ନିଆଳି ପନିର ଅପମିଶ୍ରଣ ମାମଲା : ବଦଳିଲେ କଟକ ଖାଦ୍ୟ ସୁରକ୍ଷା ଅଧିକାରୀ
କଟକ,(ଓ୍ବାଇଏନଏସ): ନିଆଳି ଅଞ୍ଚଳରେ ପନିର ଅପମିଶ୍ରଣ ଅଭିଯୋଗ ଘଟଣାରେ ରାଜ୍ୟ ସରକାରଙ୍କ ବଡ଼ ପଦକ୍ଷେପ । ବଦଳିଲେ କଟକ ଜିଲ୍ଲା ଖାଦ୍ୟ ସୁରକ୍ଷା ଅଧିକାରୀ ଅମିତା ଦାସ । ନିଆଳି ଅଞ୍ଚଳର ଦାୟିତ୍ୱରେ ଥିବା ଅମିତା ଦାସଙ୍କ ବିରୋଧରେ ଦାୟିତ୍ୱରେ ଅବହେଳା ଅଭିଯୋଗ ଆସିବା ପରେ ଏହି ବଦଳି ନିର୍ଦ୍ଦେଶ ହୋଇଥିବା ଜଣାପଡ଼ିଛି । ନିଆଳିରୁ ସଂଗ୍ରହ ହୋଇଥିବା ପନିର ନମୁନା ପରୀକ୍ଷା ପାଇଁ ହରିୟାଣାସ୍ଥିତ ଲ୍ୟାବ୍କୁ ପଠାଯାଇଥିଲା । ଲ୍ୟାବ୍ରୁ ଆସିଥିବା ରିପୋର୍ଟରେ ପନିର ଅପମିଶ୍ରିତ ଥିବା ଜଣାପଡ଼ିବା ପରେ ଘଟଣାକୁ ନେଇ ପ୍ରଶାସନିକ ସ୍ତରରେ ତତ୍ପରତା ବଢ଼ିଥିଲା । ଏହାପରେ ଦାୟିତ୍ୱରେ ଅବହେଳାକୁ ନେଇ ସରକାର ଅମିତା ଦାସଙ୍କ ବଦଳି ନିର୍ଦ୍ଦେଶ ଦେଇଛନ୍ତି । ଏହି ଘଟଣା ପରେ ଖାଦ୍ୟ ନମୁନା ଯାଞ୍ଚ ଓ ଅପମିଶ୍ରଣ ରୋକିବା ନେଇ ନଜରଦାରୀ ଆହୁରି କଡ଼ା ହେବା ଆଶା କରାଯାଉଛି । ସୂଚନା ଅନୁସାରେ, ନିଆଳି ଅଞ୍ଚଳରୁ ପନିରର ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ହରିୟାଣାର ଏକ ଲ୍ୟାବ୍କୁ ପଠାଯାଇଥିଲା। ଏହି ନମୁନାର ପରୀକ୍ଷା ରିପୋର୍ଟ ଆସିବା ପରେ ପନିରରେ ଅପମିଶ୍ରଣ ଥିବା ଜଣାପଡ଼ିଥିଲା। ରିପୋର୍ଟ ସାମ୍ନାକୁ ଆସିବା ପରେ ଘଟଣାକୁ ନେଇ ପ୍ରଶାସନିକ ସ୍ତରରେ ଚର୍ଚ୍ଚା ବଢ଼ିଥିଲା। ଖାଦ୍ୟରେ ଅପମିଶ୍ରଣ ରୋକିବା ଏବଂ ଲୋକଙ୍କୁ ନିରାପଦ ଖାଦ୍ୟ ଯୋଗାଇବା ଖାଦ୍ୟ ସୁରକ୍ଷା ବିଭାଗର ମୁଖ୍ୟ ଦାୟିତ୍ୱ। ଏପରି ସ୍ଥିତିରେ ନିଆଳି ଅଞ୍ଚଳରୁ ଅପମିଶ୍ରିତ ପନିର ରିପୋର୍ଟ ଆସିବା ଘଟଣାକୁ ଗୁରୁତ୍ୱର ସହ ନେଇଛି ସରକାର। ଦାୟିତ୍ୱରେ ଅବହେଳା ହୋଇଥିବା ଦର୍ଶାଇ ଅମିତା ଦାସଙ୍କ ବଦଳି କରାଯାଇଛି । ଏହି ଘଟଣା ପରେ ନିଆଳି ସମେତ କଟକ ଜିଲ୍ଲାର ବିଭିନ୍ନ ଅଞ୍ଚଳରେ ଖାଦ୍ୟ ନମୁନା ଯାଞ୍ଚ ଏବଂ ଅପମିଶ୍ରଣ ବିରୋଧୀ ଅଭିଯାନ ଆହୁରି ଜୋରଦାର ହେବା ନେଇ ଚର୍ଚ୍ଚା ଆରମ୍ଭ ହୋଇଛି। ବିଶେଷକରି ପନିର, କ୍ଷୀର ଓ ଅନ୍ୟାନ୍ୟ ଦୁଗ୍ଧଜାତ ଖାଦ୍ୟର ମାନ ଯାଞ୍ଚ ଉପରେ ନଜର ବଢ଼ିପାରେ। ତେବେ ଅପମିଶ୍ରଣରେ ସମ୍ପୃକ୍ତ ବ୍ୟବସାୟୀଙ୍କ ବିରୋଧରେ ଆଗକୁ କି ପଦକ୍ଷେପ ନିଆଯିବ, ତାହା ଉପରେ ଏବେ ନଜର ।
