ଡକାୟତି ଯୋଜନା ପଣ୍ଡ, ୫ଜଣ ଗିରଫ

କୁକୁଡାଖଣ୍ଡି, (ବିଭୂନନ୍ଦନ ପଣ୍ଡା):ଗତକାଲି ବିଳମ୍ବିତ ରାତିରେ କିଛି ଏରୋଗୁଲା ସମ୍ପ୍ରଦାୟର ଲୋକମାନେ ଡକାୟତି କରିବା ପାଇଁ ଯୋଜନା ଚଳେଇଥିବା ବେଳେ ନିମଖଣ୍ଡି ଥାନା ପୋଲିସ ସେମାନଙ୍କୁ ଗିରଫ କରି କୋର୍ଟ ଚାଲାଣ କରିଥିବା ସୂଚନା ମିଳିଛି। ସୂଚନା ଅନୁଯାୟୀ, ନିମଖଣ୍ଡି ଥାନା ପୋଲିସ ପକ୍ଷରୁ ଶନିବାର ବିଳମ୍ବିତ ରାତିରେ ରାତ୍ରିକାଳୀନ ପେଟ୍ରୋଲିଂ କରୁଥିବା ବେଳେ କିଛି ଏରୋଗୁଲା ସମ୍ପ୍ରଦାୟର ଲୋକମାନେ ଅନ୍ଧାରୁଆ ସ୍ଥାନରେ ବସି ମଦ୍ୟପାନ କରିବା ସହ ଡକାୟତି ପାଇଁ ଯୋଜନା ଚଳାଇଥିଲେ ।ଏହି ସମୟରେ ପୋଲିସ ଉକ୍ତ ସ୍ଥାନରେ ପହଞ୍ଚି ଡକାୟତି ଯୋଜନା ପଣ୍ଡ କରିବା ସହ ୫ଜଣ ଅଭିଯୁକ୍ତଙ୍କୁ କାବୁ କରିବାରେ ସଫଳ ହୋଇଛି।ଗିରଫ ଅଭିଯୁକ୍ତ ମାନଙ୍କ ନିକଟରୁ ୩ଟି ଲୁହା ରଡ୍,୧ ଲୁହା ଶାବଳ,୧ ଟର୍ଚ୍ଚ,୨ଟି ଅଧା ଜଳିଥିବା ମହମବତୀ ପୋଲିସ ଜବତ କରିଥିବା ବେଳେ ଗିରଫ ଅଭିଯୁକ୍ତ ମାନେ ଚାମାଖଣ୍ଡି ଥାନା ଅନ୍ତର୍ଗତ ଟାଙ୍ଗଣାପଲୀ ଗ୍ରାମର କେ. ଟୁଙ୍ଗୁରୁ(୨୫),କେ. ଜିତୁ,ଲକ୍ଷ୍ମୀପୁର ଗ୍ରାମର କେ. ମିଥୁନ୍(୩୦),କେ. ତୋଫାନ(୨୫),କେ. ସୁଦାମ(୧୯) ବୋଲି ଜଣାପଡିଛି। ଅଭିଯୁକ୍ତ ମାନଙ୍କ ବିରୋଧରେ ନିମଖଣ୍ଡି ଥାନା କେସ ନଂ ୩୫୦/୨୩ ପ୍ରକାରେ ମାମଲା ରୁଜୁ କରାଯିବା ସହ ୟୁ/ଏସ୍ ୩୯୯/୪୦୨ ଆଇପିସି ଧାରା ଅନୁସାରେ ରବିବାର ଦିନ କୋର୍ଟ ଚାଲାଣ କରାଯାଇଛି।ତେବେ ଗିରଫ ଅଭିଯୁକ୍ତ ମାନେ ଗତ କିଛି ଦିନ ପୂର୍ବେ ଗୁରୁଣ୍ଠି ପଞ୍ଚାୟତ ଅନ୍ତର୍ଗତ ଶ୍ରୀରଙ୍ଗରାଜ୍ ପୁର ଗ୍ରାମରେ ହୋଇଥିବା ସିରିଜ ଚୋରି ଘଟଣାରେ ଜଡ଼ିତ ଥିବା ପ୍ରକାଶ କରିଛନ୍ତି। ଏମାନଙ୍କ ବିରୋଧରେ ଅନ୍ୟ ଥାନା ମାନଙ୍କରେ ମଧ୍ୟ ବିଭିନ୍ନ ମାମଲା ରୁଜୁ ହୋଇଥିବା ଥାନା ଅଧିକାରୀ ରେବତୀ ଶବର ସୂଚନା ଦେଇଛନ୍ତି ।