ମଦ ଦୋକାନ ଓ ବେଆଇନ ବାର ବନ୍ଦ ଦାବିରେ ପାତ୍ରପଡ଼ାବାସୀଙ୍କ ରାସ୍ତାରୋକ

ବାଲେଶ୍ୱର, (ସରୋଜ ପଣ୍ଡା) :-ସରକାରୀ ପଞ୍ଜୀକୃତ ଠିପିଖୋଲା ବିଦେଶୀ ମଦ ଦୋକାନ ସାଙ୍ଗକୁ ପାତ୍ରପଡ଼ାରେ ଚାଲିଥିବା ବେଆଇନ ବେଆଇନ ବାରକୁ ନେଇ ସ୍ଥାନୀୟ ବାସିନ୍ଦାଙ୍କ ଦୀର୍ଘଦିନର ଅସନ୍ତୋଷ ଶୁକ୍ରବାର ବିସ୍ଫୋରକ ରୂପ ନେଇଥିଲା । ସକାଳେ ଗ୍ରାମବାସୀମାନେ ପାତ୍ରପଡ଼ା ଛକଠାରେ ବାଲେଶ୍ୱର-ଚାନ୍ଦିପୁର ରାସ୍ତା ଅବରୋଧ କରିବା ସହ ମଦ ଦୋକାନ ଏବଂ ଫାଷ୍ଟ ଫୁଡ ଦୋକାନ ଉପରକୁ ଢେଲା ଫଥର ମାଡ କରିଥିଲେ । ରାସ୍ତାରୋକ ଓ ଭଙ୍ଗାରୁଜା ସମ୍ପର୍କରେ ଖବର ପାଇ ଟାଉନ ଥାନା ଅଧିକାରୀ ଗୋପାଳକୃଷ୍ଣ କର୍ଣ୍ଣଙ୍କ ନେତୃତ୍ୱରେ ପୁଲିସ ଫୋର୍ସ ପହଞ୍ଚିି ଉପୁଜିଥିବା ଆଇନ ଶୃଙ୍ଖଳା ପରିସ୍ଥିତିକୁ ଆୟତ୍ତ ପାଇଁ ଉଦ୍ୟମ କରିଥିଲେ । ସ୍ଥାନୀୟ ମହିଳାଙ୍କ ଅଭିଯୋଗ ଅନୁସାରେ ଅବକାରୀ ବିଭାଗ ବିଦେଶୀ ଠିପିବନ୍ଦ ମଦଦୋକାନ ପାଇଁ ମିଳିଥିବା ଲାଇସେନ୍ସକୁ ସେତେବେଳେ ବିରୋଧ କରାଯାଇଥିଲା । ଏମତିକି ଗ୍ରାମବାସୀମାନେ ଏ ସମ୍ପର୍କରେ ଜିଲାପାଳଙ୍କ ଦୃଷ୍ଟି ଆକର୍ଷଣ ମଧ୍ୟ କରିଥିଲେ । ଦୃଢ଼ ବିରୋଧ ସତ୍ତେ୍‍୍ୱ ପାତ୍ରପଡ଼ାର ସ୍ୱପ୍ନେଶ୍ୱର ମନ୍ଦିର ନିକଟରେ ଏହି ଠିପିବନ୍ଦ ମଦ ଦୋକାନ ଖୋଲାଯାଇଥିଲା । ବେଶ କିଛି ଦିନ ପରେ ମଦ ଦୋକାନ ପଛ ପାଖରେ ଏକ ଫାଷ୍ଟଫୁଡ୍ ଦୋକାନ ଖୋଲା ଯାଇଥିଲା । ମାତ୍ର ଫାଷ୍ଟଫୁଡ ଦୋକାନ ଆଳରେ ସେଠାରେ ଖୁଲମ ଖୋଲା ଭାବେ ବେଆଇନ ବାର ଚାଲୁଥିବା ଗ୍ରାମବାସୀମାନେ ଅଭିଯୋଗ କରିଛନ୍ତି । ମଦ ଦୋକାନରୁ ମଦ କିଣି ଏହି ଫାଷ୍ଟଫୁଡ ସେଣ୍ଟରରେ ପିଇବା ସହ ରାସ୍ତା ଘାଟରେ ଉତ୍ପାତ କରୁଥିବା ମହିଳାମାନେ କହିଛନ୍ତି । ଏନେଇ ଗାଁ’ର ଏହି ମୁଖ୍ୟରାସ୍ତାରେ ଝିଅ ବୋହୂ ଭୟଭ୍ରାନ୍ତିରେ ଯାତାୟାତ କରୁଛନ୍ତି । ତେବେ ଲୋକଙ୍କ ଅଭିଯୋଗକୁ ଅସ୍ୱୀକାର କରିଛନ୍ତି ମଦ ଦୋକାନୀ ନବ କିଶୋର ରାୟ । ଏ ଅଞ୍ଚଳର କିଛି ବ୍ୟକ୍ତି ଆକ୍ରୋଶମୂଳକ ଭାବେ ଲୋକଙ୍କୁ ମତାଇ ଏଭଳି କାଣ୍ଡ ଭିଆଇଥିବା ସେ କହିଛନ୍ତି । ତେବେ ତାଙ୍କ ଠିପିବନ୍ଦ ଦୋକାନରୁ ମଦ ନେଇ ଫାଖ ଫାଷ୍ଟ ଫୁଡ ଦୋକାନରେ ଗ୍ରାହକ ଯଦି ଜୋର ଜବରଦସ୍ତ ପିଇବେ, ସେଥିରେ ସେ କଣ କରିପାରିବେ ବୋଲି ଓଲଟା ପ୍ରଶ୍ନ କରିଛନ୍ତି ।