ଲିଙ୍ଗରାଜ ଆଜାଦଙ୍କୁ ତୁରନ୍ତ ମୁକ୍ତି ଦାବି
କଳାହାଣ୍ଡି,(ଚିତ୍ତରଞ୍ଜନ ବିଷି): ଓଡ଼ିଶାରେ ଶାନ୍ତିପୂର୍ଣ୍ଣ ଆନ୍ଦୋଳନ ଓ ପ୍ରତିବାଦ କରିବାର ଗଣତାନ୍ତ୍ରିକ ଅଧିକାର ଉପରେ ଦମନମୂଳକ ନୀତି ଅବଲମ୍ବନ କରାଯାଉଥିବା ଅଭିଯୋଗ କରି ରାଜ୍ୟର ବିଜେପି ନେତୃତ୍ୱାଧୀନ ସରକାରକୁ ତୀବ୍ର ସମାଲୋଚନା କରିଛି ସଂଯୁକ୍ତ କିଷାନ ମୋର୍ଚ୍ଚା। ଭୂମି ଅଧିକାର ଆନ୍ଦୋଳନର ନେତୃତ୍ୱ ନେଇ ମାର୍ଚ୍ଚ ୨୫ ତାରିଖରୁ ଜେଲ୍ରେ ଥିବା ସାମାଜିକ କର୍ମୀ ଲିଙ୍ଗରାଜ ଆଜାଦଙ୍କୁ ତୁରନ୍ତ ଓ ବିନା ସର୍ତ୍ତରେ ମୁକ୍ତ କରିବାକୁ ମୋର୍ଚ୍ଚା ଦାବି କରିଛି। ସଂଯୁକ୍ତ କିଷାନ ମୋର୍ଚ୍ଚା ପକ୍ଷରୁ ବୁଧବାର ଜାରି କରାଯାଇଥିବା ପ୍ରେସ୍ ବିବୃତିରେ କୁହାଯାଇଛି ଯେ, ଲିଙ୍ଗରାଜ ଆଜାଦଙ୍କୁ ୨୦୨୬ ମାର୍ଚ୍ଚ ୨୫ ତାରିଖରେ ଭବାନୀପାଟଣାରୁ ପୁଲିସ ଗିରଫ କରିଥିଲା। ସେବେଠାରୁ ସେ ଜେଲ୍ରେ ରହିଥିବା ବେଳେ ତାଙ୍କୁ ଆଇନସମ୍ମତ ଜାମିନର ଅଧିକାରରୁ ବଞ୍ଚିତ କରାଯାଉଥିବା ମୋର୍ଚ୍ଚା ଅଭିଯୋଗ କରିଛି। ଲିଙ୍ଗରାଜ ଆଜାଦ ସଂଯୁକ୍ତ କିଷାନ ମୋର୍ଚ୍ଚା, ଜନ ଆନ୍ଦୋଳନମାନଙ୍କର ରାଷ୍ଟ୍ରୀୟ ସମନ୍ୱୟ, ନିୟମଗିରି ସୁରକ୍ଷା ସମିତି ଏବଂ ମା’ ମାଟି ମାଳି ସୁରକ୍ଷା ମଞ୍ଚ ସମେତ ବିଭିନ୍ନ ଜନଆନ୍ଦୋଳନ ସହ ଦୀର୍ଘଦିନ ଧରି ଜଡ଼ିତ ଥିବା ମୋର୍ଚ୍ଚା କହିଛି। ଅନୁସୂଚିତ ଅଞ୍ଚଳରେ ବେଆଇନ ଜମି ଅଧିଗ୍ରହଣ ଓ ଖଣି ପ୍ରକଳ୍ପ ବିରୋଧରେ ସେ ନିରନ୍ତର ସ୍ୱର ଉଠାଇ ଆସିଥିବା ମଧ୍ୟ ବିବୃତିରେ ଦର୍ଶାଯାଇଛି। ମୋର୍ଚ୍ଚାର ଅଭିଯୋଗ ଅନୁଯାୟୀ, ଲିଙ୍ଗରାଜ ଆଜାଦଙ୍କ ଗିରଫ ଆଦିବାସୀଙ୍କ ଜମି ଓ ପ୍ରାକୃତିକ ସମ୍ପଦ ଉପରେ କର୍ପୋରେଟ୍ ହସ୍ତକ୍ଷେପ ବିରୋଧରେ ସ୍ୱର ଉଠାଉଥିବା ଆନ୍ଦୋଳନକାରୀଙ୍କ ଉପରେ ଚାଲିଥିବା ବ୍ୟାପକ ଦମନର ଏକ ଅଂଶ। ଜମି ଓ ପ୍ରାକୃତିକ ସମ୍ପଦର ସୁରକ୍ଷା ପାଇଁ ଲଢ଼ୁଥିବା କର୍ମୀ, ସମୁଦାୟ ନେତା ଓ ସଂଗଠନଗୁଡ଼ିକୁ ମିଥ୍ୟା ମାମଲା, ଗିରଫ, ନଜରଦାରୀ ଓ ଧମକ ମାଧ୍ୟମରେ ଟାର୍ଗେଟ୍ କରାଯାଉଥିବା ମୋର୍ଚ୍ଚା ଅଭିଯୋଗ କରିଛି।
