୧୬ ମତ୍ସ୍ୟଜୀବୀ ନିଖୋଜ ଘଟଣା: ପଶ୍ଚିମବଙ୍ଗ କାକଦ୍ୱୀପର ୨ କି.ମି ଦୂରରେ ସୁରକ୍ଷିତ ଥିବା ସୂଚନା

ବାଲେଶ୍ୱର(ସରୋଜ ପଣ୍ଡା) : ସମୁଦ୍ରରେ ପ୍ରାୟ ଏକ ସପ୍ତାହ ଧରି ନିଖୋଜ ଥିବା ୧୬ ଜଣ ମତ୍ସ୍ୟଜୀବୀ ଠାବ ହୋଇଛନ୍ତି। ପଶ୍ଚିମବଙ୍ଗ କାକଦ୍ୱୀପର ୨ କିମି ଦୂରରେ ଠାବ ହେଲେ ମତ୍ସ୍ୟଜୀବୀ । ସମସ୍ତେ ସୁରକ୍ଷିତ ଥିବା ସୂଚନା ମିଳିଛି । ଏହି ମତ୍ସ୍ୟଜୀବୀମାନଙ୍କ ମଧ୍ୟରେ ଓଡ଼ିଶାର ବାଲେଶ୍ୱର ଜିଲ୍ଲାର ୩ ଭାଇ ମଧ୍ୟ ସାମିଲ ଅଛନ୍ତି। ସମସ୍ତ ମତ୍ସ୍ୟଜୀବୀଙ୍କୁ ପଶ୍ଚିମବଙ୍ଗର କାକଦ୍ୱୀପ ନିକଟରୁ ଠାବ କରାଯାଇଛି। ମିଳିଥିବା ସୂଚନା ଅନୁଯାୟୀ, ଗତ ଜୁଲାଇ ୨ ତାରିଖରେ ଏହି ମତ୍ସ୍ୟଜୀବୀମାନେ ‘ମାଆ କାଳୀ’ ନାମକ ଏକ ଟ୍ରଲରରେ ଗଭୀର ସମୁଦ୍ରକୁ ଇଲିସି ମାଛ ଧରିବା ପାଇଁ ଯାଇଥିଲେ। ସେମାନେ ଶଙ୍କରପୁର ବେଳାଭୂମିରୁ ଯାତ୍ରା ଆରମ୍ଭ କରିଥିଲେ। ତେବେ କୂଳ ଛାଡ଼ିବା ପରେ ପରିବାର ଲୋକଙ୍କ ସହ ସେମାନଙ୍କର ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ଠାବ ହୋଇଥିବା ୧୬ ଜଣ ମତ୍ସ୍ୟଜୀବୀଙ୍କ ମଧ୍ୟରେ ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ ଉଲୁଡ଼ା ଗ୍ରାମର ୩ ଜଣ ଅଛନ୍ତି। ସେମାନେ ହେଲେ ରବୀନ୍ଦ୍ର ମାଝୀ, ଜୟରାମ ମାଝୀ ଏବଂ ଜଗନ୍ନାଥ ମାଝୀ। ବାକି ମତ୍ସ୍ୟଜୀବୀମାନେ ପଶ୍ଚିମବଙ୍ଗର ବୋଲି ଜଣାପଡ଼ିଛି। ସମୁଦ୍ରକୁ ଯିବା ପରେ ଏହି ତିନି ଓଡ଼ିଆ ଭାଇ ନିଜ ପରିବାର ସହ ଥରେ କଥା ହୋଇଥିଲେ। ଗତ ରବିବାର ଦିନ ଟ୍ରଲର ମାଲିକ ମଧ୍ୟ ସେମାନଙ୍କ ସହ ଯୋଗାଯୋଗ କରିଥିଲେ। କିନ୍ତୁ ଏହା ପରେ ସମସ୍ତ ଯୋଗାଯୋଗ ବିଚ୍ଛିନ୍ନ ହୋଇଯିବାରୁ ପରିବାର ମଧ୍ୟରେ ତୀବ୍ର ଆଶଙ୍କା ଦେଖାଦେଇଥିଲା। ଶଙ୍କରପୁର ଟ୍ରଲର ଆସୋସିଏସନ ପକ୍ଷରୁ ମିଳିଥିବା ସୂଚନା ମୁତାବକ, ନିଖୋଜ ଟ୍ରଲରଟି ପଶ୍ଚିମବଙ୍ଗର କାକଦ୍ୱୀପ ଠାରୁ ପ୍ରାୟ ୨ କିଲୋମିଟର ଦୂରରେ ଠାବ ହୋଇଛି। ମତ୍ସ୍ୟଜୀବୀମାନଙ୍କୁ ସୁରକ୍ଷିତ ଭାବେ ଫେରାଇ ଆଣିବା ପାଇଁ ଆସୋସିଏସନ ପକ୍ଷରୁ ଅନ୍ୟ ଏକ ଟ୍ରଲର ପଠାଯାଇଛି। ସମସ୍ତେ ସୁରକ୍ଷିତ ଥିବା ଖବର ପାଇବା ପରେ ନିଖୋଜ ମତ୍ସ୍ୟଜୀବୀଙ୍କ ପରିବାରରେ, ବିଶେଷ କରି ବାଲେଶ୍ୱରର ଭୋଗରାଇ ଅଞ୍ଚଳରେ ଆଶ୍ୱସ୍ତିର ଲହରୀ ଖେଳିଯାଇଛି।