ଜୱାଦ କ୍ଷତିଗ୍ରସ୍ତ ଚାଷୀଙ୍କୁ ସହାୟତା ରାଶି ପ୍ରଦାନରେ ଅହେତୁକ ବିଳମ୍ବ ନେଇ ବିଜେପିର ଆନ୍ଦୋଳନ
ବନ୍ତ, (ଚାନ୍ଦିନୀ ମହାନ୍ତି):ବନ୍ତ ବ୍ଲକରେ ଗତ ବର୍ଷ ଜୱାଦ କ୍ଷତିଗ୍ରସ୍ତ ଚାଷୀ ମାନଙ୍କୁ ସରକାରୀ ସହାୟତା ରାଶି ପ୍ରଦାନରେ ଅହେତୁକ ବିଳମ୍ବ ପ୍ରତିବାଦରେ ଆଜି ବ୍ଲକ ବିଜେପି ପକ୍ଷରୁ ରାଜ୍ୟ କାର୍ଯ୍ୟକାରିଣୀ ସଦସ୍ୟ ତଥା ଭଣ୍ଡାରିପୋଖରୀ ନିର୍ବାଚନ ମଣ୍ଡଳୀ ନେତା ବଦ୍ରୀ ନାରାୟଣ ଧଳଙ୍କ ନେତୃତ୍ୱରେ ଏକ ପ୍ରତିନିଧି ଦଳ ତହସିଲଦାରଙ୍କୁ ଭେଟି ଦାବୀ ପତ୍ର ପ୍ରଦାନ କରିଛନ୍ତି । ପ୍ରକାଶ ଯେ, ସରକାର କ୍ଷତିଗ୍ରସ୍ତ ଚାଷୀଙ୍କୁ ଆର୍ଥିକ ସହାୟତା ଯୋଗାଇ ଦେବାକୁ ଘୋଷଣା କରିବା ପରେ କୃଷି ଓ ରାଜସ୍ୱ ବିଭାଗ ପକ୍ଷରୁ ଅନୁଧ୍ୟାନ କରାଯାଇ ମୋଟ ୭୧୯୪ ଜଣ କ୍ଷତିଗ୍ରସ୍ତ ଚାଷୀ ମାନଙ୍କର ତାଲିକା ଚୁଡାନ୍ତ କରିଥିଲେ । ଏହି ସହାୟତା ରାଶି ବାବଦରେ ସରକାର ୧ କୋଟି ୨୫ ଲକ୍ଷ ୬୬ ହଜାର ୬୦୫ ଟଙ୍କା ତହସିଲକୁ ପ୍ରଦାନ କରିଥିଲେ । ୮ ମାସ ବିତି ଯାଇଥିଲେ ମଧ୍ୟ ଅଦ୍ୟାବଧି ଅର୍ଦ୍ଧାଧିକ ଚାଷୀ ସହାୟତା ରାଶି ପାଇବାରୁ ବଂଚିତ ହୋଇଛନ୍ତି । କ୍ଷତିଗ୍ରସ୍ତ ଚାଷୀ ମାନଙ୍କୁ ତୁରନ୍ତ ସହାୟତା ରାଶି ପ୍ରଦାନ କରାନଗଲେ ବିଜେପି ପକ୍ଷରୁ ଆନ୍ଦୋଳନାତ୍ମକ ପନ୍ଥା ଅବଲମ୍ବନ କରାଯିବ ବୋଲି ଚେତାବନୀ ଦିଆଯାଇଛି । ଆସନ୍ତା ୧୫ ତାରିଖ ସୁଦ୍ଧା ସମସ୍ତ କ୍ଷତିଗ୍ରସ୍ତ ଚାଷୀଙ୍କୁ ସହାୟତା ରାଶି ପ୍ରଦାନ କରାଯିବ ବୋଲି ତହସିଲଦାର ସରୋଜକାନ୍ତ ନାୟକ ପ୍ରତିଶୃତି ଦେଇଥିଲେ । ଏହି ପ୍ରତିନିଧି ଦଳରେ ମଣ୍ଡଳ ସଭାପତି ନବ କିଶୋର ବଳ, ଖଗେଶ୍ୱର ବେହେରା, ଶିବାନନ୍ଦ ଦାସଅଧିକାରୀ, ପୂର୍ବତନ ସରପଞ୍ଚ ପଙ୍କଜିନୀ ଲେଙ୍କା, ଜିତେନ୍ଦ୍ର ନାୟକ, କିଶୋର କିଙ୍କର ପଢିଆରୀ, ମନୋଜ ବିଶ୍ୱାଳ, ବରିଷ୍ଠ ନେତା ଶଙ୍କର୍ଷଣ ଜେନା, ବନମାଳୀ ଜେନା, ପୂର୍ଣ୍ଣ ଚନ୍ଦ୍ର ସାହୁ, କିଶୋର ବିଶ୍ୱାଳ, ଧ୍ରୁବ ଚରଣ ମାଝୀ, ସନ୍ତୋଷ ନାୟକ, ନିରଞ୍ଜନ ଜେନା, କୃଷକ ନେତା ସରୋଜ ମଲ୍ଲିକ, ବସନ୍ତ ବାରିକ, ବିଦ୍ୟାଧର ସେନାପତି, ପଦ୍ମଲୋଚନ ପାତ୍ର, ହରେକୃଷ୍ଣ ସେନାପତି, ରମାକାନ୍ତ ନାୟକ, ପ୍ରସନ୍ନ ଗିରି ଉପସ୍ଥିତ ରହି ଆଲୋଚନାରେ ଅଂଶ ଗ୍ରହଣ କରିଥିଲେ ।
