ଶିକ୍ଷାବିଭାଗ ପକ୍ଷରୁ ନବଭାରତ ସାକ୍ଷରତା କାର୍ଯ୍ୟକ୍ରମ
ଆସିକା (ୱାଇଏନ୍ଏସ୍) : କେନ୍ଦ୍ର ସରକାରଙ୍କ ଶିକ୍ଷା ମନ୍ତ୍ରଣାଳୟର ପରାମର୍ଶ ଏବଂ ରାଜ୍ୟ ସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ବିଭାଗ, ଜିଲ୍ଲା ଶିକ୍ଷାବିଭାଗର ପରାମର୍ଶକ୍ରମେ ଆସିକା ଗୋଷ୍ଠୀ ଶିକ୍ଷାଧିକାରୀ କାର୍ଯ୍ୟାଳୟ ଅଧୀନସ୍ଥ ନଳବଣ୍ଟା, କାଳଷଣ୍ଢପୁର, ଆସିକା, ଖାରିଆ, କେ.ନୁଆଁପଲ୍ଲୀ, ଗଙ୍ଗାପୁର, ବାବନପୁର, ଭେଟନଇ, ବଡଖୋଲି, କେନ୍ଦୁପଦର, ନିମିନା, ହରିଡାପଦର, ବାଲିସିରା କ୍ଳଷ୍ଟର ଅଧୀନସ୍ଥ ପ୍ରାୟ ୧୧୫ରୁ ଉର୍ଦ୍ଧ୍ୱ ବିଦ୍ୟାଳୟରେ ରବିବାର ନବଭାରତ ସାକ୍ଷରତା କାର୍ଯ୍ୟକ୍ରମ ଅଧୀନରେ ସରକାରୀ ବିଦ୍ୟାଳୟର ନିରକ୍ଷର ଓ ସ୍ୱଳ୍ପ ସାକ୍ଷର ଅଭିଭାବକମାନଙ୍କୁ ନେଇ ଫାଉଣ୍ଡେସନ୍ ଲିଟରେସି ଏଣ୍ଡ୍ ନ୍ୟୁମଡେସି ଆସେସ୍ମେଣ୍ଟ ୨୦୨୬ ଉଲ୍ଲାସ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଆସିକା ଗୋଷ୍ଠୀ ଶିକ୍ଷାଧିକାରୀ କାର୍ଯ୍ୟାଳୟ ଅଧୀନସ୍ଥ ପ୍ରାୟ ୧୧୫ରୁ ଉର୍ଦ୍ଧ୍ୱ ପରୀକ୍ଷା କେନ୍ଦ୍ରରେ ସମୂଦାୟ ୬୪୮୫ ଜଣ ନବଭାରତ ସାକ୍ଷରତା କାର୍ଯ୍ୟକ୍ରମ ଅଧୀନରେ ପରୀକ୍ଷା ଦେବା ପାଇଁ ନାମ ପଂଜିତ୍କୃତ କରିଥିଲା ବେଳେ ସେଥି ମଧ୍ୟରୁ ପ୍ରାୟ ୬ ହଜାରରୁ ଉର୍ଦ୍ଧ୍ୱ ଅଣ-ସାକ୍ଷର ପରୀକ୍ଷା ଦେଇଥିବା ଜଣାପଡିଛି । ସାହିତ୍ୟ ଭିତ୍ତିକ ଓ ଗଣିତ ସମ୍ବଳିତ ୫୦ ମାର୍କର ଏହି ନବଭାରତ ସାକ୍ଷରତା କାର୍ଯ୍ୟକ୍ରମ ପରୀକ୍ଷା ପାଇଁ ଅଭିଭାବକମାନଙ୍କୁ ୨ ଘଣ୍ଟା ସମୟ ଦିଆଯାଇଥିଲା । ଆସିକା ଗୋଷ୍ଠୀ ଶିକ୍ଷାଧିକାରୀ ସୁଜିତ୍ କୁମାର ପାଢୀଙ୍କ ପରାମର୍ଶକ୍ରମେ ସହକାରୀ ଗୋଷ୍ଠୀ ଶିକ୍ଷାଧିକାରୀ ଭଂଜ ବେହେରା ଓ ଶିବରାମ ବେହେରାଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ଅନୁଷ୍ଠିତ ହୋଇଥିବା ଏହି ନବଭାରତ ସାକ୍ଷରତା କାର୍ଯ୍ୟକ୍ରମ ପରୀକ୍ଷାକୁ ସୁପରିଚାଳନା କରିବା ଦିଗରେ ପ୍ରଧାନଶିକ୍ଷକ ସୁଶାନ୍ତ କୁମାର ପଣ୍ଡା, ଶିବଶଙ୍କର ଜେନା, ବାଳକୃଷ୍ଣ ହୋତା, ଶିବରାମ ଗୌଡ, ସତ୍ୟନାରାୟଣ ସେଠୀ, ସାରଙ୍ଗଧର ଦାଶ, ଅର୍ଜୁନ ନାହାକ, ଶିବଶଙ୍କର ସ୍ୱାଇଁ, ନିରଞ୍ଜନ ପରିଡା, ଅଂଜୁକ୍ତାରାଣୀ ପଟ୍ଟନାୟକ, ସନ୍ତୋଷ କୁମାର ବେହେରା, ଉର୍ମିଳା ନାହାକ, ପ୍ରମୋଦ କୁମାର ନାହାକ, ସଙ୍ଗୀତା କୁମାରୀ ବେହେରା, ଦିନେଶ୍ କୁମାର ପାତ୍ର, ମନୋଜ କୁମାର ବେହେରା, ସୁଦାମ ବାଡତ୍ୟା, ଗଣପତି ସେଠୀ, ରବିନ୍ଦ୍ର କୁମାର ସାହୁ, ଅମୂଲ୍ୟ କୁମାର ଦାଶଙ୍କ ସମେତ ବିଭିନ୍ନ କ୍ଳଷ୍ଟରର ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ଓ ଶିକ୍ଷାନୁଷ୍ଠାନଗୁଡିକର ଶିକ୍ଷକ ଶିକ୍ଷୟିତ୍ରୀ ମାନେ ସହଯୋଗ କରିଥିବା ଲକ୍ଷ୍ୟ କରାଯାଇଥିଲ । ଆସିକା ଶିକ୍ଷା ବିଭାଗ ପକ୍ଷରୁ ନବଭାରତ ସାକ୍ଷରତା କାର୍ଯ୍ୟକ୍ରମ ଅଧୀନରେ ପରୀକ୍ଷା ଦେବା ପାଇଁ ନାମ ପଂଜିକୃତ କରିଥିବା ଅଭିଭାବକମାନଙ୍କୁ ପୂର୍ବରୁ ଉଲ୍ଲାସ ପୁସ୍ତିକ ପ୍ରଦାନ କରାଯାଇଥିଲା ବେଳେ ମୋବାଇଲ୍ ଆପ୍ ମାଧ୍ୟମରେ ଅଭିଭାବକମାନେ ପରୀକ୍ଷା ଦେବା ପାଇଁ ପ୍ରସ୍ତୁତ ହେଉଥିଲେ । ଯାହାକୁ ଅଭ୍ୟାସ କରି ଅଭିଭାବକମାନେ ପରୀକ୍ଷା ଦେଇଥିବା ଜଣାପଡିଛି । ଘରୋଇ ବିଦ୍ୟାଳୟ ଭଳି ସରକାରୀ ଶିକ୍ଷାନୁଷ୍ଠାନରେ ଛାତ୍ରଛାତ୍ରୀମାନଙ୍କୁ ନିଜ ଘରେ ଶୈକ୍ଷିକ ପରିବେଶ ସୃଷ୍ଟି କରିବା ପାଇଁ କେନ୍ଦ୍ର ସରକାରଙ୍କ ପକ୍ଷରୁ ନବଭାରତ ସାକ୍ଷରତା କାର୍ଯ୍ୟକ୍ରମ ଆରମ୍ଭ କରାଯାଇଥିଲା ବେଳେ ସ୍ୱଳ୍ପ ସାକ୍ଷର ଓ ନିରକ୍ଷର ଅଭିଭାବକମାନଙ୍କୁ ପ୍ରାଥମିକ ସ୍ତରରେ ଜ୍ଞାନ ଶିକ୍ଷା ପୁସ୍ତିକା ଓ ମୋବାଇଲ୍ ଆପ୍ ଦ୍ୱାରା ଶିକ୍ଷା ପ୍ରଦାନ କରାଯାଉଥିବା ଜଣାପଡିଛି । ନିରକ୍ଷରମାନଙ୍କୁ ସାକ୍ଷାର କରିବା ପାଇଁ ଶିକ୍ଷାବିଭାଗ ପକ୍ଷରୁ ଉଲ୍ଲାସ ନାମକ ଏକ ନୁଆଁ ଯୋଜନା ଆରମ୍ଭ ହୋଇସାରିଥିଲା ବେଳେ ଏହି କାର୍ଯ୍ୟକ୍ରମ ଅଣ-ସାକ୍ଷରଙ୍କ ମୁହଁରେ ହସ ଭରୁଥିବା ଦେଖିବାକୁ ମିଳୁଛି । କେନ୍ଦ୍ର ସରକାରଙ୍କ ଦ୍ୱାରା ପ୍ରାୟୋଜିତ ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ହେଉଛି ୧୫ ବର୍ଷରୁ ଅଧିକ ବୟସ୍କ ନିରକ୍ଷରମାନଙ୍କୁ ସାକ୍ଷର କରିବା । କୌଣସି କାରଣବଶତଃ ୧୫ ବର୍ଷରୁ ଉର୍ଦ୍ଧ୍ୱ ବୟସ୍କ ବ୍ୟକ୍ତି ପାଠ ପଢିପାରି ନଥିବା କିମ୍ବା ଆଗ୍ରହ ଥିଲେ ମଧ୍ୟ ପଢିବାର ସୁଯୋଗ ପାଇଥିବା ବ୍ୟକ୍ତିବିଶେଷଙ୍କ ପାଇଁ ଆବଶ୍ୟକୀୟ ଜ୍ଞାନ ଓ ଦକ୍ଷତା ସହିତ ସଶକ୍ତ କରିବା ଏହି କାର୍ଯ୍ୟକ୍ରମର ପ୍ରଥମ ଲକ୍ଷ୍ୟ ନେଇ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଉଲ୍ଲାସ କାର୍ଯ୍ୟକ୍ରମ ଆରମ୍ଭ କରାଯାଇସାରିଛି । ଅଣ-ସାକ୍ଷରମାନଙ୍କୁ ଶିକ୍ଷାର ମୁଖ୍ୟସ୍ରୋତରେ ସାମିଲ୍ କରିବା ସହ ଶିକ୍ଷାର ବିକାଶ ଲାଗି ନବଭାରତ ସାକ୍ଷରତା କାର୍ଯ୍ୟକ୍ରମ ଆୟୋଜନ କେନ୍ଦ୍ର ଓ ରାଜ୍ୟ ସରକାରଙ୍କ ଏକ ମହତ୍ ପଦକ୍ଷେପ ବୋଲି ସଚେତନ ନାଗରିକ ମହଲରେ ଆଲୋଚିତ ହେଉଥିବା ଜଣାପଡିଛି ।
