କପାଳୀ ନଦୀରେ ଗୋଡ ଖସି ଛାତ୍ରଙ୍କ ମୃତ୍ୟୁ

ବନ୍ତ, (ଚାନ୍ଦିନୀ ମହାନ୍ତି):ବନ୍ତ ବ୍ଲକ ଗଣିଜାଙ୍ଗ ପଞ୍ଚାୟତ କନ୍ତିଆ ଗ୍ରାମର ଗୟାଧର ପୃଷ୍ଟିଙ୍କ ପୁଅ ଦୀପକ(୧୭)ଙ୍କର କପାଳୀ ନଦୀରେ ଗୋଡ ଖସି ମୃତ୍ୟୁବରଣ କରିଥିବା ଜଣାଯାଇଛି । ସେ କେନ୍ଦୁଆପଦା କଲେଜର ଯୁକ୍ତ ୨ କଳା ଛାତ୍ର ଅଟନ୍ତି । ସେ ଚଳିତ ବର୍ଷ ଯୁକ୍ତ ୨ ପରୀକ୍ଷାରେ ପାସ୍ ମଧ୍ୟ କରିଥିଲେ । ମଙ୍ଗଳବାର ସକାଳେ ସେ ନିଜ ଘର ପଛ ପାଖ କପାଳୀ ନଦୀକୁ ଶୌଚ ହେବା ପାଇଁ ଯାଇଥିଲେ । ୧ ଘଣ୍ଟାରୁ ଅଧିକ ସମୟ ହେବ ପୁଅ ନଫେରିବାରୁ ପରିବାରଲୋକେ ବହୁ ଖୋଜାଖୋଜି କରିଥିଲେ । ପରେ ସକାଳ ୯ଟାରେ ପୁଅକୁ ପରିବାରଲୋକେ କପାଳୀ ନଦୀରୁ ଉଦ୍ଧାର କରି ଭଦ୍ରକ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି । ଏନେଇ ଭଦ୍ରକ ଗ୍ରାମାଞ୍ଚଳ ଥାନାରେ ଏକ ଅପମୃତ୍ୟୁ ମାମଲା ରୁଜ୍ଜୁ ହୋଇଛି । ପ୍ରକାଶ ଥାଉକି, କପାଳୀ ନଦୀରେ ବାରମ୍ବାର ଅତଡା ଖସିବା ନେଇ ସ୍ଥାନୀୟ ଅଞ୍ଚଳବାସୀ ପ୍ରଶାସନର ଦୃଷ୍ଟି ଆକର୍ଷଣ କରିଆସୁଛନ୍ତି । ହେଲେ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉନଥିବା ଅଭିଯୋଗ ହୋଇଛି । ପୂର୍ବରୁ ଏହି ସ୍ଥାନରେ ଜଣେ ମହିଳାଙ୍କ ଗୋଡ ଖସି ମୃତ୍ୟୁବରଣ କରିଥିଲେ । ଜିଲା ପ୍ରଶାସନ ଏହି ଘଟଣାକୁ ଗୁରୁତ୍ୱ ଦେଇ ଉକ୍ତ ସ୍ଥାନରେ ସୁରକ୍ଷାକାନ୍ଥ ତିଆରି କରିବାକୁ ଦାବୀ ହୋଇଛି ।