ମୋଟରସାଇକେଲ ଚୋରି ରାକେଟ୍ର ପର୍ଦ୍ଦାଫାସ, ୫ ଗିରଫ
କଟକ, (ଓ୍ବାଇଏନଏସ): ମୋଟରସାଇକେଲ ଚୋରି ରାକେଟ୍ର ପର୍ଦ୍ଦାଫାସ କରିଛି କଟକ ସିଆରଆରଆଇ ଥାନା ପୁଲିସ। ଏହି ଘଟଣାରେ ପୁଲିସ ୫ ଜଣଙ୍କୁ ଗିରଫ କରିବା ସହ ୩ଟି ମୋଟରସାଇକେଲ ଓ ଗୋଟିଏ ସ୍କୁଟି ସମେତ ୩ଟି ମୋବାଇଲ ଫୋନ୍ ଜବତ କରିଛି। ଗିରଫ ଅଭିଯୁକ୍ତମାନେ ହେଲେ କଟକ ସିଆରଆରଆଇ ଥାନା ଅଧୀନ ବିଦ୍ୟାଧରପୁରର ଦେବାଶିଷ ମହାରଣା ଓରଫ ଜଗା (୨୭), ଯାଜପୁର ଜିଲ୍ଲା ବୈରୀ ଥାନା ଅଧୀନ ଛତିଆ ବିଦ୍ୟାଧରପୁରର ସରୋଜ ପାଲ ଓରଫ ଚିଣ୍ଟୁ (୨୬), କଟକ ଜିଲ୍ଲା ମାହାଙ୍ଗା ଥାନା ଅଧୀନ ପାଶୁଳୁଣ୍ଡାର ରଞ୍ଜନ କୁମାର ଦାସ ଓରଫ ଗେଞ୍ଜ (୨୫), ଅଳିଜଡ଼ାର ପ୍ରଭାତ କୁମାର ଜେନା (୨୧) ଏବଂ ଯାଜପୁର ଜିଲ୍ଲା ବାଲିଚନ୍ଦ୍ରପୁର ଥାନା ଅଧୀନ ପଟଣା ଅଞ୍ଚଳର କୈଳାସ ପ୍ରଧାନ (୨୧)। ପୁଲିସ ସୂଚନା ଅନୁଯାୟୀ, ୨୨ ସେପ୍ଟେମ୍ବର ମଧ୍ୟରାତ୍ରିରେ ଦୁର୍ଗା ପ୍ରସାଦ ରାଉତ ତାଙ୍କ ଭଡ଼ାଘର ବାହାରେ ହିରୋ ସ୍ପ୍ଲେଣ୍ଡର ପ୍ଲସ୍ ମୋଟରସାଇକେଲ (OD-21E-1208) ରଖିଥିଲେ। ପରଦିନ ଗାଡ଼ିଟି ଚୋରି ହୋଇଥିବା ଜାଣି ସେ ସିଆରଆରଆଇ ଥାନାରେ ଅଭିଯୋଗ କରିଥିଲେ। ଏନେଇ ସିଆରଆରଆଇ ଥାନା କେସ୍ ନମ୍ବର ୨୬୨/୨୦୨୬ ରୁଜୁ କରି ତଦନ୍ତ ଆରମ୍ଭ କରିଥିଲା। ତଦନ୍ତ ବେଳେ ପୁଲିସ ଘଟଣାସ୍ଥଳ ଯାଞ୍ଚ କରିବା ସହ ସିସିଟିଭି ଫୁଟେଜ୍ ମଧ୍ୟ ଯାଞ୍ଚ କରିଥିଲା। ଏବଂ ବିଭିନ୍ନ ସୂତ୍ରରୁ ତଥ୍ୟ ସଂଗ୍ରହ ଓ ପୁରୁଣା ଅପରାଧୀଙ୍କ ସମ୍ପର୍କରେ ଯାଞ୍ଚ କରିଥିଲା। ଏହି ସମୟରେ ଦେବାଶିଷ ମହାରଣା ଓରଫ ଜଗାକୁ ପୁଲିସ ଧରିଥିଲା। ପୁଲିସର କହିବା ଅନୁଯାୟୀ, ପଚରାଉଚରା ବେଳେ ସେ ଚୋରିରେ ନିଜର ସମ୍ପୃକ୍ତି ସମ୍ପର୍କରେ କହିବା ସହ ଚୋରି ହୋଇଥିବା ଗାଡ଼ିଟିକୁ ସରୋଜ ପାଲ ଓରଫ ଚିଣ୍ଟୁଙ୍କୁ ଦେଇଥିବା ଜଣାପଡ଼ିଥିଲା। ପରେ ପୁଲିସ ଅନ୍ୟ ୪ ଜଣଙ୍କୁ ମଧ୍ୟ ଗିରଫ କରିଥିଲା। ସେମାନଙ୍କଠାରୁ ହିରୋ ସ୍ପ୍ଲେଣ୍ଡର ପ୍ଲସ୍ (OD-21E-1208), ହିରୋ ଏଚଏଫ ଡିଲକ୍ସ (OR-04K-4232), ହିରୋ ଗ୍ଲାମର (OD-05-Q-9127) ଏବଂ ହିରୋ ପ୍ଲେଜର ସ୍କୁଟି (OR-02-BC-6153) ଜବତ ହୋଇଛି।ଏଥିସହ ନୀଳ ରଙ୍ଗର ଭିଭୋ ୨୧, ରୂପା ରଙ୍ଗର ଓପୋ ଏବଂ କଳା ରଙ୍ଗର ଓପୋ ଏ୭—ଏଭଳି ୩ଟି ମୋବାଇଲ ଫୋନ୍ ମଧ୍ୟ ଜବତ କରାଯାଇଛି। ପୁଲିସର ପ୍ରାଥମିକ ତଦନ୍ତ ଅନୁଯାୟୀ, ଅଭିଯୁକ୍ତମାନେ ଏକ ଗ୍ୟାଙ୍ଗ୍ ଭାବେ କାମ କରୁଥିଲେ। ବିଭିନ୍ନ ଥାନା ଅଞ୍ଚଳରୁ ମୋଟରସାଇକେଲ ଚୋରି କରିବା ପରେ ସେଗୁଡ଼ିକୁ ସମ୍ଭାବ୍ୟ ଗ୍ରାହକଙ୍କୁ ବିକ୍ରି କରୁଥିବା ପୁଲିସ କହିଛି।ଗିରଫ ଅଭିଯୁକ୍ତଙ୍କ ବିରୋଧରେ କଟକ ସମେତ ବିଭିନ୍ନ ଥାନାରେ ଏକାଧିକ ମାମଲା ରହିଥିବା ମଧ୍ୟ ପୁଲିସ ପକ୍ଷରୁ କୁହାଯାଇଛି। ମାମଲାର ତଦନ୍ତ ସିଆରଆରଆଇ ଥାନାର ଏସଆଇ ରାକେଶ ରାଉତ କରୁଛନ୍ତି। ଗିରଫ ସମସ୍ତ ୫ ଅଭିଯୁକ୍ତଙ୍କୁ ୨୫ ସେପ୍ଟେମ୍ବରରେ କୋର୍ଟ ଚାଲାଣ କରାଯାଇଛି।
