ସେପ୍ଟେମ୍ବର ୫ରେ ଗୁରୁପୂଜନ ନିମନ୍ତେ ପ୍ରସ୍ତୁତି ବୈଠକ

ବେତନଟୀ ( ଉଦିତ କୁମାର ପରିଡା ): ମୟୂରଭଞ୍ଜ ଜିଲ୍ଲା ବେତନଟୀ ଆଞ୍ଚଳିକ ଗୁରୁପୂଜନ କମିଟି ପକ୍ଷରୁ ୨୦ତମ ଗୁରୁପୂଜନ ଉତ୍ସବ ନିମନ୍ତେ ଏକ ପ୍ରସ୍ତୁତି କମିଟି ବୈଠକ ଅନୁଷ୍ଠିତ ହୋଇଯାଇଛି । ଉକ୍ତ କମିଟିର ଅଧ୍ୟକ୍ଷ ପ୍ରକାଶ ବେହେରାଙ୍କ ପୌରହିତ୍ଵରେ ପ୍ରତ୍ୟେକ ବର୍ଷ ଭଳି ୫ ସେପ୍ଟେମ୍ବର ସ୍ବର୍ଗତ ରାଧାକ୍ରିଷ୍ଣନଙ୍କ ଜନ୍ମଦିନରେ ବେତନଟୀ ସ୍ଥ ଧର୍ମଶାଳା ଠାରେ ସକାଳ ୯ଘ ୩୦ ମିନିଟ୍ ସମୟରେ ଉକ୍ତ ଗୁରୁପୂଜନ କାର୍ଯ୍ୟକ୍ରମ ଅନୁଷ୍ଠିତ ହେବାର ସ୍ଥିରୀକୃତ ହେଲା । ପୂଜନ କମିଟିର ସଂପାଦକ ଅରୁଣ କୁମାର ଓତା ପୂର୍ବବର୍ଷର ଆୟବ୍ୟୟ ଓ କାର୍ଯ୍ୟର ସମୀକ୍ଷା ସହ ନୂତନ ପ୍ରସ୍ତାବମାନ ଆଗତ କରିଥିଲେ ଆଞ୍ଚଳିକ ଗୁରୁପୂଜନ କମିଟିର ପ୍ରତିଷ୍ଠାତା ସ୍ବର୍ଗତ ଗୋଲକ ବିହାରୀ ନାଏକଙ୍କ ଧର୍ମପତ୍ନୀ ସୁବାସିନୀ ନାଏକଙ୍କ ଉପସ୍ଥିତିରେ କମିଟିର କିଛି ନୂତନ ସଭ୍ୟ ଗ୍ରହଣ କରାଗଲା । ଆଲୋଚନାରେ ହରିଶଚନ୍ଦ୍ର ନନ୍ଦଗୋସ୍ବାମୀ, ଜୟନ୍ତ କୁମାର ପଟ୍ଟନାୟକ, ସଚ୍ଚିଦାନନ୍ଦ ମହାନ୍ତି, ପ୍ରବୀର କୁମାର ବାରିକ, କୁନା ମହାନ୍ତ, ଅଜୟ କୁମାର ବେହେରା ପ୍ରମୁଖ ଅଂଶ ଗ୍ରହଣ କରିଥିଲେ । ଶେଷରେ ସଭ୍ୟ ସୁନୀଲ କୁମାର ଖଣ୍ଡେଲୱାଲ ଧନ୍ୟବାଦ ଅର୍ପଣ କରିଥିଲେ ।