ଡାକବିଭାଗ କର୍ମଚାରୀଙ୍କ ଦ୍ୱାରା ସ୍ୱର୍ଗତ ଜୀବନକୃଷ୍ଣ ଦାସଙ୍କ ଶ୍ରାଦ୍ଧ ଉତ୍ସବ ସମାରୋହ
ବାଲେଶ୍ୱର, (ସରୋଜ ପଣ୍ଡା):ବାଲେଶ୍ୱର ଡାକ କର୍ମଚାରୀ ଓ ପେନସନ୍ ଭୋଗୀଙ୍କ ତରଫରୁ ସହଦେବଖୁଣ୍ଟାସ୍ଥିତ ସଂଘଗୃହ ଜୀବନକୃଷ୍ଣ ଭବନରେ ପ୍ରତିଷ୍ଠାତା ସଭ୍ୟ ସ୍ୱର୍ଗତ ଜୀବନକୃଷ୍ଣ ଦାସଙ୍କ ୨୬ତମ ଶ୍ରାଦ୍ଧ ଉତ୍ସବ ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହୋଇଯାଇଛି । ଏଥିରେ ସଙ୍ଘର ସଭାପତି ସାଥୀ ଅଜୟ ନାରାୟଣ ଦାସ ସଭାପତିତ୍ୱ କରିଥିଲେ । ବରିଷ୍ଠ ଆଇନଜୀବୀ ନିରଞ୍ଜନ ପରିଡ଼ା ପ୍ରଦୀପ ପ୍ରଜ୍ଜ୍ୱଳନ କରି ଉତ୍ସବକୁ ଉଦ୍ଘାଟନ କରିଥିଲେ । ପୂର୍ବତନ ରେମୁଣା ବିଧାୟକ ତଥା ଶ୍ରମିକ ନେତା ପ୍ରଦୀପ୍ତ କୁମାର ପଣ୍ଡା, ପୂର୍ବତନ ସମ୍ପାଦକ ସାଥୀ ଅକ୍ଷୟ କୁମାର ତ୍ରିପାଠୀ, ସଂପାଦକ ରାଜେନ୍ଦ୍ର ମଲ୍ଲିକ ପୂର୍ବତନ ସଂପାଦକ କୁଞ୍ଜବିହାରୀ ଦାଶ ଓ ମହେଶ୍ୱର ନାୟକ ପ୍ରମୁଖ ଉପସ୍ଥିତ ରହି ସେମାନଙ୍କ ବକ୍ତବ୍ୟରେ ସ୍ୱର୍ଗତ ଦାସଙ୍କୁ ଜଣେ ଆଦର୍ଶ, ନୀତିବାନ ଓ ଟାଣୁଆ ନେତା ଥିଲେ ବୋଲି କହିଥିଲେ । ତାଙ୍କ କାର୍ଯ୍ୟକାଳ ସମୟରେ ବାଲେଶ୍ୱରରେ ସର୍ବଭାରତୀୟ ଡାକ ସମ୍ମିଳନୀ ଅନୁଷ୍ଠିତ ହେବା ସହ କର୍ମଚାରୀଙ୍କ ପାଇଁ ସମବାୟ ସମିତି ଗଢ଼ାଯାଇଥିଲା । ସେ ଡାକକର୍ମଚାରୀଙ୍କ ସୁରକ୍ଷା ଓ ବହୁ ଜନହିତକର କାର୍ଯ୍ୟ କରିଥିଲେ । ତାଙ୍କର ସ୍ମୃତିପାଇଁ ବାଲେଶ୍ୱରର ସହଦେବଖୁଣ୍ଟାରେ ତାଙ୍କ ନାମରେ ଏକ ତିନିମହଲା ବିଶିଷ୍ଟ ସଂଘଗୃହ ନିର୍ମାଣ ହୋଇଛି । ପୂର୍ଣ୍ଣଚନ୍ଦ୍ର ପ୍ରଧାନ, କାର୍ତ୍ତିକ ଚନ୍ଦ୍ର ଜାନା, ରୁଚିର ସାମଲ, ଦୁଲାଲ ଚନ୍ଦ୍ର ଦେ, ରବି ନାରାୟଣ ମହାଳିକ ଓ ରବି କୁମାର ପାଣିଗ୍ରାହୀ ପ୍ରମୁଖ ବହୁ କର୍ମଚାରୀ ସଭାରେ ଯୋଗଦେଇଥିଲେ । ଶେଷରେ ସଂଘର କୋଷାଧ୍ୟକ୍ଷ କାର୍ତ୍ତିକ ଚନ୍ଦ୍ର ଦାସ ସମସ୍ତଙ୍କୁ ଧନ୍ୟବାଦ ଦେଇଥିଲେ ।
