ଆଗକୁ ଆସିକା ପୌର ପରିଷଦ ନିର୍ବାଚନ : ଏବେଠୁ ପ୍ରସ୍ତୁତ ହେଲେଣି ବିଜେଡିର ନେତା ଓ କର୍ମୀ
ଆସିକା (ୱାଇଏନ୍ଏସ୍) : ରାଜ୍ୟ ସରକାରଙ୍କ ପକ୍ଷରୁ ଆସିକା ଏନ୍ଏସିକୁ ମ୍ୟୁନିସିପାଲଟି ଘୋଷଣା ହେବା ପରେ ଆଉ କେଇଟା ମାସ ପରେ କର୍ପୋରେଟର୍ ଓ ମେୟର୍ ପଦବୀ ଲାଗି ନିର୍ବାଚନ ଅନୁଷ୍ଠିତ ହେବ । ୧୯୫୭ ମସିହା ନଭେମ୍ବର ମାସ ୧୫ ତାରିଖରେ ଗଠିତ ହୋଇଥିବା ଆସିକା ଏନ୍ଏସିର ପରିସର ବୃଦ୍ଧି ପାଇଛି । ପୂର୍ବରୁ ୧୮ଟି ୱାର୍ଡରେ ସୀମିତ ଥିବା ଆସିକା ପୌରପାଳିକା ଘୋଷଣା ହେବା ପରେ ୱାର୍ଡସଂଖ୍ୟା ୨୩କୁ ବୃଦ୍ଧି ପାଇଛି । ଆଗାମୀ କିଛି ମାସ ପରେ ପ୍ରଥମ କରି ଆସିକା ପୌର ପରିଷଦର ନିର୍ବାଚନ ହେବାକୁ ଥିବା ବେଳେ ବର୍ତ୍ତମାନ ଠାରୁ ବହୁ ଯୁବ ଭୋଟରଙ୍କ ମଧ୍ୟରେ ଉତ୍ସାହ ପରିଲକ୍ଷିତ ହୋଇଛି । କାରଣ ଭୋଟରମାନେ ସେମାନଙ୍କ ମନ ପସନ୍ଦର କର୍ପୋରେଟର୍ ଓ ମେୟର୍କୁ ବାଛିବେ । ଆସନ୍ତା ଆସିକା ପୌର ପରିଷଦ ନିର୍ବାଚନ କେବେ ହେବ ସେ ସଂକ୍ରାନ୍ତରେ ସ୍ପଷ୍ଟ ଭାବେ କୌଣସି ସୂଚନା ମିଳିପାରିନଥିଲେ ମଧ୍ୟ ଆସିକା ପୌର ପରିଷଦକୁ ହତେଇବା ପାଇଁ ଏବେଠୁ ବିଜେଡି ତାର ରଣନୀତି ଆରମ୍ଭ କରିଦେଇଥିବା ସଚେତନ ନାଗରିକ ମହଲରେ ଆଲୋଚନା ହେଉଛି । ବିଜୁ ଜନତା ପାଇଁ ଆସନ୍ତା ଆସିକା ପୌରପାଳିକା ନିର୍ବାଚନ ସମ୍ମାନ ଓ ସ୍ୱାଭିମାନର ପ୍ରଶ୍ନ ଥିବାରୁ ଦଳୀୟ ସଂଗଠନକୁ ତୃଣମୂଳ ସ୍ତରରୁ ଆହୁରି ସୁଦୃଢ କରିବା ଲାଗି ଦଳର ହେବିୱେଟ୍ ମାନେ ବିଚାରବିମର୍ଶ ଜାରି ରଖିଥିବା ଦେଖିବାକୁ ମିଳୁଛି । ଗତ ୨୦୨୨ ମସିହାରେ ଅନୁଷ୍ଠିତ ହୋଇଥିବା ଆସିକା ବିଜ୍ଞାପିତ ଅଞ୍ଚଳ ପରିଷଦ ନିର୍ବାଚନରେ ବିଜୁ ଜନତା ଦଳର କାଉନସିଲରମାନେ ସର୍ବାଧିକ ୧୪ଟି ୱାର୍ଡରେ ବିଜୟଲାଭ କରିଥିଲା ବେଳେ ୨ଟି ୱାର୍ଡରେ ବିଜେପି ଏବଂ ଆଉ ୨ଟି ୱାର୍ଡରେ ସ୍ୱାଧୀନ କାଉନସିଲରମାନେ ବିଜୟଲାଭ କରିଥିଲେ । ବିଜେଡି ସୁପ୍ରିମୋ ନବୀନ ପଟ୍ଟନାୟକ ଓ ଆସିକା ପୂର୍ବତନ ବିଧାୟିକା ମଂଜୁଳା ସ୍ୱାଇଁଙ୍କ ହାତମୁଠାକୁ ଆହୁରି ଟାଣ କରିବା ପାଇଁ ଦଳୀୟ ୁନେତା ଓ କର୍ମୀମାନେ ଏକ ମନ ଏକ ପ୍ରାଣରେ ଏକାଠି ହୋଇ କାର୍ଯ୍ୟକଲେ ଆସନ୍ତା ଆସିକା ପୌରପାଳିକା ନିର୍ବାଚନରେ ବିଜେଡି ପୁଣି ବିଜୟର ଟିକା ନିଶ୍ଚିତ ଭାବେ ପିନ୍ଧିବ ବୋଲି ବିଜୁ ଯୁବ ଜନତା ଦଳର ଜିଲ୍ଲା ସଭାପତି ତଥା ବରିଷ୍ଠ ବିଜେଡି ନେତା ନଚିକେତା ସ୍ୱାଇଁ ଏବଂ ବିଜୁ ଯୁବ ଜନତା ଦଳର ରାଜ୍ୟ ଉପସଭାପତି ତଥା ଜିଲ୍ଲା ପରିଷଦ ସଦସ୍ୟ ବି.