ସଂଯୁକ୍ତ କିଷାନ ମୋର୍ଚ୍ଚା ଆହୁରି କହିଛି ଯେ, ଭାରତୀୟ ସମ୍ବିଧାନର ପଞ୍ଚମ ଅନୁସୂଚୀ, ପଞ୍ଚାୟତ ଅନୁସୂଚିତ ଅଞ୍ଚଳକୁ ସମ୍ପ୍ରସାରଣ ଆଇନ, ୧୯୯୬ ଏବଂ ଜଙ୍ଗଲ ଅଧିକାର ଆଇନ, ୨୦୦୬ ଅଧୀନରେ ଆଦିବାସୀ ଓ ଜଙ୍ଗଲ ନିର୍ଭରଶୀଳ ସମୁଦାୟଙ୍କ ଅଧିକାର ସୁରକ୍ଷିତ ରହିଛି। ଗ୍ରାମସଭାର ସ୍ୱାଧୀନ, ପୂର୍ବ ଓ ସୂଚିତ ସମ୍ମତି ବିନା ଜମି ଅଧିଗ୍ରହଣ କିମ୍ବା ଖଣି ଲିଜ୍ ଆଗକୁ ବଢ଼ିବା ଉଚିତ ନୁହେଁ ବୋଲି ମୋର୍ଚ୍ଚା ମତ ଦେଇଛି। ୨୨ ହଜାର ହେକ୍ଟରରୁ ଅଧିକ ଜଙ୍ଗଲ ଜମିକୁ ନେଇ ପ୍ରଶ୍ନ ମୋର୍ଚ୍ଚା ପକ୍ଷରୁ ପ୍ରକାଶିତ ତଥ୍ୟ ଅନୁଯାୟୀ, ୨୦୧୫-୧୬ରୁ ୨୦୨୪-୨୫ ମଧ୍ୟରେ ଓଡ଼ିଶାରେ ଖଣି, ଶିଳ୍ପ ଓ ଭିତ୍ତିଭୂମି ବିକାଶ ପାଇଁ ୨୨,୧୮୦.୮୨୬ ହେକ୍ଟର ଜଙ୍ଗଲ ଜମି କର୍ପୋରେଟ୍ ସଂସ୍ଥାଙ୍କୁ ହସ୍ତାନ୍ତର ହୋଇଛି। ଏହି ତଥ୍ୟ ଓଡ଼ିଶା ବିଧାନସଭାରେ ବନ ବିଭାଗ ପକ୍ଷରୁ ଦିଆଯାଇଥିବା ବୋଲି ମୋର୍ଚ୍ଚା ଦାବି କରିଛି। ମୋର୍ଚ୍ଚାର ଅଭିଯୋଗ ଅନୁଯାୟୀ, ଏହି ଜମିର ଏକ ବଡ଼ ଅଂଶ ଟାଟା, ବେଦାନ୍ତ, ନାଲକୋ, ଆଦାନୀ ଓ ରୁଙ୍ଗଟା ସନ୍ସ ଭଳି କମ୍ପାନୀଙ୍କ କୋଇଲା, ଲୁହାପଥର ଓ ବକ୍ସାଇଟ୍ ଖଣି ପ୍ରକଳ୍ପ ପାଇଁ ଦିଆଯାଇଛି। କର୍ପୋରେଟ୍ ସଂସ୍ଥାଙ୍କୁ ଜଙ୍ଗଲ ଜମି ହସ୍ତାନ୍ତର କ୍ଷେତ୍ରରେ ଓଡ଼ିଶା ଦେଶର ଅନ୍ୟ ରାଜ୍ୟଗୁଡ଼ିକ ମଧ୍ୟରେ ଶୀର୍ଷରେ ରହିଥିବା ମୋର୍ଚ୍ଚା ଦାବି କରିଛି। କେନ୍ଦୁଝରରେ ୧୪,୪୬୬ ହେକ୍ଟର ଏବଂ ସୁନ୍ଦରଗଡ଼ରେ ୧୦,୦୨୫ ହେକ୍ଟର ଜଙ୍ଗଲ ଜମି ଖଣି କାର୍ଯ୍ୟକଳାପ ପାଇଁ ହରାଇଥିବା ମୋର୍ଚ୍ଚା ଦାବି