ଉଚ୍ଚ ଜୁଆର ରେ ଖୋଲିଲା କେଳୁଣୀ ମୁହାଁଣ :ଶୈବ ପୀଠ ପାଇଁ ବଢୁଛି ବିପଦ

କାକଟପୁର /ଅସ୍ତରଙ୍ଗ(ଶୁଭାଶିଷ ଖଣ୍ଡୁଆଳ) :-କେନ୍ଦ୍ରୀୟ ବଙ୍ଗୋପ ସାଗର ରେ ସୃଷ୍ଟି ହୋଇଛି ଲଘୁଚାପ ପ୍ରଭାବ ରେ ସମୁଦ୍ର ଉଚ୍ଚ ଉଚ୍ଚ ଜୁଆର ରେ କ୍ରମଶଃ ଖୋଲିବାରେ ଲାଗିଛି ପୁରୀ ଜିଲ୍ଲା ଅସ୍ତରଙ୍ଗ ନିକଟସ୍ଥ କେଳୁଣୀ ମୁହାଁଣ, ଯାହା ଫଳରେ ନିକଟରେ ଥିବା ବେଲେଶ୍ୱର ଶୈବ ପୀଠ ପ୍ରତି ବିପଦ ବଢୁଛି। ରାଜ୍ୟରେ ପ୍ରବାହିତ ହେଉଛି ସର୍ବ ପୁରାତନ ପ୍ରାଚୀ ନଦୀ। କୁହାଯାଏ ଗଙ୍ଗା ନଦୀ ଠାରୁ ପୁରାତନ ନଦୀ ହେଉଛି ପ୍ରାଚୀ ନଦୀ। ପ୍ରାଚୀ ନଦୀର ଅବବାହିକା ରେ ଅନେକ ମଠ ଏବଂ ମନ୍ଦିର ଗଢି ଉଠିଛି। ସେଥିମଧ୍ୟରୁ ଏକାଦଶ ମାଧବ ଏବଂ ଦ୍ୱାଦଶ ଶମ୍ଭୁ ପୀଠ ଏହି ନଦୀ ଅବବାହିକାରେ ଦେଖିବାକୁ ମିଳିଥାଏ। ପୁରୀ ଜିଲ୍ଲା ଅସ୍ତରଙ୍ଗ ନିକଟସ୍ଥ କେଳୁଣୀ ମୁହାଁଣ ନିକଟରେ ରହିଥିବା ସର୍ବ ପ୍ରାଚୀନ ଶୈବ ପୀଠ ବେଲେଶ୍ୱର ଶୈବ ପୀଠ।

ପ୍ରାଚୀ, ଦେଵୀ ଏବଂ କାଦୁଆ ନଦୀର ସଙ୍ଗମ ସ୍ଥଳୀ କେଳୁଣୀ ମୁହାଁଣ ତ୍ରିକୋଣ ଭୂମିରେ ରହିଛି ବେଲେଶ୍ୱର ଶୈବପୀଠ। ଶ୍ରଦ୍ଧାଳୁ ମାନେ ଜୁଆର ଭଟା ସମୟରେ ଡ଼ଙ୍ଗା ପାରି ହୋଇ ଆସିଥାନ୍ତି ଏବଂ ଜୁଆର ଛାଡ଼ିଯିବା ପରେ ନଦୀର ପଠାରେ ଚାଲି ଚାଲି ଯାଇଥାନ୍ତି। ଏଠିକାର ପ୍ରାକୃତିକ ସୌନ୍ଦର୍ଯ୍ୟ ଶ୍ରଦ୍ଧାଳୁଙ୍କୁ ଏଠାକୁ ବାରମ୍ବାର ଆସିବାକୁ ଆକର୍ଷିତ କରିଥାଏ। ସମୁଦ୍ର, ପ୍ରାଚୀ, ଦେବୀ ଏବଂ କାଦୁଆ ନଦୀର ସଙ୍ଗମର ଦୃଶ୍ୟ ଶୈବପୀଠ ଟିକୁ ସ୍ୱତନ୍ତ୍ର ଭାବେ ଚିତ୍ରଣ କରିଛି। ହେଲେ ବେଲେଶ୍ୱର ପୀଠ ପାଇଁ କାଳ ସାଜିଛି କେଳୁଣୀ ମୁହାଁଣ ଓ ପ୍ରାଚୀ ନଦୀର ମୁହାଁଣ ଧାର। ହେଲେ ନଦୀର ପ୍ରଖର ସ୍ରୋତ ଶୈବପୀଠର ବାଲିବନ୍ତ କୁ କ୍ଷୟ କରି ଚାଲିଛି,ଫଳରେ ଶୈବପୀଠ ପରିସରରେ ରହିଥିବା ମନ୍ଦିର ପ୍ରତି ବିପଦ ସୃଷ୍ଟି ହୋଇଛି। କେନ୍ଦ୍ରୀୟ ବଙ୍ଗୋପସାଗର ରେ ସୃଷ୍ଟି ହୋଇଛି ୧୩ତାରିଖ ରୁ ଲଘୁଚାପ। ଉତ୍ତର ପଶ୍ଚିମ ବଙ୍ଗୋପସାଗର ଲଘୁଚାପ ସୃଷ୍ଟି ଫଳରେ ସମୁଦ୍ର ଉଚ୍ଚ ଜୁଆର କୂଳ ଲଂଘୁଛି।ପ୍ରାଚୀ ନଦୀ ଏବଂ ଦେବୀ ନଦୀର ସଙ୍ଗମ ସ୍ଥଳରେ କେଳୁଣୀ ମୁହାଁଣରୁ ଆସୁଥିବା ଜୁଆର ଏବଂ ଭଟ୍ଟାର ସ୍ରୋତ ଦିନକୁ ଦିନ ବେଲେଶ୍ୱର ମନ୍ଦିରକୁ ନିଜ ଗର୍ଭରେ ଲୀନ କରିବାକୁ ଯେମିତି ପ୍ରତିଯୋଗିତା କରୁଛି। ନଦୀ ଠାରୁ ମାତ୍ର ଅଳ୍ପ କେତେ ମିଟର ଦୂରରେ ରହିଥିବା ମନ୍ଦିର, କେଳୁଣୀ ମୁହାଁଣ ଖୋଲିବା ପରେ କ୍ରମଶଃ ବଢୁଛି ବିପଦ। ପୂର୍ବରୁ ବେଲେଶ୍ୱର ଶୈବ ପୀଠକୁ ସୌନ୍ଦର୍ଯ୍ୟ କରଣ ପାଇଁ ୫ଟି ପକ୍ଷରୁ ୯ଲକ୍ଷ ଟଙ୍କାରୁ ଉର୍ଦ୍ଧ ଅନୁଦାନ ଆସିଥିଲେ ମଧ୍ୟ ଏହି ପୀଠଟି ଏବେ ମୁହାଁଣ ମୁହଁରେ ନିଶ୍ଚିହ୍ନ ହେବାକୁ ବସିଛି। ଯାହାକୁ ନେଇ ଚିନ୍ତାରେ ସ୍ଥାନୀୟ ଅଞ୍ଚଳବାସୀ। ମନ୍ଦିର ସୁରକ୍ଷା ପାଇଁ ସ୍ଥାନୀୟ ପ୍ରଶାସନ ଗୁରୁତ୍ୱର ଶହ ନେଉନଥିବାରୁ ସ୍ଥାନୀୟ ଅଞ୍ଚଳବାସୀ ଅନେକ ସମୟରେ ନିଜେ ବାଲି ବସ୍ତା ପକାଇ ମନ୍ଦିର ସୁରକ୍ଷା ଦେବାକୁ ଚେଷ୍ଟା କରିଛନ୍ତି। କିନ୍ତୁ ବର୍ତମାନ ସୃଷ୍ଟି ହୋଇଥିବା ଲଘୁଚାପ ପ୍ରଭାବ ରେ ଉଚ୍ଚ ଜୁଆର ଯୋଗୁଁ ଖୋଲିଯାଇଛି କେଳୁଣୀ ମୁହାଁଣ। ଯାହାର ପ୍ରଭାବ ରେ ବେଲେଶ୍ୱର ମନ୍ଦିର ପ୍ରତି ବିପଦ ସୃଷ୍ଟି ହୋଇଛି। ଅନେକ ସମୟରେ ଉଚ୍ଚ ଜୁଆର, ନଦୀର ସ୍ରୋତ ବାଲି ବସ୍ତା କୁ ଭସାଇ ନେଇଯାଇଛି।ସ୍ଥାନୀୟ ଲୋକେ ଦାବୀ କରିଛନ୍ତି ବହୁ ପୁରାତନ ଶୈବ ପୀଠ ପ୍ରତି ଜିଲ୍ଲା ପ୍ରଶାସନ ଓ ସ୍ଥାନୀୟ ପ୍ରଶାସନ ଗୁରୁତର ଶହ ନେଇ ସୁରକ୍ଷା ପାଇଁ ବନ୍ଦୋବସ୍ତ କରନ୍ତୁ।