ଅନସ୍ଲୋ ହାଇସ୍କୁଲର ରୂପାନ୍ତରୀକରଣ କାର୍ଯ୍ୟକୁ ବିଧାୟକଙ୍କ ତଦାରଖ
ଛତ୍ରପୁର, (ଦେବଦତ୍ତ ମହାରଣା) : ସରକାରୀ ଉଚ୍ଚ ବିଦ୍ୟାଳୟର ରୂପାନ୍ତରୀକରଣ ଓ ଗୁଣାତ୍ମକ ଶିକ୍ଷାର ବିକାଶ ପାଇଁ ଗଞ୍ଜାମ ଜିଲ୍ଲାର ୧୩୩ଟି ହାଇସ୍କୁଲକୁ ସ୍ମାର୍ଟ ହାଇସ୍କୁଲରେ ପରିଣତ କରିବା ପାଇଁ କାର୍ଯ୍ୟ ଚାଲିଛି । ପ୍ରଥମ ପର୍ଯ୍ୟାୟରେ ଗଞ୍ଜାମ ଜିଲ୍ଲାର ୫୦ଟି ସ୍ମାର୍ଟ ହାଇସ୍କୁଲକୁ ରାଜ୍ୟ ସରକାରଙ୍କ ପକ୍ଷରୁ ଉଦଘାଟନ କରାଯାଇଥିଲା । ଜିଲ୍ଲାର ବାକି ୮୩ଟି ସ୍ମାର୍ଟ ହାଇସ୍କୁଲକୁ ଆସନ୍ତା ୧୬ ତାରିଖରେ ଦ୍ୱିତୀୟ ପର୍ଯ୍ୟାୟରେ ଉଦଘାଟନ କରିବାର କାର୍ଯ୍ୟକ୍ରମ ରହିଛି । ଉଦ୍ଘାଟନ ହେବାକୁ ଥିବା ସ୍ମାର୍ଟ ହାଇସ୍କୁଲ ମଧ୍ୟରୁ ଗଞ୍ଜାମ ଜିଲ୍ଲାର ସର୍ବ ପୁରାତନ ସ୍କୁଲ ତଥା ଛତ୍ରପୁର ସ୍ଥିତ ଅନସ୍ଲୋ ହାଇସ୍କୁଲ ରହିଛି । ଏହି ପୁରାତନ ହାଇସ୍କୁଲରେ ଅଧ୍ୟୟନ କରି ବହୁ ଛାତ୍ର ଦେଶ ବିଦେଶରେ ସୁନାମ ଅର୍ଜନ କରି ପାରିଛନ୍ତି । ଆସନ୍ତା ୧୬ ତାରିଖରେ ଏହି ହାଇସ୍କୁଲ ସମେତ ଜିଲ୍ଲାର ୮୩ଟି ସ୍ମାର୍ଟ ହାଇସ୍କୁଲକୁ ମୁଖ୍ୟମନ୍ତ୍ରୀ ଉଦଘାଟନ କରିବାର କାର୍ଯ୍ୟକ୍ରମ ରହିଛି । ବର୍ତ୍ତମାନ ଅନସ୍ଲୋ ହାଇସ୍କୁଲର ରୂପ ପରିବର୍ତ୍ତନ କାର୍ଯ୍ୟ ଚାଲିଛି । ପିଲାମାନେ ସ୍ମାର୍ଟ ଏଲଇଡି ମାଧ୍ୟମରେ ପାଠ ପଢିବେ । ପିଲାଙ୍କ ପାଇଁ ସ୍ମାର୍ଟ ଲେବ୍ରୋଟାରୀ, ସ୍ମାର୍ଟ ଲାଇବ୍ରେରୀ, ସ୍ମାର୍ଟ ଶୌଚାଳୟ ଆଦି ନିର୍ମାଣ କରାଯାଇଛି । ଏହା ସହିତ ବିଦ୍ୟାଳୟ ପରିସରର ସୌନ୍ଦର୍ଯ୍ୟୀକରଣକୁ ଦ୍ୱିଗୁଣିତ କରାଯାଇଛି । ରବିବାର ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା ଅନସ୍ଲୋ ସରକାରୀ ଉଚ୍ଚ ବିଦ୍ୟାଳୟକୁ ପରିଦର୍ଶନ କରି ଚାଲିଥିବା କାର୍ଯ୍ୟର ତଦାରଖ କରିଥିଲେ । ବିଦ୍ୟାଳୟ ପରିସରରେ ନୂତନ ଭାବେ ନିର୍ମାଣ କରାଯାଇଥିବା ସ୍ମାର୍ଟ ଲାଇବ୍ରେରୀ, ସ୍ମାର୍ଟ କ୍ଲାସରୁମ ଆଦିକୁ ବୁଲି ଦେଖିବା ସହ ବାକି ଥିବା କାର୍ଯ୍ୟକୁ ଯଥା ଶୀଘ୍ର ଶେଷ କରିବା ପାଇଁ ପରାମର୍ଶ ଦେଇଥିଲେ । ବିଧାୟକଙ୍କ ପରିଦର୍ଶନ ବେଳେ ଛତ୍ରପୁର ବିଇଓ ଅବିନାଶ ଶତପଥି, ଶିକ୍ଷକ ବାଉରୀ ବନ୍ଧୁ ଦାସ, ବିଦ୍ୟାଧର ଦାସ, ଅରୁଣ କୁମାର ମାନସିଂ, ଶିକ୍ଷୟିତ୍ରୀ ଅମୃତା ପାଣିଗ୍ରାହୀଙ୍କ ସମେତ ବହୁ ଶିକ୍ଷକ ଶିକ୍ଷୟିତ୍ରୀମାନେ ଉପସ୍ଥିତ ଥିଲେ ।