କରିଛି। ଏହା ଫଳରେ ବିସ୍ଥାପନ, ଜଙ୍ଗଲ ଧ୍ୱଂସ, ପାରମ୍ପରିକ ଜୀବିକାର କ୍ଷତି ଓ ପରିବେଶ ଉପରେ ଦୀର୍ଘମିଆଦି ପ୍ରଭାବ ପଡ଼ୁଥିବା ଅଭିଯୋଗ ହୋଇଛି। ନିୟମଗିରିରୁ ସିଜିମାଳି ପର୍ଯ୍ୟନ୍ତ ଆନ୍ଦୋଳନ ଓଡ଼ିଶାର ଭୂମି ଓ ଜଙ୍ଗଲ ଅଧିକାର ଆନ୍ଦୋଳନର ପ୍ରସଙ୍ଗ ଉଠାଇ ନିୟମଗିରି, କଳିଙ୍ଗନଗର, କାଶୀପୁର, ନାରାୟଣପାଟଣା ଏବଂ ସିଜିମାଳି-ତିଜିମାଳି ଆନ୍ଦୋଳନକୁ ଉଦାହରଣ ଭାବେ ଦର୍ଶାଇଛି ସଂଯୁକ୍ତ କିଷାନ ମୋର୍ଚ୍ଚା। ୨୦୦୬ ମସିହାର କଳିଙ୍ଗନଗର ଆନ୍ଦୋଳନ ସମୟରେ ପୁଲିସ ଗୁଳିରେ ୧୩ ଜଣ ଆଦିବାସୀ ନିହତ ହୋଇଥିବା ମୋର୍ଚ୍ଚା କହିଛି। ଏହି ସମସ୍ତ ଆନ୍ଦୋଳନ କୃଷକ ଓ ବିଶେଷକରି ଆଦିବାସୀ ପରିବାରଙ୍କ ଜମି ଅଧିକାର ଏବଂ ପ୍ରାକୃତିକ ସମ୍ପଦର ସୁରକ୍ଷା ସହ ଜଡ଼ିତ ବୋଲି ସଂଗଠନ ପକ୍ଷରୁ କୁହାଯାଇଛି। ପାଞ୍ଚ ଦଫା ଦାବି ଲିଙ୍ଗରାଜ ଆଜାଦଙ୍କୁ ତୁରନ୍ତ ଓ ବିନା ସର୍ତ୍ତରେ ମୁକ୍ତି ଦେବା ସହ କୃଷକ ଆନ୍ଦୋଳନକାରୀଙ୍କ ବିରୋଧରେ ରୁଜୁ ହୋଇଥିବା ମିଥ୍ୟା ଓ ମନଗଢ଼ା ମାମଲା ପ୍ରତ୍ୟାହାର କରିବାକୁ ସଂଯୁକ୍ତ କିଷାନ ମୋର୍ଚ୍ଚା ଦାବି କରିଛି। ଏଥିସହ ଗ୍ରାମସଭାର ସମ୍ମତି ବିନା ଜମି ଅଧିଗ୍ରହଣ ଓ ଖଣି ପ୍ରକଳ୍ପ ବନ୍ଦ, ପ୍ରାକୃତିକ ସମ୍ପଦର କର୍ପୋରେଟ୍ ଦଖଲ ଓ ଆଦିବାସୀ ବିସ୍ଥାପନ ରୋକିବା ଏବଂ ପଞ୍ଚାୟତ ଅନୁସୂଚିତ ଅଞ୍ଚଳକୁ ସମ୍ପ୍ରସାରଣ ଆଇନ, ୧୯୯୬ ଓ ଜଙ୍ଗଲ ଅଧିକାର ଆଇନ, ୨୦୦୬ର କଡ଼ା ଅନୁପାଳନ ସୁନିଶ୍ଚିତ କରିବାକୁ ମୋର୍ଚ୍ଚା ଦାବି ରଖିଛି। ଲୋକଙ୍କ ଜମି, ଜଙ୍ଗଲ ଓ ଅଧିକାରର ସୁରକ୍ଷା ପାଇଁ ଗଣତାନ୍ତ୍ରିକ ସ୍ୱରକୁ ଦମନ ନକରି ସୁରକ୍ଷା ଦିଆଯିବା ଆବଶ୍ୟକ ବୋଲି ସଂଯୁକ୍ତ କିଷାନ ମୋର୍ଚ୍ଚା ମତ ପ୍ରକାଶ କରିଛି। ସଂଗଠନର ମିଡିଆ ସେଲ୍ ପକ୍ଷରୁ ଏହି ପ୍ରେସ୍ ବିବୃତି ଜାରି କରାଯାଇଛି।