ମନୋଜ କୁମାର ଦୋରା ସୂଚନା ଦେଇଛନ୍ତି । ଆଗାମୀ ଆସିକା ପୌରପାଳିକା ନିର୍ବାଚନକୁ ନେଇ ଏବେଠୁ ରାଜନୈତିକ ପାଣିପାଗ ଦିନକୁ ଦିନ ସରଗରମ ହେବାରେ ଲାଗିଛି । ଆସିକା ପୌର ପରିଷଦର ମେୟର୍ ପଦ କେଉଁ ବର୍ଗର ପାଇଁ ସଂରକ୍ଷିତ ରହିବ ଏବଂ କେଉଁ ୱାର୍ଡ କେଉଁ ବର୍ଗଙ୍କ ପାଇଁ ସଂରକ୍ଷିତ ରହିବ ଓ ମେୟର୍ ନିର୍ବାଚନ ନିର୍ବାଚନ ପ୍ରତ୍ୟେକ୍ଷ ଭାବେ ହେବ କି ପରୋକ୍ଷ ଭାବେ ହେବ ସେ ସଂକ୍ରାନ୍ତରେ କୌଣସି ଚୁଡାନ୍ତ ବିଜ୍ଞପ୍ତି ପ୍ରକାଶ ପାଇନଥିଲା ବେଳେ ସହରର ସାହିବସ୍ତିରେ ଆଗାମୀ ନିର୍ବାଚନକୁ ନେଇ ଆଲୋଚନା ଓ ପର୍ଯ୍ୟାଲୋଚନା ଜୋର୍ ଧରିଥିବା ଲକ୍ଷ୍ୟ କରାଯାଇଛି । ଆସିକା ବିଧାନସଭା ନିର୍ବାଚନ ମଣ୍ଡଳୀର ପୂର୍ବତନ ବିଧାୟିକା ଶ୍ରୀମତୀ ମଂଜୁଳା ସ୍ୱାଇଁଙ୍କ ପରାମର୍ଶକ୍ରମେ ଗଞ୍ଜାମ ଜିଲ୍ଲା ବିଜୁ ଯୁବ ଜନତା ଦଳର ସଭାପତି ତଥା ଭେଟେରାନ୍ ବିଜେଡି ନେତା ନଚିକେତା ସ୍ୱାଇଁଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ବିଜୁ ଯୁବ ଜନତା ଦଳର ରାଜ୍ୟ ଉପସଭାପତି ତଥା ଜିଲ୍ଲା ପରିଷଦ ସଦସ୍ୟ ବି.ମନୋଜ କୁମାର ଦୋରା, ବିଜେଡି ନେତା ପ୍ରସନ୍ନ କୁମାର ତ୍ରିପାଠୀ ଓ ଦିଲୀପ କୁମାର ପାଣିଗ୍ରାହୀ, ଆସିକା ନଗର ବିଜେଡି ସଭାପତି ତାରିଣୀ ସେନାପତି, ବିଜେଡି ନେତା ଇଂ ସଚ୍ଚିଦାନନ୍ଦ ରାଉତ, ଜି.ସୂର୍ଯ୍ୟପ୍ରକାଶ ରାଓ, ଶିବଶଙ୍କର ମହାନ୍ତି, ବି.ମୋହନ ରାଓ ଦୋରା, ସନ୍ତୋଷ କୁମାର ପୋଲାଇ, ଲକ୍ଷ୍ମଣ ଭଂଜ, ରାମହରି ଚୌଧୁରୀ, ରାଘବ ନାହାକ, ରଶ୍ମିତା ସେନାପତି, ଆସିକା ଏନ୍ଏସି କାଉନସିଲର ନିଗମାନନ୍ଦ ରାଉତ, ପୂର୍ବତନ କାଉନସିଲର କୈଳାଶ ଚନ୍ଦ୍ର ପ୍ରଧାନ, ଯୁବ ବିଜେଡି ନେତା ଜିତେନ୍ଦ୍ର କୁମାର ମହାରଣା, ଶିବ ପ୍ରସାଦ ଶତପଥୀଙ୍କ ସମେତ ବହୁ ବରିଷ୍ଠ ନେତା ଓ କର୍ମୀ ଆଗାମୀ ଆସିକା ପୌରପାଳିକା ନିର୍ବାଚନରେ ବିଜେଡି ଯେପରି ପୁଣି କ୍ଷମତା ଦଖଲ କରିବ ସେଥିପାଇଁ ରଣନୀତି ନିର୍ଦ୍ଧାରଣରେ ଲାଗି ପଡିଥିବା ସଚେତନ ନାଗରିକ ମହଲରେ ଚର୍ଚ୍ଚା ହେଉଛି । ଆଗାମୀ ୨୦୨୯ ସାଧାରଣ ନିର୍ବାଚନ ପୂର୍ବରୁ ଆସନ୍ତା ଆସିକା ପୌର ପରିଷଦ ନିର୍ବାଚନ ବିଜେଡି ପାଇଁ ଅଗ୍ନି ପରୀକ୍ଷାର ବେଳ ବୋଲି ଆଲୋଚିତ ହେଉଛି । ଗତ ୨୦୨୨ ରେ ଅନୁଷ୍ଠିତ ଆସିକା ପୌର ନିର୍ବାଚନର ସଫଳତାକୁ ପୁଣି ଦୋହରାଇବାକୁ ବିଜେଡି ପ୍ରାକ୍ ପ୍ରସ୍ତୁତି ଚଳାଇଥିବା ଦେଖିବାକୁ ମିଳୁଛି ।
