ଡିସ୍ପ୍ୟୁଟ୍ କେସ୍ ଦାଖଲ କରିବାକୁ ମୁଖ୍ୟ କାର୍ଯ୍ୟନିର୍ବାହୀଙ୍କୁ ମଧ୍ୟ ନିର୍ଦ୍ଦେଶ ଦିଆଯାଇନାହିଁ। ଫଳରେ ସମିତିର ସମ୍ପତ୍ତି ଉପରେ କ୍ଷତିର ପ୍ରଭାବ ପଡ଼ିଥିବା ଦର୍ଶାଯାଇଛି। ଉପରୋକ୍ତ ଅନିୟମିତତା ଓ ପରିଚାଳନାଗତ ତ୍ରୁଟିକୁ ଆଧାର କରି ବଡ଼ରମ୍ପାସ ଏସ୍ସିଏସ୍ ଲିମିଟେଡ୍ର ପରିଚାଳନା କମିଟିକୁ ଓଡ଼ିଶା ସମବାୟ ସମିତି ଆଇନ, ୧୯୬୨ର ଧାରା ୩୨(୭) ଅନୁଯାୟୀ ନିଲମ୍ବନ କରାଯାଇଥିବା ଆଦେଶରୁ ଜଣାପଡ଼ିଛି।
